ءۇمىت شاياحمەتوۆانىڭ پىكىرىنشە, جەكە مامانداندىرىلعان اگروبانك قۇرۋدىڭ ماڭىزى جوق, سەبەبى ەلدە وسىعان ۇقساس قارجى ينستيتۋتتارى بولعان, بىراق ولار بانكروتتىققا ۇشىرادى.
«بۇگىندە نارىقتا قازاقستاننىڭ دامۋ بانكى مەن «وتباسى بانكى» جۇمىس ىستەيدى. بىرەۋى يپوتەكا بەرەدى, ەكىنشىسى زاڭدى تۇلعالارمەن جۇمىس ىستەيدى. مەنىڭ ويىمشا, بۇل جەتكىلىكتى. وعان قوسا, اۋىل شارۋاشىلىعى مەن اگروونەركاسىپتىك كەشەن سەكتورىندا جۇمىس ىستەيتىن ءتۇرلى ينستيتۋتتار وتە كوپ, ولار – اگرارلىق نەسيە كورپوراتسياسى, «اگروليزينگ», مەملەكەتتىك «ازىق-ت ۇلىك كورپوراتسياسى», جەرگىلىكتى باسقارۋ ورگاندارى جانە باسقالار», – دەيدى Halyk Bank باسشىسى.
اۋىل شارۋاشىلىعىن قارجىلاندىراتىن بانك قۇرۋ تاجىريبەسى كورشىلەس ەلدەردە بار. رەسەيدە «روسسەلحوزبانك» شوب-قا 3-7%-بەن نەسيە بەرەدى. 1953 جىلى قىتايدا 320 ملن كليەنتكە قىزمەت كورسەتەتىن The Agricultural Bank of China مامانداندىرىلعان اۋىل شارۋاشىلىعى بانكى قۇرىلدى. بۇل بانك اكتيۆتەرى بويىنشا قىتايدىڭ بانك جۇيەسىندە ءتورتىنشى جانە تازا پايداسى بويىنشا جەتىنشى ورىندا. قىرعىزستاندا اگروسەكتوردى دامىتۋ جونىندەگى مەملەكەتتىك باعدارلامالاردى ىسكە اسىراتىن, ەلدىڭ ءىرى قارجى ينستيتۋتتارىنىڭ ءبىرى «اۋىل بانكى» بار.
قارجىگەر بەيسەنبەك زيابەكوۆتىڭ ايتۋىنشا, وتاندىق بانك سەكتورى ءالى كۇنگە دەيىن مەملەكەتتىك كومەككە سۇيەنىپ وتىر. ونىڭ ايتۋىنشا, ەكونوميكاداعى مەملەكەتتىڭ جوعارى ۇلەسى بانك سەكتورىنا دا اسەر ەتەدى. كوشباسشى پوزيتسياعا ۇمىتكەر كەز كەلگەن بانك ءىس جۇزىندە مەملەكەتتىك سەكتوردىڭ اقشاسىنا تاۋەلدى جانە ۇكىمەتتىك باعدارلامالارعا قاتىسادى. ءبىزدىڭ ەلدە بىرەر بانكتەن وزگە بانكتەردىڭ ءبارى مەملەكەتتىك اقشاعا تاۋەلدى. ەگەر مەملەكەت مىنا بانكتى بانكروت ەتۋ كەرەك دەپ شەشسە, ونى ءبىر بۇيرىقپەن بانكروتقا جىبەرە الادى.
