اسا باي تاريحى مەن ءداستۇرى بار ۇجىم بۇل مەرەيلى داتانى باس قالا تورىندە اتاپ ءوتۋدى ءجون كورىپتى. مەرەيتويلىق كەش تەاتردىڭ نەگىزىن قالاعان تۇلعا ناتاليا ساتستىڭ شىعارماشىلىق مۇراسىنا تاعزىم ەتۋگە ارنالدى. اڭىزعا اينالعان ۇجىمدى مەرەيتويىمەن مەملەكەت باسشىسى قاسىم-جومارت توقاەۆ قۇتتىقتادى. پرەزيدەنتتىڭ قۇتتىقتاۋ حاتىن مادەنيەت جانە اقپارات ءمينيسترى ايدا بالاەۆا وقىپ بەردى.
«سىزدەردىڭ سان قىرلى شىعارماشىلىقتارىڭىز ەلىمىزدىڭ مادەني دامۋىنا, قوعامىمىزدا جاسامپازدىق پەن گۋمانيزم قۇندىلىقتارىنىڭ ورنىعۋىنا ايرىقشا ۇلەس قوسىپ كەلەدى. مەملەكەت تەاتردى مادەنيەت وشاعى, ونەر مەن ادامعا ادال قىزمەت ەتۋدىڭ رۋحاني كەڭىستىگى رەتىندە قابىلدايتىن كوزقاراستارىڭىزدى جوعارى باعالايدى. تەاتردىڭ كەڭ اۋقىمدى قايتا جاڭعىرتىلۋى جاڭا كوركەم يدەيالاردى جۇزەگە اسىرىپ, كورەرمەن ىقىلاسىنا بولەنەتىن اسەرلى قويىلىمدار جاساۋعا تىڭ مۇمكىندىكتەر اشادى دەپ سەنەمىن. كورەرمەندەردىڭ شىنايى قۋانىشى مەن العىسى سىزدەردى قازاقستان يگىلىگى جولىنداعى جاڭا بيىكتەرگە جەتەلەي بەرسىن. بارشا ۇجىمعا شىعارماشىلىق شابىت, تولايىم تابىس جانە تەاتردىڭ ودان ءارى وركەندەي بەرۋىن تىلەيمىن», – دەلىنگەن پرەزيدەنت قۇتتىقتاۋىندا.
سونىمەن قاتار 7 قاراشا – ۇجىمنىڭ قۇرىلعان كۇنىمەن تۇسپا-تۇس كەلگەن سالتاناتتى كەشتە تەاتر قىزمەتكەرلەرىنە پرەزيدەنت جارلىعىمەن مەملەكەتتىك ناگرادالار تابىس ەتىلدى. اتاپ ايتقاندا, ولەگ گوستەۆ «پاراسات» وردەنىمەن, رايسا لەشەۆا مەن ماقسات ساحي ۇلى «قۇرمەت» وردەنىمەن, ايدار قۇرمانباەۆ, يننا پوروتيكوۆا, مارينا سامبەتباەۆا جانە ارتيوم سەلەزنيوۆ «ەرەن ەڭبەگى ءۇشىن» مەدالىمەن ماراپاتتالدى. سونداي-اق الەكساندر رۋسينوۆيچكە «شاپاعات» مەدالى, اننا كۋزەمباەۆاعا «قازاقستاننىڭ ەڭبەك سىڭىرگەن قايراتكەرى» اتاعى بەرىلدى.
ماراپاتتاردى مەملەكەت باسشىسىنىڭ اتىنان ايدا بالاەۆا تابىس ەتتى.
تەاتردىڭ تاريحى مەن ءداستۇرىن دارىپتەگەن ايتۋلى شارا ودان ءارى SATS ComUnity بالالار ستۋدياسىنىڭ تاربيەلەنۋشىلەرى ساحنالاعان «تاريح حاتتارى» اتتى تەاترلاندىرىلعان مينياتيۋرا كورسەتىلىمىنە ۇلاستى. بۇل قويىلىم – ۇلت پەن ۇرپاق ساباقتاستىعىن, تەاتردىڭ وتكەن جولى مەن بۇگىنگى بيىگىن بەينەلەيتىن كوركەم دۇنيە رەتىندە كوزىقاراقتى تەاترسۇيەر كورەرمەن قاۋىم كوڭىلىنەن ايرىقشا ورىن الدى. بالالاردىڭ جۇرەك جىلۋى مەن تازا پەيىلى ارقىلى ساحناعا شىققان قويىلىم تەاتر تاريحىنا دەگەن قۇرمەت پەن العىستىڭ نىشانىنداي اسەر سىيلادى.
سونداي-اق ەلوردا كورەرمەندەرىنە تەاتردىڭ نەگىزىن قالاۋشىنىڭ ومىرىنە نەگىزدەلگەن «ساتس» سپەكتاكل-رەكونسترۋكتسياسى ۇسىنىلدى. قويىلىمدا قازاقستانداعى العاشقى بالالار مەن جاسوسپىرىمدەر تەاترىنىڭ اشىلۋى قارساڭىنداعى دايىندىق بارىسى بەينەلەنگەن.
ساحنالىق شەشىم مەن رەجيسسەرلىك ىزدەنىس كورەرمەندى وتكەن عاسىردىڭ رۋحىنا جەتەلەي وتىرىپ, ماڭگى جاس ونەردىڭ قۇدىرەتىن سەزىندىردى. قويىلىمدا ناتاليا ساتس ءرولىن قازاقستاننىڭ ەڭبەك سىڭىرگەن ءارتىسى, رەسەيدىڭ «درۋجبا» وردەنىنىڭ كاۆالەرى تاتيانا تارسكايا سومدادى. ال قويىلىم رەجيسسەرى – رەسەيدىڭ «زولوتايا ماسكا» تەاتر سىيلىعىنىڭ لاۋرەاتى گالينا پيانوۆا.
رەجيسسەر اتاپ وتكەندەي, بۇل قويىلىم – ناتاليا يلينيچنا ساتستىڭ شىعارماشىلىق مۇراسىنا قۇرمەت كورسەتۋ اياسىندا ساحناعا شىقتى. ويتكەنى ناتاليا ساتس تەاترىنىڭ 80 جىلدىق مەرەيتويى – تەك ءبىر ۇجىمنىڭ عانا ەمەس, تۇتاس تەاتر ونەرىنىڭ, ماڭگىلىك ساحنا رۋحىنىڭ سالتاناتى.
گالينا پيانوۆا: «بۇل قويىلىم – ناتاليا يلينيچناعا دەگەن سۇيىسپەنشىلىك پەن ءىلتيپاتتىڭ كورىنىسى. ول بالالار تەاترىنىڭ نەگىزىن قالاپ, بىرنەشە بۋىندى تاربيەلەگەن ۇلى تۇلعا», دەسە, باس كەيىپكەر بەينەسىن كەمەلىنە كەلتىرە كەيىپتەگەن اكتريسا تاتيانا تارسكايا: «ول – ۇلى رەجيسسەر, وراسان تالانت يەسى. «تاربيەلەۋ – ادامنىڭ تاعدىرىن شەشۋ» دەگەن ونىڭ ءسوزى – مەنىڭ سۇيىكتى دايەكسوزىم. ساتس ءوز ءومىرىن تەاتر مەن جاس ۇرپاق تاربيەسىنە ارنادى» دەپ تۇلعاعا دەگەن قۇرمەتىن اسەرلەنە اڭگىمەلەدى.
