ەسكى كولىكتى قابىلداپ, قايتا وڭدەۋ بىلتىر جەلتوقساندا باستالۋى كەرەك ەدى. سول كەزدە جاڭا كولىك الۋ ءۇشىن بەرىلەتىن جەڭىلدىك سەرتيفيكاتىنىڭ قۇنى بەلگىلى بولدى:
- جەڭىل كولىك — 315 000 تەڭگە;
- ميكرواۆتوبۋس — 550 000 تەڭگە;
- اۆتوبۋس — 750 000 تەڭگە;
- سالماعى 12 توننادان اسپايتىن جۇك كولىگى — 550 000 تەڭگە;
- اۋىر جۇك كولىكتەرى — 750 000 تەڭگە;
- تراكتور — 560 000 — 1 ملن تەڭگە;
- كومباين — 1.5 — 2 ملن تەڭگە.
2025 جىل اياقتالايىن دەپ قالدى, كومپانيالار مەن جەكە تۇلعالار ۋتيل الىمىن تولەپ كەلەدى, بىراق ىستەن شىققان كولىكتەردى قابىلداۋ جانە قايتا وڭدەۋ ءالى باستالعان جوق. نەگە؟
ۆەدومستۆو كاسىپكەرلەر قولدانىستان شىققان اۆتوموبيل مەن اۋىلشارۋاشىلىق تەحنيكاسىن قايتا وڭدەۋگە «جاسىل دامۋ» اق-عا بار-جوعى ءۇش وتىنىم جىبەرگەن دەپ جاۋاپ بەردى. وپەراتور ولاردى قۇجاتى دۇرىس ەمەس دەپ قابىلداماعان. مينيسترلىكتىڭ مالىمەتىنشە «جاسىل دامۋ» ازىرگە «قايتا وڭدەۋشىلەردى ىرىكتەپ جاتىر», ياعني ءوتىنىم قابىلداپ جاتىر. بىراق كاسىپكەرلەر ۋتيليزاتسيامەن اينالىسقىسى كەلمەيتىندەي كورىنەدى. سوندىقتان ماشينا قابىلداپ, قايتا وڭدەيتىن زاۋىتتار ناقتى قاشان ىسكە قوسىلاتىنى بەلگىسىز.
ماماندار سەرتيفيكاتتىڭ ناقتى قۇنىن ءالى بەكىتپەدى. ەكولوگيا مينيسترلىگى وكىلدەرىنىڭ ايتۋىنشا باعانى جىل سايىن ناقتى ەسەپتەۋ ءۇشىن ونەركاسىپ مينيسترلىگىنىڭ يندۋستريالىق قىزمەتتى قولداۋ ءبولىمى 2025 جىلعا ارنالعان جوسپارىن ۇسىنۋى كەرەك ەدى. بىراق ونى ىستەمەپتى. 2026 جىلعا ارنالعان جوسپاردى دا جاريالامادى.
سوعان قاراعاندا, بيىل كولىك قابىلدانبايتىن سياقتى. پروتسەسس 2026 جىلى باستالا ما, ۇلكەن سۇراق.
«جاسىل دامۋ» اق-نىڭ قارجىلىق ەسەبىنە سايكەس بىلتىر حالىق 328 978 كولىك پەن اۋىلشارۋاشىلىق تەحنيكاسى ءۇشىن ۋتيل الىمىن تولەگەن. كولىك قۇرالىن ءوندىرۋ مەن يمپورتتان تۇسكەن ۋتيل الىمىنىڭ مولشەرى 269 ملرد 593 ملن تەڭگەنى قۇرادى. ونىڭ ىشىندە 122.7 ملرد تەڭگە قازاقستاندا ماشينا قۇراستىراتىن كاسىپورىندارعا 139 444 اۆتوموبيل مەن اۋىلشارۋاشىلىق تەحنيكاسىن شىعارۋعا جۇمسالدى.
