ارال اۋدانىنىڭ ەسكىۇرا اتتى اۋىلىندا دۇنيەگە كەلىپ, كورشىلەس قازالىداعى قوجاباقى ەلدى مەكەنىندە ءوستى. جاستايىنان جامان ادەتتەن اۋلاق ءجۇردى. بىرگە وسكەن قاتارلاستارى اراسىندا دا شىلىم ءتۇتىنىن شيىرىپ, ەسەيە كەلە اششى سۋدىڭ ءدامىن تاتقاندار كوپ ەمەس ەدى. كەرىسىنشە, سول كەزەڭنىڭ بالالارى سپورتقا بەيىم بولىپ ءوسىپتى. ۇيدەگى ازعانتاي مالدى جايعاي سالا مەكتەپكە جۇگىرەتىن. مىرزالى دا اۋىلدا ەركىن كۇرەسپەن اينالىسىپ, ءبىراز جەتىستىككە جەتتى. اسكەرگە بارعاندا دا كۇرەستەن قول ۇزبەي, بوزكىلەمدە تالايدى قاپى قالدىرعان قاعىلەز جىگىت تالايعا ۇلگى بولدى.
ەلگە ورالعان سوڭ ءتۇرلى سالادا ەڭبەك ەتتى. قۇرىلىسشى بولدى, قاراۋىل دا, كۇرىششى دە اتانعان كەزى بار. مۇناي سالاسىندا قىزمەت اتقارعاندا ونىڭ سپورتپەن اينالىسۋعا مۇرشاسى بولماپ ەدى. زەينەتكە شىعا سالىسىمەن مارافونشىلاردىڭ قاتارىنا قوسىلدى. مارافونشى بولۋىنا قۇرداسى باعىسباي بورانباەۆ ىقپال ەتكەنىن ايتادى. قۇرداستىڭ داعدىسىنا قىزىعىپ, ءوزى دە كۇندەلىكتى 10-15 شاقىرىم جۇگىرەتىن جاعدايعا جەتكەن. العاش جۇگىرۋگە شىققانداعى قيىندىققا شىداپ, كوپ ۇزاماي ءوزىنىڭ باياعى سپورتشى قالپىن قايتا تاپقانداي بولدى. وسى ۋاقىتقا دەيىن جۇزدەگەن شاقىرىمدى ارتتا قالدىردى. بىلتىر 42 شاقىرىمدىق مارافوندى 3,5 ساعاتتا جۇگىرىپ ءوتىپ, ەكىنشى ورىن الدى. كەيدە ساناتقا بولىنبەي, جۇگىرۋ جولىنا جاستارمەن بىرگە شىعاتىن كەزدەر بولادى. ەڭ قيىنى وسى. دەگەنمەن دە جاستايىنان جىگەرىن شىڭداۋدىڭ ارقاسىندا مۇنداي جارىستاردا دا كوش سوڭىندا قالعان كەزى جوق.
قازىر قازالىداعى مارافونشىلار ءبىر قاۋىم ەل. ءبىر-بىرىنە قولۇشىن سوزىپ, ەل اۋماعىندا وتەتىن ۇلكەندى-كىشىلى جارىستاردان قالماۋعا تىرىسادى.
– تىرلىكتە تالاي تەپەرىش كورسە دە رۋحى سىنباعان اكەمىز جامان ادەتتەن بويىمىزدى اۋلاق سالۋدى, ادالدىقتان اۋىتقىماۋدى ءۇنسىز عانا ۇيرەتىپ كەلەدى. ۇزاق جىلعى بەينەتتەن كەيىن سەرگەكتىكتىڭ سوقپاعىن تاڭداعان اكەم اينالاسىنا دا سىيلى. زەينەتاقىسىنان اقشا ۇنەمدەپ, ەل اۋماعىندا وتەتىن جارىستارعا تالماي قاتىسىپ ءجۇر. ءبىراز سايىسقا ەركەبۇلان باۋبەكوۆ دەگەن ازاماتتىڭ قولداۋىمەن باردى. كەيدە ناۋقاستانىپ قالعان انام مارالعا قارايلاپ, جارىستان باس تارتاتىنى بار. قان قىسىمىمەن قۇلاعان انام دا جاتتىعۋدىڭ ارقاسىندا قايتا تىكتەلىپ, قاتارعا قوسىلدى. ەلىمىزدىڭ قاي تۇكپىرىندە دە مارافونشىلار اكەمنىڭ توزىمدىلىگىنە تاڭعالادى, – دەيدى ۇلى قادىربەك.
قازىردە مارافونشىلاردى قولداۋعا كوڭىل بولەتىندەر كەمدە-كەم. جارىستىڭ بارىنە وزدەرى قارجى تابادى. قوسىمشا جۇمىس ىستەپ, مارافون الدىندا وزدەرىنشە قام جاسايتىنى بار. ءسويتىپ ءجۇرىپ ەلىمىزدىڭ ءبىراز وڭىرىندە ۇيىمداستىرىلعان جارىستارعا قاتىستى.
– بىلتىر شىمكەنتتە وتكەن مارافوندى ۇمىتپايمىن. مارەگە جاقىن قالعاندا جاس كەزىمدە كۇرەستە سىندىرىپ العان اياعىم سىر بەرىپ, جۇگىرۋ قيىنداي ءتۇستى. سوندا دا شىداپ, الدىما ءبىر ادامدى سالىپ, ەكىنشى بولىپ جەتتىم. بيىل دا سول قالادا وتكەن جارىستان بۇيىرعانى 4-ورىن بولدى. جارىس جولىنا تۇرسام بولدى, كوپتەن بەرى مازالاپ جۇرگەن دەنساۋلىعىم ساپ باسىلا قويادى. جۇرت دەرتىنە داۋا ىزدەپ, اۋرۋحانا مەن ءدارىحانا جاعالاسا, مەن جۇگىرۋگە اسىعامىن, – دەيدى م.مەڭدىباەۆ.
جاقىندا عانا تۇركىستاندا وتكەن مارافونعا قاتىسىپ, 10 شاقىرىمدى ەركىن جۇگىرىپ ءوتتى. مارەگە جاقىنداعاندا ەكىنشى تىنىسى اشىلعانداي كۇي كەشتى. 66 جاستاعى مارافونشى ءومىرىنىڭ مانىنە اينالعان جارىس جولى الداعى ۋاقىتتا دا جالعاساتىنىنا بەك سەنىمدى.
قىزىلوردا وبلىسى,
قازالى اۋدانى
