مەملەكەت باسشىسى وڭتۇستىك قازاقستانعا جۇمىس ساپارىمەن باردى

شىمكەنت. 8 تامىز.  بۇگىن مەملەكەت باسشىسى نۇرسۇلتان نازارباەۆ وڭتۇستىك قازاقستان وبلىسىنا جۇمىس ساپارىمەن باردى. ول ساپار اياسىندا وبلىستىق ءماسليحاتتىڭ سەسسياسىنا قاتىسىپ, دەپۋتاتتارعا وبلىستىڭ جاڭا اكىمى بەيبىت اتامقۇلوۆتىڭ كانديداتۋراسىن ۇسىندى. دەپۋتاتتار ۇسىنىستى ءبىر اۋىزدان ماقۇلدادى. بۇل egemen.kz حابارلادى. قازاقستان پرەزيدەنتى بۇرىنعى اكىم اسقار مىرزاحمەتوۆ ۇلكەن جۇمىس اتقارعانىن, ناتيجەسىندە ءوڭىر ەكونوميكاسى تابىستى دامىپ, الەۋمەتتىك نىساندار قۇرىلىسى بەلسەندى جۇرگىزىلىپ, قىزمەت كورسەتۋ سالاسى جۇيەلى تۇردە جاقسارىپ كەلە جاتقانىن اتاپ ءوتتى. ەلباسى اسقار مىرزاحمەتوۆتىڭ تاجىريبەسى مەن بەدەلى قازىرگى ۋاقىتتا ەلدىڭ جەتەكشى ساياسي كۇشى بولىپ سانالاتىن «نۇر وتان» پارتياسىنىڭ باسشىلىعىندا قاجەت ەكەنىن ايتتى. پرەزيدەنت وبلىستىڭ دامۋىنا ءداستۇرلى تۇردە زور كوڭىل بولىنەتىنىنە, ونىڭ باسشىسىنا ايرىقشا جاۋاپكەرشىلىك جۇكتەلەتىنىنە نازار اۋداردى. سونىمەن قاتار, ەلباسى ءوڭىر اكتيۆىمەن كەزدەسۋ وتكىزىپ, ونىڭ بارىسىندا وبلىستىڭ جاڭا اكىمىن تانىستىردى. مەملەكەت باسشىسى بەيبىت اتامقۇلوۆتىڭ ءتۇرلى باسقارۋ سالالارىنداعى جۇمىس تاجىريبەسىن, ءبىلىم دەڭگەيىنىڭ جوعارىلىعىن اتاپ ءوتتى جانە ءوڭىردىڭ الدىنا قويعان مىندەتتەردى ونىڭ يگەرە الاتىنىنا سەنىم ءبىلدىردى. نۇرسۇلتان نازارباەۆ ەكونوميكاداعى احۋالدىڭ كۇردەلەنۋىنە بايلانىستى قولدا بار قاراجاتتى پايدالانۋ تيىمدىلىگىن ارتتىرۋعا باسىمدىق بەرىلەتىنىن, بۇل بارلىق دەڭگەيدەگى اكىمدەردىڭ مىندەتى ەكەنىن اتاپ كورسەتتى. مەملەكەت باسشىسى اتاپ وتكەندەي, رەسپۋبليكادا داعدارىستىق قۇبىلىستاردى ەڭسەرۋ ءۇشىن جۇيەلى شارالار قابىلدانۋدا. ەلدە جۇرگىزىلىپ جاتقان يندۋستريالاندىرۋ ەكونوميكانىڭ ورنىقتىلىعىن كۇشەيتۋگە, شيكىزاتتىڭ الەمدىك باعاسىنا تاۋەلدىلىكتى ازايتۋعا, شاعىن جانە ورتا بيزنەستىڭ ۇلەسىن ارتتىرۋعا باعىتتالعانىن ايتتى. «نۇرلى جول» باعدارلاماسى دا داعدارىسقا قارسى ساياساتتىڭ ىلكىمدى قۇرالى بولىپ سانالادى. قازاقستان پرەزيدەنتى وبلىستىڭ الەۋەتىن جۇزەگە اسىرۋ كەرەكتىگىن اتاي وتىرىپ, بىرقاتار نەگىزگى مىندەتتەر قويدى. ولاردىڭ قاتارىندا تابيعي رەسۋرستاردى پايدالانۋدى قوسا العاندا, ونەرەكاسىپتى دامىتۋ, ۋران كلاستەرىن قالىپتاستىرۋ, شاعىن جانە ورتا كاسىپكەرلىكتىڭ وركەندەۋى ءۇشىن جاعدايدى ودان ءارى جاقسارتۋ, اگروونەركاسىپ كەشەنىنىڭ تيىمدىلىگىن ارتتىرۋ جانە پايدالانىلمايتىن جەر القاپتارىن ازايتۋ ماسەلەلەرى بار. سونداي-اق, مەملەكەت باسشىسى الەۋمەتتىك وزەكتى, سونىڭ ىشىندە ءۇش اۋىسىمدىق مەكتەپتەردى جويۋ, بالالاردى مەكتەپكە دەيىنگى مەكەمەلەرمەن قامتۋ اياسىن ۇلعايتۋ ماسەلەلەرىن شەشۋ ءىسىن جالعاستىرۋدى تاپسىردى, بىراق بۇل رەتتە شىعىستاردىڭ ورنىمەن جۇمسالۋ قاعيداتىن ۇستانۋ كاجەتتىگىن ايتتى. باقتيار تايجان. دەرەك, سۋرەت: egemen.kz.