سولتۇستىك قازاقستان – توپىراعى قۇيقالى, جەرى جومارت, وسىمدىك شارۋاشىلىعىنا قولايلى ءوڭىر. شارۋالاردىڭ ەرەن ەڭبەگىنىڭ ناتيجەسىندە بيىل ءوڭىر قامباسى استىققا تولىپ, رەكوردتىق ءونىم جينالدى. جىل سايىن وبلىستاعى مايلى داقىلدار سەبىلەتىن القاپتاردىڭ ۇلەسى دە ارتىپ كەلەدى. كۇزدە ەڭبەك ادامدارى ەگىس القابىنان 1,2 ملن توننا مايلى داقىل جيناعان. ەندىگى كەزەكتە ءونىمدى شاشپاي-توكپەي, كەرەككە جاراتىپ, ءتيىمدى وندەۋ قاجەت. ۇكىمەتتىڭ الدىندا اۋىل شارۋاشىلىعىنداعى وندەلەتىن ءونىمنىڭ ۇلەسىن 70 پايىزعا جەتكىزۋ مىندەتى تۇرعانىن ەسكەرسەك, اتالعان سالاعا اۋقىمدى قولداۋ قاجەت.
وبلىس ورتالىعىندا «ماسلو-دەل» ماي زاۋىتى اشىلعالى جەرگىلىكتى ديقاندار ءونىمىن وتكىزۋ ءۇشىن الىسقا سابىلمايتىن بولدى. جاڭا ءوندىرىس ورنى كۇنىنە 1,5 مىڭ توننا مايلى داقىل قابىلدايدى. ودان شىعاتىن ءونىم تۇرلەرى دە سان الۋان. وسىلايشا, ءبىر عانا ءىرى جوبا وڭىردەگى اۋىل شارۋاشىلىعىنىڭ دامۋىنا سەرپىن بەرىپ, جۇزدەگەن ادامدى جۇمىسپەن قامتىپ, ازىق-ت ۇلىك وندىرىسىندەگى وبلىس الەۋەتىن ارتتىرىپ وتىر. بۇل ناتيجەگە قول جەتكىزۋدە قازاقستاننىڭ دامۋ بانكى («بايتەرەك» حولدينگىنىڭ ەنشىلەس ۇيىمى) كورسەتكەن جۇيەلى قولداۋدىڭ ورنى ەرەكشە.
«زاۋىتتا كۇنباعىس, راپس, سويا, زىعىر ءدانى وڭدەلەدى. بىلتىر اشىلعان ءوندىرىس ورنىندا 250 ادام تۇراقتى جۇمىسپەن قامتىلعان. جىل سايىن نارىققا 200 مىڭ توننا ماي شىعارۋعا مۇمكىندىگىمىز بار. داننەن ماي سىعۋ ءۇشىن ەۋروپالىق وزىق تەحنولوگيالاردى پايدالانامىز. مۇنىڭ ءبارى قازاقستاننىڭ دامۋ بانكىنىڭ قارجىلاي قولداۋىنسىز جۇزەگە اسپاس ەدى. بەرىلگەن قاراجاتتى ونداعان جىلدار بويى اقتايتىن ۇزاق مەرزىمدى جوبالارعا قارجى قۇياتىنداردى تابۋ قيىن. ال مەملەكەتتىك قولداۋ باعدارلاماسى اياسىندا قازاقستاننىڭ دامۋ بانكى ارقىلى تومەن پايىزبەن قارجى تارتۋعا مۇمكىندىك بار», دەيدى «ماسلو-دەل» كومپانياسىنىڭ باس ديرەكتورى پاۆەل سەليۆانوۆ.
وتاندىق بانك زاۋىن قۇرىلىسىنا 11 ميلليارد تەڭگە قارجى قۇيعان. «ماسلو-دەل» سەرىكتەستىگى مەن قازاقستاننىڭ دامۋ بانكىنىڭ ارىپتەستىگى ءالى دە جالعاسىپ كەلەدى. قازىر ءوندىرۋشى بانكتىڭ ەكسپورتتى قارجىلاندىرۋ باعدارلاماسى ارقىلى قولداۋ كورىپ وتىر. ناتيجەسىندە 2014 جىلى سىرتقا 3 ميلليارد تەڭگەنىڭ ءونىمىن ساتقان سەرىكتەستىك بيىل بۇل كورسەتكىشتى 28 ميللياردقا جەتكىزگەن.
«الداعى تاڭدا زاۋىتتى كەڭەيتىپ, ءوندىرىس قۋاتتىلىعىن ارتتىرۋ جوسپارى بار. ءونىمىن بىزگە وتكىزگىسى كەلەتىن ديقاندار كوپ. الايدا جەتكىزىلەتىن مايلى داقىلدىڭ ءبارىن قابىلداپ ۇلگەرە المايمىز. سوندىقتان بيىل ءداندى كەپتىرەتىن قوسىمشا قوندىرعىلار ورناتىپ, شيكىزاتتى ساقتاۋ ورنىن كەڭەيتەمىز. بۇل باستاماعا دا قازاقستاننىڭ دامۋ بانكى ارقىلى قارجى تارتۋ قاراستىرىلىپ جاتىر. وعان قوسا مەملەكەتتىك قولداۋ شارالارى ارقىلى الماتىداعى ماي كومبيناتىن جاڭعىرتقىمىز كەلەدى», دەيدى پاۆەل سەليۆانوۆ.
بۇگىندە وڭىردەگى ماي زاۋىتتارى تولىق قۋاتتىلىقتا جۇمىس ىستەي الماي وتىر. وعان سەبەپ – شيكىزاتتىڭ جەتكىلىكسىزدىگى. سونىڭ سالدارىنان كاسىپورىندار اراسىندا باسەكەلەستىك پايدا بولعان. بۇل تىعىرىقتان شىعۋ ءۇشىن دە «ماسلو-دەل» كومپانياسى قازاقستاننىڭ دامۋ بانكىنىڭ قولداۋىنا يەك ارتىپ كەلەدى. بانكتىڭ دەر كەزىندە بەرىلگەن قارجىسى ەسەبىنەن زاۋىتتىڭ اينالىمداعى قاراجاتى ارتىپ, شيكىزاتتى ءتيىستى مەرزىمدە ءتيىمدى ساتىپ الىپ وتىر.
