اڭگىمەنى «قايراتتان» باستايىق. ايدى اسپانعا ءبىر-اق شىعارىپ, اتالعان جارىستىڭ نەگىزگى بولىگىنە قاتىسۋ قۇقىعىنا يە بولعان الماتىلىق ۇجىم ءتورت كەزدەسۋدىڭ ۇشەۋىندە ۇتىلىپ, ءبىر رەت تەڭ ءتۇستى. ارينە, ونداي ناتيجەگە كورەرمەندەردىڭ كوڭىلى تولمادى. دەگەنمەن بۇل «قايراتتىڭ» قارت قۇرلىقتاعى ەڭ بەدەلدى تۋرنيردەگى العاشقى جورىعى ەكەنىن دە ەستەن شىعارماۋ كەرەك.
ونىڭ ۇستىنە, جالپى كەزەڭ ءالى اياقتالعان جوق. جانكۇيەرلەر جارقىن جەڭىستەردەن ءۇمىتتى. ءتىپتى, قازىرگى ناتيجەلەردى دە فۋتبول سۇيەر قاۋىم اۋىر قابىلداپ جاتىر دەۋگە كەلمەيدى. ماسەلەن, كەشەگى «ينتەرگە» قارسى وتكەن ويىن ورازباحتين شاكىرتتەرىنىڭ ەۋروپالىق جوعارى دەڭگەيلى تارتىسقا دايىن ەكەنىن دە اڭعارتتى.
قاراجات تۇرعىسىنان «قايرات» ءبىراز ولجاعا كەنەلدى. ءتورت تۋردان كەيىن كلۋب ەسەپشوتىنا 20,95 ميلليون ەۋرو اۋدارىلدى. بۇل – ۋەفا چەمپيوندار ليگاسىندا قاتىسۋشىلار اراسىنداعى ەڭ تومەنگى كورسەتكىش!
ال ولجاعا مولىنان كەنەلگەن كلۋبتار كوشىن «مانچەستەر سيتي» باستاپ تۇر. اعىلشىنداردىڭ تابىسى – 70,1 ميلليون ەۋرو.
ەكىنشى جانە ءۇشىنشى ورىنداردا – «پسج» (69,99 ملن) مەن «باۆاريا» (69,04 ملن).
وزگە كوماندالاردىڭ تابىسى مىناداي:
«ليۆەرپۋل» – 67,43 ملن,
«رەال مادريد» – 66,35 ملن,
«چەلسي» – 64,40 ملن,
«ارسەنال» – 64,06 ملن,
«بورۋسسيا دورتمۋند» – 60,35 ملن,
«ينتەر» – 59,97 ملن,
«بارسەلونا» – 59,83 ملن,
«بايەر» – 56,25 ملن,
«اتلەتيكو» – 55,63 ملن,
«توتتەنحەم» – 55,20 ملن,
«يۋۆەنتۋس» – 47,82 ملن,
«اينتراح» – 47,52 ملن,
«اتالانتا» – 46,57 ملن,
«مارسەل» – 45,68 ملن,
«موناكو» – 45,56 ملن,
«ۆيلياررەال» – 44,94 ملن,
«بەنفيكا» – 42,81 ملن,
«ناپولي» – 42,71 ملن,
«نيۋكاسل» – 41,26 ملن,
پسۆ – 39,46 ملن.
وزگە كلۋبتار دا ءتاپ-ءتاۋىر تابىسقا يە بولدى. «اياكس» (38,28 ملن), «بريۋگگە» (37,48 ملن), «سپورتينگ» (35,94 ملن), «وليمپياكوس» (34,80 ملن), «اتلەتيك» (31,90 ملن), «بۋدە-گليمت» (31,10), «گالاتاساراي» (31,08 ملن), «كوپەنگاگەن» (30,95 ملن), «سلاۆيا» (28,74 ملن), «كاراباح» (28,40 ملن), «يۋنيون سج» (26,43 ملن) جانە «پافوس» (24,34 ملن) كوماندالارىنىڭ دا قانجىعاسى ءبىرشاما مايلاندى.
«قايرات» كەلەسى كەزدەسۋىن 26 قاراشادا سىرت الاڭدا دانيانىڭ «كوپەنگاگەن» كلۋبىنا قارسى وتكىزەدى.
