فوتو: اشىق دەرەككوز
باعانىڭ كوتەرىلۋى بانك الەۋمەتتىك باعدارلامالاردى تابىستى دامىتىپ, ءوزىنىڭ ESG باستامالارى تۋرالى اشىق اقپارات بەرىپ, تۇراقتى دامۋ قاعيداتتارىن جۇمىسىندا ءتيىمدى ەنگىزىپ كەلە جاتقانىن كورسەتەدى.
Sustainable Fitch ساراپشىلارى «وتباسى بانكىنىڭ» قىزمەتى ايتارلىقتاي الەۋمەتتىك اسەرگە يە ەكەنىن اتاپ ءوتتى. بانك قازاقستاننىڭ مەملەكەتتىك تۇرعىن ءۇي ساياساتىن ىسكە اسىرۋدا ماڭىزدى ءرول اتقارادى.
بيىل «وتباسى بانك» مۇمكىندىگى شەكتەۋلى بالالارى بار 348 وتباسىعا جانە 1 مەن 2 توپتاعى مۇمكىندىگى شەكتەۋلى 372 ادامعا قونىس تويىن تويلاۋعا كومەكتەستى. ولارعا بەرىلگەن نەسيەلەردىڭ جالپى سوماسى 8,5 ميلليارد تەڭگەنى قۇرادى. 2025 جىلى بارلىعى الەۋمەتتىك جاعىنان وسال توپتارعا جەڭىلدەتىلگەن نەسيە بەرۋ بويىنشا 1 577 نەسيە راسىمدەلدى. ولاردى تۇرعىن ۇيمەن قامتاماسىز ەتۋدىڭ جالپى اۋدانى 101 240 شارشى مەتردى قۇرادى.
قازىر بانكتىڭ نەسيە پورتفەلى 3,83 تريلليون تەڭگەنى قۇرايدى, بۇل ەلدەگى جالپى يپوتەكالىق پورتفەلدىڭ 51%-نا تەڭ. بانك قازاقستانداعى ەكونوميكالىق تۇرعىدان بەلسەندى حالىقتىڭ 32,9%-نا قىزمەت كورسەتەدى. ول اكتيۆتەرى مەن مەنشىكتى كاپيتالى بويىنشا ەكىنشى دەڭگەيلى بانكتەر اراسىندا ءتورتىنشى ورىندا تۇر, جالپى نەسيە پورتفەلى – 3,8 تريلليون تەڭگە.
2025 جىلعى 1 قاراشاداعى مالىمەت بويىنشا, بانك ونىمدەرىنىڭ ارقاسىندا 62 363 قازاقستاندىق وتباسى قولجەتىمدى نەسيە الىپ, جاڭا باسپاناعا قونىستاندى.
بانك تۇراقتى قارجىلاندىرۋ پورتفەلىن بەلسەندى تۇردە دامىتىپ كەلەدى: «جاسىل» يپوتەكانىڭ ۇلەسى 0,9%-عا (30,7 ملرد تەڭگە) دەيىن ءوستى, ال الەۋمەتتىك يپوتەكالىق باعدارلامالار پورتفەلدىڭ 39%-ىن قۇرايدى.
بانكتىڭ نەگىزگى ونىمدەرىنىڭ قاتارىندا – «ناۋرىز» باعدارلاماسى مەن «ناۋرىز جۇمىسكەر» باعىتى, «ديپلوممەن – اۋىلعا» جوباسى, سونداي-اق, جەڭىلدەتىلگەن مەملەكەتتىك باعدارلامالار, وڭىرلىك جانە كورپوراتيۆتىك جوبالار بار. ولاردىڭ بارلىعى جاس وتباسىلاردى, زاۋىت پەن كاسىپورىن قىزمەتكەرلەرىن, اۋىل تۇرعىندارىن جانە الەۋمەتتىك وسال توپ وكىلدەرىن قولداۋعا باعىتتالعان.
Sustainable Fitch ساراپشىلارى بانكتىڭ تاۋەكەلدەردى باسقارۋ باعىتىنداعى جەتىستىكتەرىن دە اتاپ ءوتتى: ESG فاكتورلارى تاۋەكەل-مەنەدجمەنت جۇيەسىنە ەنگىزىلگەن, ال كليماتتىق تاۋەكەلدەر سترەسس-تەست جانە ستسەناريلىك تالداۋ ارقىلى باعالانادى. اگەنتتىكتىڭ ەسەبىندە وتباسى بانك «جاقسى دەڭگەيدەگى كورپوراتيۆتىك باسقارۋعا جانە جوعارى الەۋمەتتىك باعىتقا يە» دەپ كورسەتىلگەن.
وڭ فاكتورلاردىڭ قاتارىندا گەندەرلىك تەڭگەرىم اتالىپ ءوتتى: بانك قىزمەتكەرلەرىنىڭ 58%-ىن ايەلدەر قۇرايدى, سونداي-اق, كليەنتتەردىڭ قاناعاتتانۋ دەڭگەيى جوعارى.
