مينيسترلىك تسيفرلىق سالا ماماندارىن كاسىبي مەرەكەلەرى – تسيفرلاندىرۋ كۇنىمەن قۇتتىقتاپ, وسى باعىتتاعى قىسقاشا ناتيجەلەرىن جاريالادى.
مينيسترلىك مالىمەتىنە سايكەس, قازىر قازاقستانداعى IT سالاسىندا 200 مىڭنان استام ادام جۇمىس ىستەيدى, ولاردىڭ شامامەن 20 مىڭى جي سالاسىنىڭ ماماندارى. كەلەسى بەس جىلدا مينيسترلىك 1 ميلليون ادامدى IT جانە جي سالاسىنا ۇيرەتۋدى كوزدەپ وتىر.
«قازىرگى تاڭدا ءبىز Tech Orda ءبىلىم بەرۋ باعدارلاماسىن ىسكە اسىرۋدامىز. بۇل باعدارلاما اياسىندا 9 037 مامان IT داعدىلارىنا دايىندالدى. وقىتۋ باعدارلامالارى ونلاين جانە وفلاين فورماتتا جۇرگىزىلەدى, كەڭ اۋديتورياعا جانە تاجىريبەلى ماماندارعا ارنالعان (Tomorrow School, AI’Preneurs, AI-People Bootcamp, AI Quest 1.0). قازىرگى ۋاقىتتا 12–18 جاس ارالىعىنداعى جاسوسپىرىمدەرگە ارنالعان TUMO شىعارماشىلىق تەحنولوگيالار ورتالىعىندا وقۋعا ىرىكتەۋ جۇرگىزىلىپ جاتىر. بالالار انيماتسيا, باعدارلامالاۋ, 3D-گرافيكا جانە گەنەراتيۆتى جي سالالارىندا تەگىن وقي الادى. ستۋدەنتتەر مەن جاستار ءۇشىن Tomorrow School – قازاقستانداعى العاشقى جي مەكتەبى جۇمىس ىستەيدى. مەملەكەتتىك قىزمەتشىلەرگە ارنالعان AI Qyzmet باعدارلاماسى ىسكە قوسىلدى, ول جي-دى ەتيكالىق جانە ءتيىمدى تۇردە مەملەكەتتىك باسقارۋعا ەنگىزۋگە باعىتتالعان. قازىرگى ۋاقىتتا باعدارلاما بويىنشا شامامەن 50 مىڭ مەملەكەتتىك قىزمەتشى وقىتىلدى. QazCoders باعدارلاماسى, ءباا-پەن سەرىكتەستىك نەگىزىندە, باعدارلامالاۋ جانە جي بويىنشا كۋرستاردى جاسقا قاراماستان ۇسىنادى. سونىمەن قاتار MIT-پەن سەرىكتەستىك اياسىندا مەكتەپ باعدارلاماسىنا جي ەنگىزۋ باستالدى, باستاپقىدا 1-4 سىنىپتاردا, كەيىنگى جىلدارى 12 سىنىپقا دەيىن كەڭەيتىلەدى», دەلىنگەن حابارلامادا.
مينيسترلىك اتاپ وتكەندەي, 2025 جىل قازاقستان ءۇشىن تسيفرلاندىرۋ جانە جاساندى ينتەللەكت سالاسىندا ماڭىزدى جىل بولدى. سول جىلى Alem.Cloud ۇلتتىق سۋپەركومپيۋتەر كلاستەرى قۇرىلىپ, ەكزاسكەيل ەسەپتەۋلەر مەن ۇلتتىق جي مودەلدەرىن قولداۋدى قامتاماسىز ەتتى. قازاقستان NVIDIA جانە Freedom Holding Corp سياقتى الەمدىك ءىرى كومپانيالارمەن سۋۆەرەندى AI Hub قۇرۋ تۋرالى كەلىسىمگە قول قويدى. بۇل كەلىسىم ەلدىڭ ەسەپتەۋ قۋاتىن قامتاماسىز ەتىپ, ونى جي ايماقتىق ورتالىعى رەتىندە نىعايتادى.
سونىمەن قاتار, International AI Center alem.ai اشىلدى. بۇل – زەرتتەۋ زەرتحانالارى, AI Academy, TUMO School جانە Tomorrow School ورتالىقتارىن بىرىكتىرەتىن ەكوجۇيە. بۇل جەردە جاس ينجەنەرلەر, زەرتتەۋشىلەر جانە كاسىپكەرلەر وقىپ, جۇمىس ىستەيدى. 2025 جىلى Amazon Kuiper سپۋتنيكتىك ينتەرنەتى ىسكە قوسىلدى, سونداي-اق قازاقستان نارىعىنا Starkink جانە One-Web سپۋتنيكتىك ينتەرنەتى ەندى. بۇل جوبالار شالعاي اۋىل مەكتەپتەرى مەن تۇرعىندارعا جوعارى جىلدامدىقتى ينتەرنەت قامتاماسىز ەتەدى. Generation Nation باستاماسى جۇزدەگەن مىڭ مەكتەپ وقۋشىلارى مەن ستۋدەنتتەردى جي, روبوتوتەحنيكا جانە باعدارلامالاۋ سالالارىن وقىتۋعا تارتتى. سونىمەن قاتار, قازاقستان Cisco, Groq جانە Joby Aviation كومپانيالارىنىڭ پيلوتتىق جوبالارىنا ايماقتىق الاڭ رەتىندە تاڭدالدى.
ەسكە سالساق, Astana Hub وسىعان دەيىن 7 جىلدىعىن اتاپ ءوتتى. بۇل ۋاقىت ىشىندە كلاستەر قازاقستان مەن ورتالىق ازياداعى IT يندۋسترياسىن دامىتۋ ورتالىعىنا اينالدى. قاتىسۋشىلار سانى 1 875-كە جەتىپ, ولاردىڭ 470-ءى شەتەلدىك قاتىسۋمەن جۇمىس ىستەيدى. قاتىسۋشىلارعا سالىقتىق جەڭىلدىكتەر, جەڭىلدەتىلگەن ەڭبەك جانە ۆيزا رەجيمدەرى, ينفراقۇرىلىم جانە حالىقارالىق ىنتىماقتاستىق مۇمكىندىكتەرى بەرىلەدى. 2019 جىلدان بەرى قاتىسۋشىلاردىڭ جالپى تابىسى 4,3 ملرد دوللار, ال 2025 جىلى IT قىزمەت كورسەتۋ ەكسپورتى 1,5 ملرد دوللاردان استام بولادى. 7 جىل ىشىندە Astana Hub ستارتاپتارى 840 ملن دوللاردان استام ينۆەستيتسيا تارتقان.
«بۇگىنگى تاڭدا مەملەكەتتىك قىزمەتتەردىڭ 90%-دان استامى ونلاين فورماتتا كورسەتىلەدى. eGov, Smart Data Ukimet, Digital ID جانە Alem.AI پلاتفورمالارى مىڭداعان ماماندارعا قولداۋ كورسەتىپ, ءار قىزمەتتى ىڭعايلى, قولجەتىمدى جانە قاۋىپسىز ەتەدى. مينيسترلىك تسيفرلىق سەرۆيستەردى قولداعان بارشا ماماندارعا العىس ايتادى», دەپ قورىتىندىلادى ۆەدومستۆو.
