اۋقىمدى جيىنعا الەمنىڭ 12 ەلىنەن 40-تان اسا وتانداس عالىم جانە قازاقستاننىڭ عىلىمي-زەرتتەۋ ينستيتۋتتارى مەن جوعارى ءبىلىم بەرۋ ۇيىمدارىنان 100-گە جۋىق ساراپشى قاتىستى.
بۇل – «وتانداستار قورى» جۇزەگە اسىرعان ءتورتىنشى حالىقارالىق باستاما. بۇعان دەيىن 2019 جانە 2023 جىلدارى وتكەن «وتانداستار فورۋمدارى» جانە 2024 جىلعى «كاسىپكەرلەر فورۋمى» شەتەلدەگى قازاق دياسپوراسىمەن تۇراقتى بايلانىس ورناتۋعا سەرپىن بەرگەن بولاتىن. 2025 جىلعى فورۋمنىڭ ەرەكشەلىگى – شەتەلدە عىلىم, تەحنولوگيا جانە يننوۆاتسيا سالالارىندا ەڭبەك ەتىپ جۇرگەن قازاقستاندىق عالىمداردى العاش رەت كەڭ اۋقىمدا ءبىر الاڭعا توعىستىرۋ.
فورۋم شەتەلدەگى وتانداس عالىمداردىڭ ءبىلىمىن, تاجىريبەسىن جانە يننوۆاتسيالىق الەۋەتىن قازاقستاننىڭ عىلىمي-يننوۆاتسيالىق دامۋىنا جۇمىلدىرۋدى كوزدەيدى. سونداي-اق ينتەللەكتۋالدى دياسپورامەن تۇراقتى بايلانىس ورناتۋ; عىلىمي جانە تەحنولوگيالىق سەرىكتەستىكتەر قۇرۋ; جاس عالىمداردى حالىقارالىق عىلىمي ەكوجۇيەگە قوسۋ; عىلىم مەن ءوندىرىس اراسىنداعى ينتەگراتسيانى كۇشەيتۋ; قازاقستاندى عىلىم مەن يننوۆاتسياعا اشىق حالىقارالىق حاب رەتىندە تانىتۋ مىندەتتەرى قويىلدى.
فورۋمنىڭ رەسمي اشىلۋ سالتاناتىندا قر سىرتقى ىستەر مينيسترلىگى حالىقارالىق اقپارات كوميتەتىنىڭ توراعاسى ايبەك سمادياروۆ, قر پارلامەنتى سەناتىنىڭ دەپۋتاتى عالياسقار سارىباەۆ, قر عىلىم جانە جوعارى ءبىلىم ۆيتسە-ءمينيسترى تالعات ەشەنقۇلوۆ, «وتانداستار قورى» كەاق پرەزيدەنتى دانيار قادىروۆ, نازارباەۆ ۋنيۆەرسيتەتىنىڭ پرەزيدەنتى احماد ۆاكار ءسوز سويلەدى.
ا. سمادياروۆ: «عىلىم – ەلدىڭ ەكونوميكالىق ءوسىمىنىڭ جانە يننوۆاتسيالىق دامۋىنىڭ باستى تىرەگى. مەملەكەت شەتەلدەگى وتانداس عالىمداردىڭ تاجىريبەسىن ەلگە تارتۋدىڭ ماڭىزىن اتاپ وتكەن بولاتىن. مينيسترلىك بۇل باعىتتا تۇراقتى تۇردە جۇمىس جۇرگىزىپ كەلەدى», – دەپ اتاپ ءوتتى.
د. قادىروۆ: «قازاقستان ءبىلىم ەكونوميكاسىنا قادام باسقان قازىرگى كەزەڭدە شەتەلدەگى جاراتىلىستانۋ جانە ينجەنەريا سالالارىندا جەتىستىككە جەتكەن قازاق عالىمدارىنىڭ الەۋەتى – ەلدىڭ ستراتەگيالىق كاپيتالى. فورۋم – وسى الەۋەتتى ەل يگىلىگىنە باعىتتاۋدىڭ ناقتى قادامى», – دەدى قوعام پرەزيدەنتى.
