فيلارمونيا ارداگەرلەرى قىزىل كىلەم ۇستىمەن سالتاناتتى تۇردە ءجۇرىپ ءوتىپ, ەستەلىك سۋرەتكە ءتۇستى. سونىمەن قاتار الماتى قالاسى مۋزەيلەر بىرلەستىگى مەن ۇلتتىق ورتالىق مۋزەي ۇجىمى فيلارمونيا شەجىرەسى مەن نۇرعيسا تىلەنديەۆتىڭ ءومىرى جانە شىعارماشىلىعىنا ارنالعان تاعىلىمدى كورمە ۇسىندى. كورەرمەندەر تاريحي فوتوسۋرەتتەر مەن سيرەك ماتەريالدار ارقىلى فيلارمونيانىڭ 90 جىلدىق تاريحىمەن تانىسىپ, تىڭ مالىمەت الدى.
الماتى قالاسى اكىمىنىڭ ورىنباسارى ابزال نۇكەنوۆ فيلارمونيا ۇجىمىن مەرەيلى بەلەسىمەن قۇتتىقتاپ, مەملەكەت باسشىسى قاسىم-جومارت توقاەۆتىڭ ارنايى جولداعان قۇتتىقتاۋ حاتىن تابىس ەتتى.
«جامبىل اتىنداعى قازاق مەملەكەتتىك اكادەميالىق فيلارمونياسىنىڭ قۇرىلعانىنا 90 جىل تولۋىمەن قۇتتىقتايمىن! بۇل – ۇلتتىق مۋزىكا ونەرىنىڭ مەرەيلى بەلەسى. ايگىلى احمەت جۇبانوۆ نەگىزىن قالاعان فيلارمونيا عاسىرعا جۋىق ۋاقىت ىشىندە حالقىمىزدىڭ رۋحاني مۇراسىن دامىتۋعا, وركەنيەتىمىزدىڭ ءورىسىن كەڭەيتىپ, قازاقتىڭ ءان-كۇيىن الەمگە تانىتۋعا زور ۇلەس قوستى. ۇلت رۋحانياتىندا ايرىقشا ءىز قالدىرعان كوپتەگەن تۇعىرلى تۇلعامىز وسى كيەلى ساحنادا ونەر كورسەتتى. ونەگەلى ۇجىم بۇگىندە كاسىبي شەبەرلىگىن شىڭداپ, اعا بۋىننىڭ تاعىلىمدى جولىن جالعاستىرىپ كەلەدى. ءتول مادەنيەتىمىزدى پاش ەتىپ, قالىڭ كورەرمەننىڭ ىستىق ىقىلاسىنا بولەنىپ جۇرگەن فيلارمونيا قىزمەتكەرلەرىنە شىنايى ريزاشىلىعىمدى بىلدىرەمىن» دەلىنگەن پرەزيدەنتتىڭ قۇتتىقتاۋ حاتىندا.
مەرەيتويلىق جىلدى قورىتىندىلاعان كەشتە فيلارمونيانىڭ بارلىق شىعارماشىلىق ۇجىمى ونەر كورسەتتى. ولاردىڭ قاتارىندا, ن.تىلەنديەۆ اتىنداعى فولكلورلى-ەتنوگرافيالىق اكادەميالىق «وتىرار سازى» وركەسترى, ت.ابدىراشەۆ اتىنداعى مەملەكەتتىك اكادەميالىق سيمفونيالىق وركەستر, قازاقستاننىڭ ۇرمەلى اسپاپتار وركەسترى, ب.بايقاداموۆ اتىنداعى مەملەكەتتىك حور كاپەللاسى, مەملەكەتتىك كلاسسيكالىق گيتاراشىلار كۆينتەتى, عازيزا جۇبانوۆا اتىنداعى مەملەكەتتىك ىشەكتى اسپاپتار كۆارتەتى, مەملەكەتتىك قاراعايلى-ۇرمەلى اسپاپتار كۆينتەتى, سونىمەن قاتار بەلگىلى سوليستەر, دومبىراشىلار مەن پيانيستەر بار. ولاردىڭ ونەرى كەش اجارىن اشا ءتۇستى.
قازاق ءان-كۇيلەرىمەن قاتار, الەمدىك كلاسسيكانىڭ ءىنجۋ-مارجاندارى ۇسىنىلدى. كورەرمەن نۇرعيسا تىلەنديەۆتىڭ «ماحامبەت», «اققۋ» كۇيلەرى مەن ء«وز ەلىم», «قۇستار ءانى», «و, تۋعان جەر» اندەرىن, ابايدىڭ «ايتتىم سالەم, قالامقاس» شىعارماسىن تىڭدادى. سونداي-اق م.تولەباەۆتىڭ ء«بىرجان – سارا» وپەراسىنداعى مەرەكەلىك بي, بەتحوۆەننىڭ 9-سيمفونياسىنان ءۇزىندى ورىندالدى. دومبىراشىلاردىڭ «بالاميشكا», «القيسسا» كۇي تارتىسى مەن ەكى فورتەپيانوعا ارنالعان كۇردەلى تۋىندىلارى كەشتىڭ كوركەمدىك دەڭگەيىن ارتتىردى.
الماتى
