فوتو: اۋىل شارۋاشىلىعى مينيسترلىگى
«سىرىم» ۆەتەريناريالىق باقىلاۋ بەكەتىندە سامار وبلىسىنان (رف) قىزىلوردا وبلىسىنا بەت العان جۇك كولىگى توقتاتىلىپ, كولىكتەن 63 مىڭ دانا تاۋىق جۇمىرتقاسى تاسىمالدانىپ كەلە جاتقانى انىقتالعان.
قۇجاتتىق باقىلاۋ ناتيجەسىندە زاڭبۇزۋشىلىق انىقتالدى: ۆەتەريناريالىق ىلەسپە قۇجاتتاردا كورسەتىلگەن جۇك جونەلتۋشى جانۋاردان الىناتىن ونىمدەردى ەاەو ەلدەرىنە جەتكىزۋگە رۇقساتى بار ۇيىمداردىڭ تىزىلىمىنە ەنگىزىلمەگەن. سول سەبەپتى جۇك كەرى قايتارىلدى. ال جۇرگىزۋشىگە اكىمشىلىك قۇقىق بۇزۋشىلىق تۋرالى كودەكسىنىڭ 406-بابى بويىنشا اكىمشىلىك حاتتاما تولتىرىلىپ, ايىپپۇل سالىندى. تاسىمالداۋشىعا قولدانىستاعى ۆەتەريناريالىق-سانيتاريالىق تالاپتار ءتۇسىندىرىلدى.
اۋىل شارۋاشىلىعى مينيسترلىگىنىڭ مالىمەتىنشە, 2025 جىلدىڭ باسىنان بەرى ەاەو ەلدەرىمەن شەكارادا ۆەتەريناريالىق-سانيتاريالىق ينسپەكتورلار 57 185 كولىك قۇرالىن جانە شامامەن 738 مىڭ توننا مال شارۋاشىلىعى ونىمدەرىن تەكسەرگەن. ناتيجەسىندە 1 020 كولىك كەرى قايتارىلىپ, 397 اكىمشىلىك حاتتاما تولتىرىلعان. ايىپپۇلداردىڭ جالپى سوماسى 19,7 ملن تەڭگەنى قۇراعان.
سونىمەن قاتار, ءۇشىنشى ەلدەرمەن شەكاراداعى وتكىزۋ بەكەتتەرىندە 21 654 اۆتوكولىك, 69 802 تەمىرجول قۇرامى, 257 تەڭىز كەمەسى جانە 2,139 ملن توننادان استام مال شارۋاشىلىعى ءونىمى تەكسەرىلدى. تەكسەرۋ قورىتىندىسى بويىنشا 24 اۆتوكولىك كەرى قايتارىلىپ, 24 اكىمشىلىك حاتتاما رەسىمدەلدى.
