وتاندىق ءوندىرىستى دامىتۋدا قارلىعاشتىڭ قاناتىمەن سۋ سەپكەندەي سەپتەسىپ, ءورىسىن كەڭەيتىپ وتىرعان قىز-كەلىنشەكتەردىڭ ۇلەسى زور. سولاردىڭ قاتارىندا ءبىر قولىمەن بەسىك تەربەتسە, ەندى بىردە تاتتىلەر ءپىسىرىپ, وتباسىنىڭ تابىسىن ەسەلەۋگە ۇمتىلعان تالعار قالاسىنىڭ تۇرعىنى مالينا قاسىمبەكوۆانىڭ ەسىمى اتالادى. وسىدان ون شاقتى جىل بۇرىن سابيىمەن دەكرەتتىك دەمالىستا وتىرعان جاس انا قوسىمشا تابىس تابۋدى ماقسات ەتىپ ۇيدەن ءتاتتى تورت ءپىسىرىپ, ءبىرلى جارىمىن ساتىلىمعا شىعارىپ كورگەن. ادام دەنساۋلىعىنا زياندى قوسپاسىز جاسالاتىن تازا ءارى تابيعي تاتتىلەرىنە قىزىعۋشىلىق ارتپاسا كەمىمەگەن. ءتىپتى, تاپسىرىس كوبەيىپ, تورت دايىندايتىن اس ءۇي تارلىق ەتكەن. وسىلايشا ءساتتى باستالعان ءىسى ەش كىدىرمەستەن العا جىلجىپ, ۋاقىت وتە كەلە مالينا بۇل ىسكە جۇمىسسىز وتىرعان 2-3 ايەلدى قوسىپ, كاسىبىن كەڭەيتە تۇسەدى. بۇل ىسىنە وتاعاسى قولداۋ ءبىلدىرىپ, اتا-انالارى بالالارىنا قاراسىپ, ىنتىماقتاسا جۇمىس ىستەيدى.
ءۇي ىشىنەن باستالعان كاسىبى قانات جايىپ, بۇگىندە «ماlina desserts» دەگەن اتاۋعا يە برەندتىك ونىمدەرىن تۇتىنۋشىلاردىڭ قاتارى مىڭداپ سانالادى. اۋدان عانا ەمەس, وبلىس كولەمىندە ساۋدا جەلىسىن اشىپ, 7 دۇكەندە ونىمدەرى ساتىلادى. الدا ونىڭ سانىن 10-عا جەتكىزۋ جوسپاردا بار. 100-دەن اسا ادامدى تۇراقتى جۇمىسپەن قامتىپ وتىرعان شاعىن كاسىپورىننىڭ يەسى وتاندىق ءونىمنىڭ ساپالى دا ءوتىمدى بولۋىنا باسا نازار اۋدارىپ, بۇل جولدا تىنىمسىز ىزدەنىپ كەلەدى.
– مەنىڭ ماماندىعىم – قارجىگەر. كونديتەر بولۋدى ويلاماعان ەدىم. قىزىعۋشىلىقپەن باستاعان ءىسىم ىرگەلى كاسىپ اشۋىما تۇرتكى بولدى. تابىس وزدىگىنەن كەلمەيدى. ول ءۇشىن تىنىمسىز ىزدەنىس كەرەك. كاسىبىمىزدى كەڭەيتىپ, كەرەكتى قۇرال-جابدىق الۋدا مەملەكەتتىك قولداۋلارعا يە بولدىق. ءتورت جىلعا جۋىق جالدامالى عيماراتتا جۇمىس ىستەدىك. بىلتىر تالاي جىلدان بەرى قاراۋسىز قالعان ناۋبايحانانى ساتىپ الىپ, قۇرىلىس جۇمىسىن جۇرگىزىپ, كوشىپ كەلدىك. ءسويتىپ, اۋماعى 400 شارشى مەتر عيماراتتا كاسىپورىندى ىسكە قوستىق. جوسپارلى تۇردە جۇمىس جاسايمىز. مىسالى, بيىل تسەحتى جاڭارتۋمەن قاتار, كوفەحانالارداعى تەحنيكالىق قۇرالداردى, مۇزداتقىشتاردى جاڭالادىق, – دەيدى كاسىپكەر مالينا ەرلانقىزى.
شاعىن كاسىپورىن بىرنەشە تسەحقا بولىنگەن. وندا نەگىزىنەن ايەلدەر جۇمىس ىستەيدى. العاشىندا ىدىس جۋعا ورنالاسقان ولاردىڭ كەيبىرى ۋاقىت وتە كەلە, كاسىپكە بەيىمدەلىپ, كونديتەر شەبەرلەرى اتانعان. جۇمىسشىلاردىڭ كوپشىلىگى تسەح ىسكە قوسىلعان كۇننەن باستاپ, تۇراقتى ەڭبەك ەتىپ ءجۇر. ولاردىڭ اراسىندا كوپبالالى انالار دا از ەمەس.
