مەملەكەت باسشىسىنىڭ تاپسىرماسىنا سايكەس, سۋ رەسۋرستارى جانە يرريگاتسيا مينيسترلىگى سقو-نىڭ 42 اۋىلىن ساپالى اۋىز سۋمەن قامتاماسىز ەتۋ جوبالارىن مەرزىمىنەن بۇرىن اياقتادى.
سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ پەن سولتۇستىك قازاقستان وبلىسىنىڭ اكىمى عاۋەز نۇرمۇحامبەتوۆ ءوڭىردىڭ ءتورت اۋدانىنداعى 22 مىڭ اۋىل تۇرعىنىن تازا اۋىز سۋمەن قامتاماسىز ەتۋگە ارنالعان ءۇش جاڭا سۋ جۇيەسىن ىسكە قوسۋ راسىمىنە قاتىستى.
مينيسترلىك توپتىق سۋ قۇبىرلارىن رەكونسترۋكتسيالاۋ جانە سالۋ بويىنشا ەكى جوبانى جوسپارلانعان مەرزىمنەن 1,5 جىل بۇرىن اياقتادى. تاعى ءبىر جوبا اياقتالۋعا جاقىن.
قازىرگى تاڭدا تايىنشا جانە اقجار اۋداندارىنداعى ەلدى مەكەندەردى ورتالىقتاندىرىلعان سۋمەن جابدىقتاۋ ماقساتىندا بۋلاەۆ توپتىق سۋ قۇبىرىنان سۋ تارتۋ تارماقتارىن سالۋ بويىنشا ەكى جوبا تولىق جۇزەگە اسىرىلدى.
تايىنشا اۋدانىنداعى 13 اۋىلدى اۋىز سۋمەن قامتاماسىز ەتۋ ءۇشىن جالپى ۇزىندىعى 170 شاقىرىم بولاتىن سۋ قۇبىرى مەن سورعى ستانتسياسى سالىندى. قۇرىلىس-مونتاج جۇمىستارى 2025 جىلدىڭ ساۋىرىندە باستالىپ, قازان ايىندا اياقتالدى. ال باستاپقى جوبادا قۇرىلىس مەرزىمى ەكى جىل دەپ جوسپارلانعان بولاتىن.
بۋلاەۆ توپتىق سۋ قۇبىرىنىڭ جاڭا سۋ تارتۋ تارماقتارىنا قوسىلعان تايىنشا اۋدانىنىڭ اۋىلدارى بۇرىن-سوڭدى ورتالىقتاندىرىلعان اۋىز سۋ جۇيەسىنە قوسىلعان ەمەس. بۇعان دەيىن بۇل ەلدى مەكەندەر سۋدى ۇڭعىمالاردان, قۇدىقتار مەن بلوك-مودۋلدەردەن الىپ كەلگەن. ەندى تۇرعىندار سۋدى ۇيلەرىنە تىكەلەي تارتا الادى.
اقجار اۋدانىندا بۋلاەۆ توپتىق سۋ جۇيەسىنەن ۇزىندىعى 123 شاقىرىم بولاتىن سۋ تارتۋ جەلىلەرى سالىندى. بۇل جوبا دا ەكى جىلعا ەسەپتەلگەن ەدى. بۇعان دەيىن بۇل اۋىلداردا دا سۋ ۇڭعىمالار مەن قۇدىقتاردان الىنىپ كەلگەن. الايدا سۋدىڭ ساپاسىنا قاتىستى سۇراقتار بولعاندىقتان جەرگىلىكتى تۇرعىندار ونى تۇرمىستىق ماقساتتا پايدالانا الماعان.
اياقتالۋعا جاقىن تۇرعان ءۇشىنشى جوبا كوكشەتاۋ توپتىق سۋ قۇبىرىنان جالپى ۇزىندىعى 220 شاقىرىم بولاتىن سۋ تارتۋ جەلىلەرىن سالۋدى كوزدەيدى. بۇل جەلىلەر سولتۇستىك قازاقستان وبلىسىنىڭ ايىرتاۋ جانە شال اقىن اۋداندارىنداعى 24 اۋىلدى قامتيدى. قازىرگى تاڭدا مەردىگەر ۇيىم نەگىزگى جۇمىستاردى تولىق ورىنداپ, سۋ قۇبىرلارىن ىسكە قوسۋ جۇمىستارى جۇرگىزىلىپ جاتىر.
بۇل ەلدى مەكەندەر بۇعان دەيىن ورتالىقتاندىرىلعان اۋىز سۋ جۇيەسىنە قوسىلعان ەمەس. سۋ تارتۋ جەلىلەرى سالىنعانعا دەيىن 24 اۋىل دا سۋدى ۇڭعىمالاردان, قۇدىقتار مەن بلوك-مودۋلدەردەن الىپ كەلگەن.
«جاڭا سۋ قۇبىرلارى ساپالى اۋىز سۋدى ۇيلەرگە دەيىن جەتكىزۋگە مۇمكىندىك بەرەدى. بۇل اۋىلداردا مۇنداي جۇيە بۇرىن-سوڭدى بولماعان. سۋ جۇيەلەرىنىڭ قۇرىلىسى اۋىل تۇرعىندارىنىڭ ءومىر ءسۇرۋ ساپاسىن ەداۋىر جاقسارتىپ, كاسىپكەرلىك پەن اۋىل شارۋاشىلىعىن دامىتۋعا نەگىز قالايدى. مەملەكەت باسشىسىنىڭ قازاقستاندىقتاردى اۋىز سۋمەن 100 پايىز قامتاماسىز ەتۋ جونىندەگى تاپسىرماسىن ورىنداۋ ماقساتىندا بيىل بارلىق ءۇش جوبانى اياقتاۋ ءۇشىن قاجەتتى شارالار قابىلداندى. قازىرگى ۋاقىتتا مينيسترلىك 950 مىڭنان استام ادامدى اۋىز سۋمەن قامتۋ ءۇشىن 2,4 مىڭ شاقىرىمنان استام سۋ قۇبىرىن سالۋ جانە رەكونسترۋكتسيالاۋ جۇمىستارىن جۇرگىزىپ جاتىر. سونداي-اق ەلدىڭ 9 وڭىرىندە 29 جوبا جۇزەگە اسىرىلۋدا», دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