ا. ۆاكار (نازارباەۆ ۋنيۆەرسيتەتى): «الەمنىڭ تۇكپىر-تۇكپىرىندەگى وتانداس عالىمداردىڭ ءبىلىمى مەن تاجىريبەسى – قازاقستاننىڭ عىلىمي ورلەۋىندەگى شەشۋشى رەسۋرس. ۋنيۆەرسيتەت ەسىگى سىزدەرگە ارقاشان اشىق: عىلىمي سەرىكتەستىك, بىرلەسكەن زەرتتەۋلەر, اكادەميالىق موبيلدىلىك باعىتتارى بويىنشا», – دەپ تۇيىندەدى.
فورۋم اياسىندا 2025 جىلى جارىق كورگەن « ۇلى دالا» كىتاپ سەرياسىنىڭ تانىستىرىلىمى ءوتتى. جوبا الەمدىك قازاق جانە تۇركى اۆتورلارىن ناسيحاتتاپ, قازاق مادەنيەتى مەن ادەبيەتىن حالىقارالىق دەڭگەيدە ىلگەرىلەتۋدى ماقسات ەتەدى.
پلەنارلىق سەسسيالاردا اقش, رەسەي, گەرمانيا, فرانتسيا, فينليانديا, يندونەزيا, جاپونيا, وڭتۇستىك كورەيا, تۇركيا, موڭعوليا, وزبەكستان ەلدەرىنەن كەلگەن عالىمدار ءوز زەرتتەۋلەرىن تانىستىردى. قاتىسۋشىلاردىڭ باياندامالارى جاساندى ينتەللەكت پەن كۆانتتىق تەحنولوگيالار, يادرولىق ەنەرگەتيكا, مەديتسيناداعى وزىق تەحنولوگيالار, جاسىل ەنەرگەتيكا, ءداستۇرلى جايىلىم شارۋاشىلىعى مەن اگرويننوۆاتسيالار, بيومەتريا جانە كوگنيتيۆتى عىلىمدار, فوتو قارتايۋعا قارسى بيوتەحنولوگيا, الەۋمەتتىك جانە پسيحيكالىق دەنساۋلىق, اۋىل شارۋاشىلىعىنداعى IoT شەشىمدەرى, سونداي-اق بالالار مەن جاستارعا ارنالعان حالىقارالىق ءبىلىم بەرۋ ەكوجۇيەسىنىڭ دامۋى سەكىلدى ماڭىزدى عىلىمي باعىتتاردى قامتىدى.
فورۋم بارىسىندا قازاقستاندا وقىپ جاتقان قانداس ستۋدەنتتەر اراسىنداعى «OQ Startup» جانە «ۇزدىك قانداس ستۋدەنت» بايقاۋلارىنىڭ جەڭىمپازدارى ماراپاتتالدى. بۇل باستاما جاس تالانتتاردىڭ الەۋەتىن قولداۋعا جانە ولاردىڭ قازاقستانمەن عىلىمي بايلانىسىن نىعايتۋعا باعىتتالعان.
قۋانىش ەرعاليەۆ قر عىلىم جانە جوعارى ءبىلىم مينيسترلىگى باستامالاعان ء«جۇز عالىم» جوباسىن, سونداي-اق الەمدىك قازاق عالىمدارىن بىرىكتىرەتىن Qazaq International Science and Technology Association (QIST) ۇيىمىن رەسمي تۇردە تانىستىردى. بۇل جوبا قازاقستاننىڭ تالدامالىق الەۋەتىن كۇشەيتىپ, حالىقارالىق عىلىمي كوللابوراتسيانى ينستيتۋتسيونالدىق دەڭگەيدە دامىتۋعا جاڭا مۇمكىندىك اشادى.
فورۋم سوڭىندا «وتانداستار قورى» كەاق پرەزيدەنتى دانيار قادىروۆ باستى ۇسىنىستار مەن تالقىلاۋلاردى تۇيىندەپ, فورۋم ماتەريالدارى بويىنشا جيناق شىعارۋ جوسپارلانعانىن حابارلادى.
فورۋم قازاقستاننىڭ ينتەللەكتۋالدى دياسپوراسىمەن جۇيەلى ءارى ۇزاق مەرزىمدى عىلىمي ىنتىماقتاستىقتىڭ جاڭا كەزەڭىن باستادى.
