فوتو: وبلىس اكىمدىگى
وڭىردە ينكليۋزيۆتى ءبىلىم بەرۋدى دامىتۋعا سەرپىن بەرەتىن بالاباقشا ەرەكشە بالالاردىڭ دامۋى مەن تاربيەسىنە قولايلى ورتا قالىپتاستىرۋدى كوزدەيدى. قۇرىلىس اۋماعى 20 172,73 شارشى مەتردى قۇرايدى, جۇمىستار بەلگىلەنگەن جوسپارعا سايكەس جۇرگىزىلىپ جاتىر.
«بالاباقشا جوباسى وزگەشە. جوعارىدان قاراعاندا, گۇل پىشىنىندە سالىنىپ جاتىر, ورتالىق جانە بەس ەكى قاباتتى بلوكتان تۇرادى. قارجىلاندىرۋ جاعىنان ەش ماسەلە جوق. قۇرىلىسشىلار كۇندىز-ءتۇنى مەرزىمىندە تاپسىرۋعا كۇش سالىپ جاتىر», دەدى مەردىگەر كومپانيا «كازسترويپودرياد» جشس وندىرىستىك-تەحنيكالىق ءبولىم ينجەنەرى نۇرسۇلتان قالدىمۇراتوۆ.
وبلىس اكىمدىگىنىڭ مالىمەتىنشە, ءار بلوك ورتالىق اتريۋممەن وتكەلدەر ارقىلى بايلانىسادى. ورتالىق بولىككە قىسقى باق پەن كىرەبەرىس ۆەستيبيۋل ورنالاستىرىلادى. ال جەكە بلوكتاردا ءتۇرلى باعىتتاعى بالالارعا ارنالعان بولىمدەر بولادى: №1 بلوك – تىرەك-قيمىل اپپاراتى بۇزىلعان بالالارعا; №2 بلوك – كورۋ قابىلەتى بۇزىلعان بالالارعا; №3 بلوك – ەستۋ جانە سويلەۋ قابىلەتى بۇزىلعان بالالارعا; №4 بلوك – زياتكەرلىك دامۋىندا ەرەكشەلىگى بار بالالارعا ارنالعان. سونىمەن قاتار, مەديتسينالىق ءبولىم, يزولياتور, اكت زالى, باسسەين, اكىمشىلىك جانە اسحانا بولمەلەرى ورنالاسادى.
ەسكە سالايىق, اقتوبە وبلىسىندا 423 ەرەكشە بالا بالاباقشاعا مۇقتاج. جۋىردا «جۇلدىز» ارنايى بالاباقشاسى جۇمىسىن باستاپ, 136 ەرەكشە بالا قامتىلدى.
«بۇل – ەرەكشە بالالار ءۇشىن ۇلكەن مۇمكىندىك. مۇنداي زاماناۋي ءارى بەيىمدەلگەن مەكەمەلەردىڭ سالىنۋى – ولاردىڭ قوعامعا تولىققاندى ارالاسۋىنا جاعداي جاسايدى. مەملەكەت باسشىسىنىڭ تاپسىرماسىنا سايكەس, ءبىز وڭىردە ينكليۋزيۆتى ءبىلىم بەرۋ ينفراقۇرىلىمىن جۇيەلى تۇردە دامىتامىز», دەيدى اقتوبە وبلىسىنىڭ اكىمى اسحات شاحاروۆ.