– مەملەكەت باسشىسى قاسىم-جومارت توقاەۆتىڭ بيىلعى جىلدى جۇمىسشى ماماندىقتارى جىلى دەپ جاريالاۋى ەڭبەك ادامدارىنا ۇلكەن سەرپىن بەردى. قاراپايىم جۇمىسشىلاردىڭ مارتەبەسى ءوسىپ, ەڭبەككە دەگەن قۇلشىنىسى ارتقانى انىق. ءبىزدىڭ كاسىپورىن جۇمىسشىلارىنىڭ اراسىندا 10-نان استام كوپبالالى انا جۇمىس ىستەيدى. ولاردىڭ تۇراقتى ەڭبەك ەتىپ, ناپاقاسىن تابۋىنا قولايلى جاعداي جاساۋعا تىرىسامىز. سەبەبى ءوزىمنىڭ دە 5 بالام ءوسىپ كەلەدى. بالانىڭ تۇرمىستا تارشىلىق كورمەۋى – اتا-انا ءۇشىن ماڭىزدى. كوپبالالى انالاردىڭ جۇمىس ۋاقىتى, ءۇي مەن ءتۇزدىڭ تىزگىنىن تەڭ ۇستاۋى ەسكەرىلەدى, – دەگەن كاسىپ يەسىنىڭ ءىستى ۇيلەستىرە بىلۋدەگى شەبەرلىگى كوپكە ۇلگى بولارلىق.
تام-تۇمداپ باستاعان ءىسى ىلگەرىلەپ, ۇزدىكسىز جۇمىس ىستەگەننىڭ ناتيجەسىندە تابىسى دا ارتا تۇسكەنىن الا تارتقان مالينا ەرلانقىزى, بۇگىندە اۋدان كولەمىندەگى الەۋمەتتىك ءىس-شارالارعا قاتىسىپ, مۇقتاجدارعا قولۇشىن بەرۋگە جاراپ جاتقاندارىن قۋانا جەتكىزدى.
ءدامى ءتىل ۇيىرەر ءتاتتى ءونىمنىڭ 50-گە جۋىق ءتۇرىن وندىرەتىن «ماlina desserts»-ءتىڭ تسەحىندا كۇنىنە 150 تورت, 100 ءبالىش, 1000 شاقتى دەسەرت جاسالىپ, تاراتىلادى.
«ەڭبەك ەتسەڭ ەرىنبەي, تويادى قارنىڭ تىلەنبەي», دەپ اقىن اباي جىرلاعانداي, ماڭداي تەرمەن تاپقان نان – ءتاتتى. ءونىم ءوتىمدى بولعان سايىن, تاپسىرىس كوبەيىپ, تابىس تا ەسەلەنە تۇسەدى. سول سەبەپتى اركىم ءوز ىسىنە جوعارى جاۋاپكەرشىلىكپەن قاراپ, مۇقيات اتقارۋعا تىرىسامىز. ادال ەڭبەك ەسكەرۋسىز قالمايدى. بيىل ءوز ءىسىنىڭ شەبەرلەرى لايىقتى باعاسىن الىپ, باسشىلىق تاراپىنان ءتۇرلى سىيلىققا, ماراپاتقا يە بولدىق, – دەپ التى بالانىڭ اناسى شولپان اديشوۆا اعىنان جارىلدى.
ماقتاۋلى جۇمىسشىلاردىڭ كوشىن زەينەت جاسىنداعى ناۋبايشىلار ليۋدميلا حافۋز, ايگۇل دۇكەنباەۆا باستاسا, ولاردىڭ قاتارىن باس كونديتەر اكيزا المەشوۆا نازيرا قاينازاروۆا, سانام ياحياروۆا, شويرا بالتاباەۆا, مافتۋنا بورانوۆا, ماقپال ءالجانوۆا سىندى بەساسپاپ اسپازدار تولىقتىرا تۇسەدى.
ءارتۇرلى ۇلت وكىلىنىڭ باسىن بىرىكتىرىپ, ورتاق ماقساتتا ەڭبەك ەتىپ وتىرعان ۇجىمنىڭ وتاندىق ءوندىرىستى ورىستەتۋگە قوسار ۇلەستەرى ارتا تۇسەرىنە ەش كۇمان جوق.
الماتى وبلىسى
