مالىمدەمەدە كورسەتىلگەندەي, دەپۋتات ايتقان ماسەلە بۇعان دەيىن قازاقستان جازۋشىلار وداعى باسقارماسى تاراپىنان بىرنەشە مارتە كوتەرىلگەن, كەيبىرى شەشىمىن تاۋىپ, كەيبىرى جۇيەلى تۇردە جۇزەگە اسىپ جاتىر.
«وسىدان ەكى جىل بۇرىن, 2023 جىلى مەملەكەت باسشىسى قاسىم-جومارت توقاەۆ جازۋشىلار وداعىنىڭ توراعاسى مەرەكە قۇلكەنوۆتى قابىلداعاندا وسى ماسەلەلەرگە نازار اۋدارعان بولاتىن. مەملەكەت باسشىسى جاس اقىن-جازۋشىلاردىڭ شىعارماشىلىعىنا ەرەكشە نازار اۋدارۋ قاجەت ەكەنىن اتاپ ءوتىپ, مەملەكەت تاراپىنان قالامگەرلەردى قولداۋ شارالارى جالعاسا بەرەتىنىن ايتتى. بۇل قولداۋدى جاس قالامگەرلەر بۇگىنگە دەيىن تۇراقتى تۇردە سەزىنىپ كەلەدى. ءسوزىمىزدىڭ دالەلى رەتىندە جىل سايىن بەرىلىپ كەلە جاتقان مەملەكەتتىك «دارىن» جاستار سىيلىعىن, «جاس اقىن-جازۋشىلارعا ارنالعان پرەزيدەنتتىك ارناۋلى ادەبي سىيلىقتى», «ايبوز» ۇلتتىق ادەبي سىيلىعىن ايتساق تا جەتىپ جاتىر.
بۇگىندە وداق پرەزيدەنت اكىمشىلىگىمەن, ۇكىمەتپەن, مادەنيەت جانە اقپارات مينيسترلىگىمەن, وبلىستىق اكىمدىكتەرمەن, سونداي-اق شەت مەملەكەتتەرمەن ءوزارا بىرقاتار ماڭىزدى جوبالاردى جۇزەگە اسىرىپ وتىر. سوندىقتان دا «ۇكىمەتتىڭ قۇزىرلى ورىندارىندا زاماناۋي ادەبيەت پەن مادەنيەتتىڭ ءيىسى مۇرنىنا بارمايتىندار ادەبيەتتى قولداۋدا نەمقۇرايدىلىق پەن شاراسىزدىق تانىتىپ وتىر» دەۋىڭىز – ورىنسىز.
سونىمەن قاتار ءسىزدىڭ «ۇكىمەت پەن ادەبيەت اراسىنداعى مادەني ۇنقاتىسۋدى جۇيەلى ديالوگتىك پلاتفورما رەتىندە بەكىتۋ» دەگەن ۇسىنىسىڭىز دا بىرجاقتى پىكىر سياقتى. سەبەبى قالامگەر قاۋىمى بيلىكپەن ديالوگ جۇرگىزۋمەن ۋاقىت وتكىزسە ادەبيەتتى كىم جاساماق؟
قازاق ادەبيەتىنىڭ بولاشاعى – جاس بۋىندا ەكەنى داۋسىز. سول سەبەپتى, قازاقستان جازۋشىلار وداعى جاس تالانتتاردى قولداۋ مەن ادەبي ۇدەرىستى جاڭا باعىتتا دامىتۋعا باسا نازار اۋدارىپ كەلەدى. اتاپ ايتقاندا, «قازاقستان جازۋشىلار وداعى مۇشەلىگىنە ۇمىتكەر» جوباسى جالعاسىپ, 20 جاسقا دەيىنگى جاستاردى ىنتالاندىرۋ ماقساتىندا ءتۇرلى شىعارماشىلىق بايقاۋلار, شەبەرلىك دارىستەرى مەن ادەبي كەشتەر تۇراقتى تۇردە ۇيىمداستىرىلۋدا. سونىمەن قاتار بالالار ادەبيەتىن دامىتۋ, جاس بۋىننىڭ رۋحاني ءوسۋىن, ولاردى ۇلتتىق قۇندىلىقتار مەن مادەنيەتكە باۋلۋ, بالالارعا ارنالعان شىعارمالاردى ناسيحاتتاۋ, سول ارقىلى جالپى ادەبيەتتىڭ دامۋىنا ۇلەس قوسۋ ماقساتىندا جازۋشىلار وداعى حالىقارالىق «ەرتوستىك» بالالار ادەبي سىيلىعىن تاعايىندادى. بۇل جوبا ەندى تۇراقتى تۇردە ىسكە اساتىن بولادى. بۇعان قوسا, بىلتىر قازاقستان جازۋشىلار وداعىنىڭ ۇيىمداستىرۋىمەن جۇزەگە اسقان «الماتىنىڭ جاس جازۋشىسى» جوباسىن ەندىگى جىلدان باستاپ وقۋ-اعارتۋ مينيسترلىگىنىڭ قولداۋىمەن بۇكىل قازاقستان اۋماعىندا «قازاقستاننىڭ جاس جازۋشىسى»اتاۋىمەن وتكىزۋ جوسپارلانىپ وتىر. مەكتەپ جاسىنداعى جاس تالانتتاردى مەكتەپ قابىرعاسىنان ادەبيەتكە باۋلۋ ءبىزدىڭ قاسيەتتى بورىشىمىز», دەلىنگەن وداق مالىمدەمەسىندە.
وداق جۇزەگە اسىرىلىپ جاتقان بىرنەشە جوبانى اتاي كەلە, دەپۋتاتتىق ساۋالدا كوتەرىلگەن قازاق ادەبيەتىنىڭ كەلەشەگىنە قاتىستى ماسەلەلەر – قازاقستان جازۋشىلار وداعىنىڭ كۇن تارتىبىندەگى باستى باعىتتارمەن, اتقارىلعان, اتقارىلىپ جاتقان جۇمىستارمەن تولىق ۇندەسەتىندىگىن ايتادى.
