قازاقستانعا جۇمىس ىستەۋگە قاي ەلدىڭ ازاماتتارى ءجيى كەلەدى

شەتەلدەن جۇمىس كۇشىن (شجك) تارتۋعا باسشىلار مەن ولاردىڭ ورىنباسارلارى ءۇشىن - 561 ء(بىرىنشى سانات), قۇرىلىمدىق بولىمشەلەردىڭ باسشىلارى ءۇشىن - 2 280 (ەكىنشى سانات) رۇقسات ەتىلەدى. تارتىلعان شجك نەگىزگى بولىگى ءۇشىنشى (ماماندار) جانە ءتورتىنشى (بىلىكتى جۇمىسشىلار) ساناتتارعا جاتادى. ولاردىڭ سانى 3 884 جانە 988 بولىپ بەلگىلەنگەن. 

سونداي-اق ماۋسىمدىق جۇمىستارعا 3 036 ادام, ال كورپوراتيۆتىك اۋىستىرۋ اياسىندا 3 918 ادام تارتۋعا بولادى. 

قازىرگى ۋاقىتتا قازاقستاندا شجك پايدالاناتىن 1 896 جۇمىس بەرۋشى بار. ولاردا 339,1 مىڭنان استام قازاقستان ازاماتى جۇمىس ىستەيدى, بۇل قىزمەتكەرلەردىڭ جالپى سانىنىڭ 96% قۇرايدى.

ەكونوميكالىق قىزمەت تۇرلەرى بويىنشا ەڭ كوپ شەتەلدىكتەر قۇرىلىس سالاسىندا – 4 799 ادام, اۋىل, ورمان جانە بالىق شارۋاشىلىعىندا – 3 065 ادام, تاۋ-كەن ونەركاسىبى جانە كارەرلەردى قازۋ سالاسىندا – 1 187 ادام, وڭدەۋ ونەركاسىبىندە – 1 085 ادام جۇمىس ىستەيدى. 

ال ەڭبەك ميگرانتتارى ءجيى كەلەتىن ەلدەر قاتارىندا قىتاي (5 330 ادام), وزبەكستان (2 682 ادام), تۇركيا (1 046 ادام), ءۇندىستان (1 012 ادام) مەملەكەتتەرى بار. 

ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, 2025 جىلى جالپى كۆوتا رەسپۋبليكاداعى جۇمىس كۇشىنىڭ سانىنا قاتىستى 0,2% مولشەرىندە نەمەسە 14,8 مىڭ بىرلىك بولىپ بەلگىلەنگەن, ال وسى جىلدىڭ ناۋرىز ايىنان باستاپ جەرگىلىكتى اتقارۋشى ورگانداردىڭ وتىنىمدەرىنە بايلانىستى ءمينيستردىڭ بۇيرىعىمەن 16,5 مىڭ بىرلىككە دەيىن ۇلعايتىلعان. 

وسى جىلدىڭ تامىز ايىنان باستاپ ماۋسىمدىق شەتەلدىك جۇمىسشىلاردىڭ ەڭبەك قىزمەتىن جۇزەگە اسىرۋ ءۇشىن كاسىپتەر تىزبەسىنىڭ كەڭەيۋىنە بايلانىستى ءمينيستردىڭ بۇيرىعىمەن جالپى كۆوتا رەسپۋبليكاداعى جۇمىس كۇشى سانىنا قاتىستى 0,25% نەمەسە 19,4 مىڭ مولشەرىندە بەلگىلەنگەن.