سەنبى كۇنى پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعاريننىڭ توراعالىعىمەن وتكەن ينفلياتسيانى تۇراقتاندىرۋ جونىندەگى جيىندا الەۋمەتتىك ماڭىزى بار تاۋارلار تىزبەسىن كەڭەيتۋگە قاتىستى ازىق-ت ۇلىك سەبەتىنە جۇرگىزىلگەن الدىن الا تالداۋ تانىستىرىلدى.
قاراشانىڭ ءۇشىنشى اپتاسىندا الەۋمەتتىك ماڭىزى بار ازىق-ت ۇلىك باعاسى وزگەرىسسىز قالدى. ساۋدا جانە ينتەگراتسيا ءبىرىنشى ۆيتسە-ءمينيسترى ايجان بيجانوۆانىڭ ايتۋىنشا, قازان ايىندا ينفلياتسياعا ەڭ ۇلكەن ۇلەس قوسقان تاۋارلار مىنالار بولدى: قىزاناق – 15,8%, تارتىلعان ەت – 3%, سۇيەكسىز سيىر ەتى – 2,2%, سۇيەكتى جىلقى ەتى – 1,5%, قيار – 7,4%, بالىق – 2,6%, بانان – 2,8%. الايدا بىلتىردىڭ وسى كەزەڭىمەن سالىستىرعاندا, قىزاناق 36,6%-عا, قيار 43,4%-عا ارزانداعان.
– ينفلياتسياعا بارلىق وڭىرلەر بويىنشا جۇرگىزىلگەن تالداۋ قورىتىندىسى توپ-30 تاۋاردى انىقتادى. ولار باعانىڭ وسۋىنە ەڭ كوپ ىقپال ەتەدى, بىراق الەۋمەتتىك ماڭىزى بار ونىمدەر تىزىمىنە كىرمەيدى. بۇل – ەت تۇرلەرى, بالىق, الما, المۇرت, ليمون, شاي, سىر, قاقتالعان سكۋمبريا, بانان, قىزاناق, قيار جانە وزگە دە تاۋارلار. ولاردىڭ ىشىندە يمپورتى جوعارى ونىمدەر دە, نەگىزىنەن ايلىق ينفلياتسياعا عانا اسەر ەتەتىندەرى دە بار. وسى تىزىمنەن الەۋەتتى تۇردە الەۋمەتتىك ماڭىزى بار تاۋارلار قاتارىنا ەنە الاتىن 23 پوزيتسيانى ىرىكتەدىك. ەندى بۇل ۇسىنىستاردى بيزنەس وكىلدەرىمەن تالقىلايمىز, – دەدى ايجان بيجانوۆا.
كاسىپكەرلەر ءۇشىن ءتىزىمنىڭ كەڭەيۋى بىرقاتار مىندەتتەمەنى بىلدىرەدى: مامىلەلەردىڭ اشىقتىعىن قامتاماسىز ەتۋ, كەلىسىمشارتتاردى راسىمدەۋ, شوت-فاكتۋرالار مەن فيسكالدىق چەكتەردى راسىمدەۋ, سونداي-اق زاڭدا بەلگىلەنگەن 15%-دان اسپايتىن ساۋدا ۇستەمەسىن ساقتاۋ.
بۇل شارالار كەڭ تۇتىنىلاتىن ازىق-ت ۇلىكتىڭ اينالىمىن اشىق ەتۋگە جانە دەلدالداردىڭ نەگىزسىز ىقپالىن شەكتەۋگە باعىتتالعان.
جيىن قورىتىندىسىندا سەرىك جۇمانعارين ساۋدا جانە ينتەگراتسيا مينيسترلىگىنە بيزنەس قاۋىمداستىقپەن, سالالىق بىرلەستىكتەرمەن, «اتامەكەن» ۇكپ-مەن ءار ۇسىنىلعان پوزيتسيانى تالقىلاۋدى, يمپورت قۇرىلىمىن قوسىمشا زەردەلەۋدى تاپسىردى. بارلىق كونسۋلتاتسيالار اياقتالعاننان كەيىن عانا تۇپكىلىكتى شەشىم قابىلدانادى.
