بۇل تۋرالى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆتىڭ «قازسۋشار» رمك اقتوبە فيليالىنىڭ بيىل اتقارعان ەسەبىن تىڭداۋ كەزىندە بەلگىلى بولدى. قارعالى وزەنى مەن ەرىگەن قار سۋىمەن تولىعىپ, 280 ملن تەكشەمەتر سۋ سىياتىن قارعالى سۋ قويماسى 1975 جىلى پايدالانۋعا بەرىلگەن. نەگىزىنەن اقتوبە قالاسىنداعى وندىرىستىك كاسىپورىنداردى, قالا ىرگەسىندەگى ورمان شارۋاشىلىعى مەكەمەسى مەن باۋ-باقشا ۇجىمدارىن سۋمەن جابدىقتاۋ ءۇشىن تۇرعىزىلعان گيدروتەحنيكالىق نىسانعا 50 جىلدان بەرى كۇردەلى جوندەۋ جۇرگىزىلمەپتى.
«قايتا جاراقتاندىرۋ جۇمىستارى بارىسىندا سۋ قويماسىنىڭ بارلىق قوندىرعىسى مەن جابدىقتارى الماستىرىلادى. سونىمەن قاتار گيدروتەحنيكالىق نىساندى قۋات كوزدەرىمەن جابدىقتاۋ ءۇشىن اينالاسىنا شاعىن سۋ ەلەكتر ستانساسى ورناتىلادى. ودان ارتىلعان ەلەكتر قۋاتى جاقىن ماڭداعى كاسىپكەرلىك نىساندارى مەن ەلدىمەكەندەرگە باعىتتالادى. وڭىرىمىزدەگى سۋ قويمالارىن قايتا جاڭعىرتۋ جۇمىستارى سوڭعى جىلدارى كەزەڭ-كەزەڭىمەن ىسكە اسىرىلا باستادى. بىلتىر ەلەك وزەنى بويىنداعى اقتوبە سۋ قويماسى كۇردەلى جوندەۋدەن ءوتتى. ونىڭ 36 جىلدان بەرى كىدىرىسسىز جۇمىس ىستەپ تۇرعان, بىراق ەسكىرگەن قوندىرعىلارى, شليۋزدەرى قايتا سالىندى. سونداي-اق سازدى سۋ قويماسىندا دا كۇردەلى جوندەۋ جۇمىستارى اياقتالۋعا جاقىن. جوبالاۋ-سمەتالىق قۇجاتتارىنىڭ مەملەكەتتىك ساراپتامادان وتكەنىن كۇتپەي-اق, قارعالى سۋ قويماسىنىڭ اينالاسىن اباتتاندىرۋدى باستاپ كەتتىك. قازىرگى ۋاقىتتا كىرەبەرىس جول تەگىستەلىپ, بەتون قۇيىلىپ جارىق شامدارى اۋىستىرىلىپ, بەينەكامەرالار ورناتىلىپ جاتىر. وسى شارۋانى قاراشا ايىنىڭ سوڭىنا دەيىن اياقتايمىز», دەيدى «قازسۋشار» رمك اقتوبە فيليالىنىڭ ديرەكتورى رينات شاۋەنوۆ.
اقتوبە وبلىسى
