جاسمينا فينالعا وتكەنىن قۋانىشپەن ءبولىسىپ, بۇل كەزەڭنىڭ ءوز ومىرىندەگى ەڭ اسەرلى ساتتەردىڭ ءبىرى ەكەنىن اتاپ ءوتتى.
– مەن «گولوس. دەتي» فينالىنا ءوتتىم! بۇل وتە جاۋاپتى ءارى تولقىتقان كەزەڭ بولدى. كەرەمەت قاتىسۋشىلارمەن بىرگە ءان سالدىم, بۇل ناعىز مۋزىكالىق مەرەكەگە اينالدى. قولداۋ كورسەتكەندەرىڭىزگە راقمەت, الدا فينال! – دەپ جازدى ول.
ءانشىنىڭ ۆوكال ساحناسىنداعى جولى ەرتە باستالعان. اناسى گۇلزيانىڭ ايتۋىنشا, قىزىنىڭ مۋزىكالىق قابىلەتى ءتورت جاسىندا بايقالعان.
– ول كىشكەنتاي كەزىندە “بالاپان” ارناسىنداعى اندەردى ءدال ايتا باستادى. دىبىستى تاپ باساتىن, داۋىسى تازا ءارى اشىق بولاتىن. مۋزىكانت رەتىندە مۇنى بىردەن سەزدىم, – دەيدى ول.
تۇزەلوۆتار وتباسىندا جاسمينانىڭ جوباعا قاتىسۋى ورتاق ءىس رەتىندە قابىلدانادى. تۋعان-تۋىستارى رەپەرتۋار تاڭداۋعا, ساحنالىق بەينەلەرگە, الەۋمەتتىك جەلىلەرگە قولداۋ كورسەتەدى.
– ءبىز ونى بۇكىل وتباسىمىزبەن قولدايمىز. اعالارى مەن اپايلارى دا كومەكتەسەدى, ءبىرى الەۋمەتتىك جەلىلەردى جۇرگىزەدى, ءبىرى ساحنالىق وبرازىن ويلاستىرادى, ءبىرى ءان تاڭداۋعا يدەيا بەرەدى. ءار پىكىردى تىڭداپ, پەداگوگپەن بىرگە اقىلداسىپ شەشىم قابىلدايمىز. ساحناعا شىققاندا ءاردايىم جانىندا بولۋعا تىرىسامىز. ونىڭ كاسىبي وسۋىنە ۇلكەن ۇلەس قوسقان – ۇستازى كارينا كارەنينا, – دەدى گۇلزيا.
جوبانى وقۋ جانە جاتتىعۋمەن قاتار الىپ ءجۇرۋ وڭاي بولماعانىمەن, مەكتەپ پەن مۋزىكا مەكتەبى قولداۋ كورسەتىپ كەلەدى. ءانشى ۆولەيبولدى جاقسى كورەدى جانە سپورتپەن دە بەلسەندى اينالىسادى.
– مۇنداي ۇلكەن جوبالارعا قاتىسۋ كوپ كۇش پەن توزىمدىلىك تالاپ ەتەدى. ءبىز دە قاتتى ۋايىمدادىق. قىزىمنىڭ فينالعا وتكەنىن ەستىگەندە ءبارىمىزدىڭ كوزىمىزگە جاس كەلدى, بۇل قۋانىشتى سوزبەن جەتكىزۋ قيىن, – دەدى گۇلزيا.
گۇلزيانىڭ ايتۋىنشا, جاسمينا ومىردە اشىق, كوڭىلدى, كوپشىل قىز.
– ساحنادا جۇرەگىمەن ءان ايتادى, سەزىمىن جاسىرماي جەتكىزەدى. تىڭدارمان ونىڭ شىنايىلىعىن بىردەن سەزەدى. ومىردە – مەيىرىمدى, كوڭىلدى, وتباسىنىڭ كەنجەسى, ەركەسى. ەشنارسەنى جۇرەگىنە جاقىن المايدى, رەنىشتى تەز ۇمىتادى, – دەيدى ول.
ساحناعا شىعار الدىندا اناسى ءاردايىم قىزىنا دەمەۋ بەرەدى.
جاسمينانىڭ ۇستازى گۇلميرا سەيىتوۆانىڭ ايتۋىنشا, سوڭعى ەكى جىلدا ءانشىنىڭ كاسىبي دەڭگەيى ايتارلىقتاي وسكەن.
– جاسمين ماعان كەلگەندە-اق جوبالارعا قاتىسقان, تاجىريبەسى بار بولاتىن. داۋىسى كۇشتى, جاسىنا ساي دياپازونى كەڭ. ءبىز تەحنيكاسىن كۇشەيتتىك, رەپەرتۋارىن كەڭەيتتىك, مۋزىكانى ءتۇسىنىپ ايتۋعا ۇيرەنىپ جاتىر. جاسمين وتە ماقساتشىل, باتىل, ءتوزىمدى. پسيحولوگيالىق تۇراقتىلىعى دا بايقاۋلارعا قاتىسۋ ءۇشىن وتە ماڭىزدى, – دەدى پەداگوگ.
ۇستازدىڭ ايتۋىنشا, ءبىر جىل بۇرىن جاسمينا وسى «گولوس» جوباسىنا قاتىسا الماعان.
– ءار نارسەنىڭ ءوز ۋاقىتى بار. بيىل ول بارلىق جاعىنان دايىن بولىپ كەلدى. وسى ءبىر جىلدىڭ ىشىندە بىرنەشە بايقاۋدا جەڭىسكە جەتتى, ۇلكەن كونتسەرتتەرگە قاتىستى. ماسكەۋگە بارعان كەزدە مورالدىق, فيزيكالىق جانە ۆوكالدىق تۇرعىدان تولىق دايىن بولدى, – دەدى گۇلميرا.
ول جوبانىڭ فينالى ەڭ اسەرلى كەزەڭ بولۋى مۇمكىن ەكەنىن ايتتى.
– جاسمينانىڭ جولى بولاتىنىنا سەنەمىن. “گولوس” – ونىڭ شىعارماشىلىق جولىنداعى ءبىر قادام عانا. الدا ءالى تالاي جوبا, بايقاۋ, ۇلكەن ساحنالار بار. ول نەبارى 12 جاستا, ەڭ قىزىعى ءالى الدا, – دەپ تۇيىندەدى پەداگوگ.
جاسمينانىڭ اناسى قىزدىڭ الداعى جوسپارلارىمەن دە ءبولىستى.
– ول مۋزىكانت بولۋدى شىن جۇرەكتەن قالايدى. سپورتتى دا جاقسى كورەدى. وقۋدا دا الدا. قىزىعۋشىلىعى بار ءار نارسەدە ءوزىن دامىتقىسى كەلەدى. ال مۇمكىندىكتەر اشىلعاندا ولاردى پايدالانۋ كەرەك. ءبىزدىڭ مىندەتىمىز – قولداۋ كورسەتۋ. جوسپاردا – ۇلكەن ساحنالاردى باعىندىرۋ, الەمدى شارلاۋ, ونەر قۋانىشىمەن بۇكىل وتباسىمىز بىرگە ءجۇرۋ, – دەدى ول.
شوۋدىڭ فينالى 28 قاراشادا وتەدى.
