فوتو: ۇكىمەتتىڭ ءباسپاسوز قىزمەتى
كەزدەسۋ بارىسىندا ۇكىمەت باسشىسى مەملەكەت باسشىسى قاسىم-جومارت توقاەۆتىڭ اقش-پەن ستراتەگيالىق سەرىكتەستىكتى نىعايتۋعا ايرىقشا ءمان بەرەتىنىن اتاپ ءوتتى. ول بۇل كەلىسسوزدەر ەكىجاقتى ىنتىماقتاستىقتىڭ الەۋەتىن تولىق ىسكە اسىرۋعا مۇمكىندىك بەرەتىن ماڭىزدى قادام ەكەنىن ايتتى.
قازاقستان ۇكىمەتى شەتەلدىك, ونىڭ ىشىندە امەريكالىق ينۆەستورلار ءۇشىن دە قولايلى جاعدايلار قالىپتاستىرۋعا باعىتتالعان جۇيەلى رەفورمالاردى جالعاستىرىپ كەلەدى. قر ۇلتتىق بانكىنىڭ دەرەگىنشە, 1993 جىلدان بەرى اقش-تان تارتىلعان تىكەلەي ينۆەستيتسيالار كولەمى $61,2 ملرد-تان استى, بۇل ەلدەگى جالپى تشي-ءدىڭ 13 پايىزىنان كوپ. سوڭعى بەس جىلدا ءوزارا ساۋدا اينالىمى ەكى ەسەلەنىپ, $4,2 ملرد-قا جەتكەن.
تاراپتار ونەركاسىپ, ەنەرگەتيكا, اۋىل شارۋاشىلىعى, كولىك-لوگيستيكا جانە تسيفرلىق تەحنولوگيالار سالالارىنداعى ءوزارا ءىس-قيمىلدى كەڭەيتۋ جولدارىن قاراستىردى.
سونىمەن قاتار, ەكى ەل اراسىنداعى ىنتىماقتاستىقتى دامىتۋ پەرسپەكتيۆالارى تۋرالى پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين, ساۋدا جانە ينتەگراتسيا ءمينيسترى ارمان شاققاليەۆ, ەنەرگەتيكا ءمينيسترى ەرلان اقكەنجەنوۆ, كولىك ءمينيسترى نۇرلان ساۋرانباەۆتار بايانداما جاسادى.
كولىك-ترانزيت سالاسىنداعى جاڭا ءتۇيىسۋ نۇكتەلەرىنە نازار اۋدارىلدى. ەنەرگەتيكا سەكتورىندا بىرلەسكەن جوبالار شەڭبەرىندە وزىق تەحنولوگيالاردى جاڭعىرتۋ مەن ەنگىزۋدىڭ ماڭىزدىلىعى اتاپ ءوتىلدى. اوك سالاسىنداعى ارىپتەستىك ماڭىزدى باعىت بولىپ سانالادى. قازاقستان الەمدەگى استىق پەن ۇندى ەڭ ءىرى ەكسپورتتاۋشىلاردىڭ وندىعىنا كىرەدى. وسى رەتتە استىقتى تەرەڭ وڭدەي وتىرىپ, ودان ءارى اقش, ەو, قىتاي جانە ءۇندىستان نارىقتارىنا ەكسپورتتاۋ بويىنشا بىرلەسكەن جوبالار تالقىلاندى.
تسيفرلىق سالادا Alem.AI حالىقارالىق جاساندى ينتەللەكت ورتالىعى مەن Astana Hub تەحنوپاركىنىڭ الەۋەتىن پايدالانۋ ارقىلى سەرىكتەستىكتى نىعايتۋ جوسپارلانىپ وتىر. بۇگىندە وندا 1700-دەن استام كومپانيا جۇمىس ىستەپ جاتىر. سونداي-اق كاليفورنيا شتاتىندا اشىلعان Silk Road يننوۆاتسيالىق ورتالىعى ارقىلى اقش-تىڭ جەتەكشى كومپانيالارىمەن بىرلەسكەن اكسەلەراتسيالىق باعدارلامالار جۇزەگە اسىرىلىپ وتىر.
كەزدەسۋ سوڭىندا تاراپتار ساۋدا-ەكونوميكالىق قاتىناستاردى بارلىق باعىتتار بويىنشا تەرەڭدەتۋگە دايىن ەكەندەرىن راستادى.
