تۋىندىلارىنىڭ باسىم كوپشىلىگى, بالكىم تۇگەلگە جۋىعى اۋىل, اۋىل تۇرعىندارى. قارسى الدىمنان جەر وشاقتىڭ باسىندا وتىرعان, ۇستىنە قامزول كيگەن, جۇزىنەن مەيىرىم توگىلگەن اجە بەينەسى جارق ەتتى. قۇتتى ءوزىمنىڭ اجەم ءتارىزدى. ماڭدايىنداعى تارام-تارام اجىمدەرى دە ۇقسايدى ەكەن. مەنىڭ اجەم دە وسىنداي ادەمى ەدى. ال مىناۋ شەتسىز-شەكسىز دالا, كوكورايلى شالعىن. سۋرەتتەن دالانىڭ بەينەسى عانا ەمەس, اۋاسىن دا سەزىپ تۇرعاندايسىڭ. يبراگيم يسا اۋىلدا تۇرادى. اۋىلدا ءوسىپ-ونگەن. بالكىم سودان با ەكەن, اۋىل تىنىسى وڭ جامباسىنا كەلەتىن تاقىرىپ.
دالاداعى تاريح سوقپاقتارى. ءباھادۇر بابالار, ەل قورعاعان ەرلىك ىستەرى.
– مەنىڭ بالا كەزىمدە اۋىلدا كوكىرەگى قازىناعا تولعان قارتتار كوپ ەدى. جينالا قالعاندا ەرلىك تۋرالى ەسىلىپ اڭگىمە ايتاتىن. سول ساتتە باتىرلاردىڭ بەينەسى كوز الدىما كەلەتىن. كەيىن باتىرلار جىرىن جاتتاپ وستىك. بالكىم سودان با ەكەن, وسى تاقىرىپ مەنىڭ جۇمىسىمنىڭ تەمىرقازىعىنا اينالدى, – دەيدى سۋرەتشىنىڭ ءوزى, – ىلكى زامانداعى ەرلەردىڭ ەرلىك ىستەرى قاتتى قىزىقتىراتىن. كەيىنگى ۇرپاقتى سۋرەت تىلىمەن تاربيەلەۋ ءۇشىن دە جۇمىس ىستەپ ءجۇرمىن.
كەنەپتىڭ بەتىنە حالقىنىڭ قامىن ويلاعان, جەرىنىڭ تۇتاستىعى ءۇشىن جانىن قيعان باتىر اتالارىنىڭ بەينەسىن ءتۇسىرىپتى. شەت-شەگى جوق, كەڭ جازيرا دالا. اۋىزدىعىمەن الىسقان, ليرو-ەپوستىق جىرلاردا ايتىلارداي التى ايشىلىق جەردى التى-اق رەت اتتايتىن قازمويىن تۇلپارلار. تۇلپار ۇستىندە تورعاي كوزدى اق ساۋىت كيگەن, قىلىشىن كوككە بىلەگەن ءاپايتوس باتىرلار.
توعىزىنشى سىنىپ وقىپ جۇرگەن كەزىندە اۋىلعا اتى اڭىزعا اينالعان باتىر اعاسى راقىمجان قوشقارباەۆ كەلگەن. قىزىلسايا اۋىلىنىڭ ەڭكەيگەن كارىسىنەن ەڭبەكتەگەن بالاسىنا دەيىن رەيحستاگتىڭ توبەسىنە اتويلاتىپ قىزىل تۋ قاداعان حاس باتىرمەن كەزدەسۋگە جينالعان. قيالىنداعى شالت قيمىلدى, شاپشاڭ مىنەزدى ىلكىدەگى باتىرلارعا ۇقساتۋعا تىرىسقان. باتىر دەگەنىڭ كەۋدەسى ەسىكتەي, بالتىرى بەسىكتەي, ءداۋ بولۋعا ءتيىستى. راقىمجان اعا بارىنشا قاراپايىم, سىپايى ەكەن. كەۋدەسىن سوعىپ, مەن سويتكەنمىن دەپ ماقتانعان دا جوق. جانعا جاعىمدى, سامال جەلدەي ەسكەن, تىڭداعاننىڭ جانىن ەرىكسىز باۋرايتىن قوڭىر ۇنمەن مايدان تۋرالى بايانداعان. وزىنەن گورى وزگەنى كوپ ايتتى. قارۋلاستارىنىڭ قاھارمان ەرلىگىنە ءسۇيسىندى.
مىنە, سول ساتتەن باستاپ بولاشاق سۋرەتشىنىڭ مايدان تاقىرىبىنداعى سۋرەتتەرى سالىنا باستادى دەسە بولعانداي. العاشقى سۋرەتى «رەيحستاگ» دەپ اتالدى. قۇزعىندار ۇياسىنىڭ قاۋساي قيراعان ءساتى. تورتكۇل دۇنيە تاعاتسىزدانا توسقان جەڭىستىڭ اتويلاعان كورىنىسى. سودان باستاپ ءبىر ادەمى قيال العا قاراي جەتەلەدى دە وتىردى. كۇنى كەشە قان مايداندا تۋعان جەردى قورعاۋعا جان الىپ, جان بەرىسكەن ابزال اعالاردىڭ ەرلىك جولىن سيپاتتاسا. تۇلا بويلارىنان پاراسات لەبى, ورلىك پەن باتىرلىقتىڭ سورابى ايقىن اڭعارىلىپ تۇراتىن جامپوز جاۋىنگەرلەردىڭ ماڭگى ولمەس اسىل بەينەسى كەيىنگى ۇرپاقتى ءدال سونداي بيىك مۇراتتارعا جەتەلەسە, عانيبەت ەمەس پە؟
ارقالىق قالاسىنداعى پەداگوگيكالىق ينستيتۋتتىڭ كوركەمسۋرەت فاكۋلتەتىن ءبىتىرىپ, جوعارى وقۋ ورنى باسشىلارىنىڭ تالابى مەن تالانتىنان ءۇمىت كۇتىپ, ينستيتۋتتا وقىتۋشى بولىپ قالدىرعان كەزىندە دە باياعى شوق جۇلدىزداي شاعىن اۋىلدا كوكىرەگىندە تۇتانعان ماقسات-مۇراتتىڭ مازداعان وتى قولامتانىڭ شوعىنداي قىزدىرىپ, شابىتتىڭ شىرايىن شالقىتا تۇسكەن.
يبراگيم سالعان سۋرەتتەر كورەرمەن كوڭىلىنەن شىعاتىنى انىق. اسىرەسە مايدان تاقىرىبىنداعى سۋرەتتەرى. اۋىلداس مايدانگەرلەردىڭ تۇتاس گالەرەياسىن جاساپ شىعىپتى.
كوڭىل تارتارلىق كورمەنىڭ تۇساۋكەسەرىندە سۋرەتشىلەر وداعى اقمولا وبلىستىق فيليالىنىڭ توراعاسى يۋري پوپوۆ, كوكشەتاۋ قالاسىنداعى بالالار كوركەمسۋرەت مەكتەبىنىڭ ديرەكتورى يۋليا جەلوبكوۆالار جينالعان قاۋىمعا ءاربىر سۋرەتتەگى مازمۇن مەن ماعىنانى تاراتا ايتىپ, سۋرەتشىگە تابىس تىلەدى.
كوكشەتاۋ
