سۋرەتتەردى تۇسىرگەندەر – ا.دۇيسەنباەۆ, ە.ۇكىباەۆ
كوممەرتسيالىق كەلىسىمدەر سوماسى 17 ملرد دوللاردان اسادى
قاسىم-جومارت توقاەۆ دونالد ترامپتىڭ پرەزيدەنتتىك لاۋازىمىنىڭ تاريحي سيپاتىنا توقتالىپ, ونىڭ باسشىلىعىمەن اقش الەمنىڭ جەتەكشى ەكونوميكالىق, ساياسي جانە تەحنولوگيالىق دەرجاۆاسى رەتىندەگى پوزيتسياسىن كۇشەيتىپ كەلە جاتقانىن اتاپ ءوتتى.
قازاقستان پرەزيدەنتىنىڭ ايتۋىنشا, امەريكا كوشباسشىسى جەر ءجۇزىنىڭ قاۋىپسىزدىگىن, تۇراقتىلىعى مەن وركەندەۋىن قامتاماسىز ەتۋدە شەشۋشى ءرول اتقارادى.
مەملەكەت باسشىسى قازاقستان اقش پرەزيدەنتىنىڭ بىتىمگەرلىك باستامالارىن تولىق قولدايتىنىن جەتكىزدى. سونىڭ ىشىندە كەلەشەكتە ورتا ءدالىزدى ودان ءارى دامىتۋعا ىقپال ەتەتىن «ترامپتىڭ حالىقارالىق بەيبىتشىلىك جانە وركەندەۋ جولىنا» (TRIPP) ەرەكشە نازار اۋداردى.
دونالد ترامپ اقش-تىڭ قازاقستانمەن كوپجوسپارلى كەڭەيتىلگەن ستراتەگيالىق سەرىكتەستىكتى دامىتۋعا نيەتتى ەكەنىن راستادى.
ساپار اياسىندا قازاقستان مەن قۇراما شتاتتارى اراسىندا جالپى سوماسى 17 ملرد دوللاردان اساتىن كوممەرتسيالىق كەلىسىمدەرگە قول قويىلدى.
اڭگىمەلەسۋ بارىسىندا ەكىجاقتى ىقپالداستىقتىڭ كەڭ كولەمدەگى ماسەلەلەرى جان-جاقتى تالقىلاندى, ءوزارا ءتيىمدى ىنتىماقتاستىقتىڭ كەلەشەگى زور باعىتتارى ناقتىلاندى.
سونىمەن قاتار پرەزيدەنتتەر حالىقارالىق كۇن ءتارتىبىنىڭ وزەكتى ماسەلەلەرى جونىندە پىكىر الماستى.
كەلەلى كەلىسىمگە قوسىلۋ
اق ۇيدەگى كەزدەسۋ بارىسىندا قازاقستان مەن اقش پرەزيدەنتتەرى يزرايل پرەمەر-ءمينيسترى بەنيامين نەتانياحۋمەن تەلەفون ارقىلى سويلەستى. قازاقستان رەسپۋبليكاسىنىڭ يبراھيم كەلىسىمدەرىنە قوسىلۋى اڭگىمەلەسۋدىڭ ارقاۋى بولدى.
مەملەكەت باسشىسى پرەزيدەنت ترامپتىڭ تاياۋ شىعىستا بەيبىت ءومىر ورناتۋعا ناقتى العىشارتتار جاساپ, كوپشىلىك كۇمانمەن قاراسا دا, ەلەۋلى ناتيجەلەرگە قول جەتكىزگەنىنە نازار اۋداردى.
يبراھيم كەلىسىمدەرىنە قوسىلۋ ارقىلى قازاقستان قاقتىعىستى ەڭسەرۋگە, ديالوگتى ىلگەرىلەتۋگە جانە بۇۇ جارعىسى نەگىزىندەگى حالىقارالىق قۇقىقتى قولداۋعا ۇلەس قوسادى.
قازاقستاننىڭ بۇل شەشىمى ەشبىر مەملەكەتپەن ەكىجاقتى قاتىناستارداعى مىندەتتەمەلەرىنە نۇقسان كەلتىرمەيدى. بۇل – بەيبىتشىلىك پەن قاۋىپسىزدىكتى نىعايتۋدى كوزدەگەن كوپجاقتى ديپلوماتيانىڭ زاڭدى جالعاسى ءارى ناقتى كورىنىسى.
اقش پرەزيدەنتى دونالد ترامپ قازاقستاننىڭ يبراھيم كەلىسىمدەرىنە قوسىلۋ تۋرالى شەشىمىن جوعارى باعالاپ, بۇل قادام وزگە ەلدەردى اتالعان باستامانى قولداۋعا ۇندەيتىنىن اتاپ ءوتتى.
– بۇل – بۇكىل الەمدە ىنتىماقتاستىق ورناتۋدا ايتارلىقتاي العا ىلگەرىلەۋ. بۇگىندە كوپتەگەن ەل يبراھيم كەلىسىمى ارقىلى بەيبىتشىلىك پەن وركەندەۋ جولىن تاڭداپ وتىر, – دەدى دونالد ترامپ.
