توپۋريالار اۋلەتىنەن ەكى بىردەي مىقتى سپورتشى شىققاننىن جانكۇيەرلەر جاقسى بىلەدى. ماسەلەن, الەكساندردىڭ تۋعان ءىنىسى يليا ارالاس جەكپە-جەكتى سەرىك ەتكەلى 17 كەزدەسۋ وتكىزىپ, بارلىعىندا جەڭىسكە جەتتى. 15 باسەكەدە ايقىن باسىمدىق تانىتتى. بىلتىر 17 اقپاندا ول اۋستراليالىق الەكساندر ۆولكانوۆسكيدى ۇرىپ جىعىپ, جارتىلاي ورتا سالماقتىڭ چەمپيوندىق بەلبەۋىن يەلەندى. قازان ايىندا امەريكالىق ماكس حوللوۋەيدى ەسىنەن تاندىرىپ, ءوز اتاعىن قورعادى. ال بيىل نەبارى جارتى مينۋت ارالىعىندا برازيليالىق چارلز وليۆەيرانىڭ وسال تۇسىن وڭاي تاۋىپ, جەڭىل سالماقتىڭ چەمپيونى اتاندى. گەرمانيادا تۋىپ-ءوسىپ, يسپانيانىڭ تۋى استىندا ونەر كورسەتىپ جۇرگەن 28 جاستاعى گرۋزين جىگىتى بۇگىندە UFC-ءدىڭ ر4ر (pound-for-pound) نۇسقاسىندا تەڭدەسسىز دەپ تانىلدى.
مىنە, وسى يليانىڭ اعاسى الەكساندر توپۋريا ءبىزدىڭ بەكزات الماحانعا قارسىلاس. 29 جاستاعى فايتەر گرەك-ريم كۇرەسى, برازيليالىق دجيۋ-دجيتسۋ, بوكس جانە كيكبوكستى جەتىك مەڭگەرگەن. ارالاس جەكپە-جەكتەن وتەتىن جارىستارعا دا ارا-تۇرا عانا قاتىسىپ تۇرادى. وسى كۇنگە دەيىن ول جەتى رەت وكتاگونعا شىعىپ, التى رەت جەڭىسكە جەتتى. بەس باسەكەنى مەرزىمىنەن بۇرىن اياقتادى. الەكساندر كەزدەسۋلەرىنىڭ باسىم بولىگىن يسپانيادا وتكىزىپ, اندرەاس چيگۋانو, الەحاندرو رۋمين, لۋكاس تەنوريو, البەرتو يبانەز جانە يوحانن سەگاسقا سان سوقتىردى. وسىدان 10 جىل بۇرىن ول بولگاريالىق يۆو يۆانوۆتان ۇتىلدى.
بيىل الەكساندر توپۋريا UFC-مەن كەلىسىمشارتقا وتىرىپ, اۋستراليانىڭ سيدنەي قالاسىندا ۇيىمداستىرىلعان العاشقى كەزدەسۋىندە جەرگىلىكتى سپورتشى كولبي تيكنەسپەن كۇش سىناستى. بۇل باسەكە گرۋزيالىق فايتەردىڭ جەڭىسىمەن اياقتالدى.
بەكزات جايىندا ايتار بولساق, ونىڭ جاسى 27-دە. جامبىل وبلىسى بايزاق اۋدانىنىڭ تۋماسى. شەردوگى – 14 جەكپە-جەك, 12 جەڭىس. «تۇران اسكەرى» دەگەن بۇركەنشىك ەسىمدى تاڭداعان قانداسىمىز 10 قارسىلاسىن نوكاۋتپەن, ءبىر رەت «سابميشن» تاسىلىمەن جەڭدى. بىلتىر UFC-دەگى تۇساۋكەسەر كەزدەسۋىن الماحان داڭقى جەر جارعان حابيب نۇرماعامەدوۆتىڭ ءىنىسى ۋمارعا قارسى وتكىزدى. باسەكە بارىسىندا ونى نوكداۋنعا دا جىبەردى. بىراق اقىرىندا ۇپاي سانىمەن ۇتىلدى. ەسەسىنە بەكزات بيىل مامىردا كانادانىڭ مونرەال قالاسىندا وتكەن ايقاستا ۇيەڭكى جاپىراقتار ەلىنىڭ وكىلى برەد كاتونانى كەسكەن تەرەكتەي سۇلاتىپ سالدى. قازاقتىڭ قايسار ۇلىنا وسىنداي جارقىن جەڭىسكە قول جەتكىزۋ ءۇشىن نەبارى 1 مينۋت 4 سەكۋند جەتكىلىكتى بولدى.
پارسى شىعاناعىندا جالاۋى جەلبىرەيتىن جارىستا بەكزات باۋىرىمىزعا ساتتىلىك تىلەيمىز. الەكساندر توپۋريانى جەڭۋگە ونىڭ كۇش-جىگەرى جەتەتىنىنە سەنىمدىمىز. قانداسىمىز نوكاۋتپەن ۇتىپ جاتسا, وعان دا تاڭدانبايمىز. سونداي-اق ءدال سول تۋرنيردە قازاقتىڭ تاعى ءبىر تەگەۋرىندى سپورتشىسى اسۋ الماباەۆ تا ونەر كورسەتەدى. سول كەشتە «زۇلپىقار» امەريكالىق الەكس پەرەسپەن ايقاسادى.
