ماقالادا مەملەكەت باسشىسى قازاقستان مەن رەسەيدىڭ وداقتاس مەملەكەت جانە ستراتەگيالىق سەرىكتەس ەكەنىن, تاريحتىڭ ءوزى ءبىزدىڭ ماڭگى مىزعىماس دوستىعىمىزدى ايقىنداپ بەرگەنىن ايتادى. پرەزيدەنتتىڭ سوزىنشە, بارلىق سالادا اۋقىمدى ارىپتەستىك, گۋمانيتارلىق سالادا تىعىز ىنتىماقتاستىق ءورىس جايىپ كەلەدى.
ء«بىزدىڭ حالىقتار عاسىرلار بويى بىرگە ءومىر ءسۇرىپ, قۋانىشتى دا, سىناقتى دا بىرگە ءبولىستى, ۇلان-عايىر ەۋرازيا كەڭىستىگىندە ورتاق مادەني ءورىس قالىپتاستىردى. ءبىزدى ورتاق ءداستۇرلى قۇندىلىقتارعا دەگەن كوزقاراس, قازىرگى زاماننىڭ وزەكتى ماسەلەلەرىنە قاتىستى ۇقساس ۇستانىم جانە باۋىرلاس حالىقتاردىڭ يگىلىگى ءۇشىن بىرلەسىپ اتقارىپ جاتقان ەڭبەگىمىز بىرىكتىرەدى. وسى بەرىك ىرگەتاسقا سۇيەنە وتىرىپ, ءبىز تاريحىمىزعا, مادەنيەتىمىزگە جانە داستۇرلەرىمىزگە ءوزارا قۇرمەت تانىتا وتىرىپ, كوپقىرلى ىنتىماقتاستىق جولىمەن سەنىمدى تۇردە العا باسىپ كەلەمىز.
تاۋەلسىزدىك العان ساتتەن باستاپ قازاقستان رەسەيمەن دوستىق قاتىناستاردى دامىتۋعا ايرىقشا ءمان بەرىپ كەلەدى. ەلدىڭ العاشقى سىرتقى ساياسات تۇجىرىمداماسىندا, سونداي-اق كەيىنگى ۇقساس قۇجاتتاردا رەسەي باعىتى تۇراقتى باسىمدىق رەتىندە ايقىندالدى. 1992 جىلى ماڭگىلىك دوستىق, ىنتىماقتاستىق جانە ءوزارا كومەك تۋرالى العاشقى شارتقا قول قويىلدى. بۇل قۇجات مەملەكەتارالىق قاتىناستاردىڭ بەرىك نەگىزىن قالاپ, حالىقتارىمىزدىڭ سانالى تاڭداۋىن بەينەلەگەن سيمۆولعا اينالدى. سودان بەرى الەمدە دە, پوستكەڭەستىك كەڭىستىكتە دە كوپ نارسە وزگەردى. الايدا سول شارت ماتىنىندە ايتىلعان باستى قاعيدا وزەكتىلىگىن جوعالتقان جوق: ماڭگىلىك دوستىق – جاي تىركەس ەمەس, ول ءبىزدىڭ حالىقتاردىڭ قازىرگى جانە بولاشاق كۇردەلى دە كوپقىرلى شىنايىلىعىن فيلوسوفيالىق ءارى ساياسي تۇرعىدان قابىلداۋىنىڭ ءدال كورىنىسى», دەپ اتاپ كورسەتتى پرەزيدەنت.
مەملەكەت باسشىسى قازاقستان مەن رەسەي مازمۇندى دا ساپالى ستراتەگيالىق ارىپتەستىك پەن وداقتاستىق قاتىناس ورناتا الدى دەي كەلە, ماڭگىلىك دوستىقتىڭ ءبىزدىڭ مەملەكەتتەر مەن حالىقتار ءۇشىن باعىت-باعدار بەرەتىن جۇلدىز ىسپەتتى ەكەندىگىن جەتكىزەدى.
