اۋقىمدى ءتۋرنيردى Nomad اكادەمياسى مەن قازاقستان ۇستەل تەننيسى فەدەراتسياسى قر تۋريزم جانە سپورت مينيسترلىگىنىڭ قولداۋىمەن ۇيىمداستىردى. بيىلعى جارىس بۇرىن-سوڭدى بولماعان كولەمدى جۇلدە قورىمەن ەرەكشەلەندى: جەڭىمپازدار — 5000, كۇمىس جۇلدەگەرلەر — 2500, ال قولا يەگەرلەرى — 1500 اقش دوللارىنان يەلەنەدى. جالپى جۇلدە قورى 115 مىڭ دوللاردى قۇرادى.
فينال قورىتىندىلارى:
ۇلدار (U-11) اراسىندا رامازان راۋان ۇلى (شقو) ۇزدىك ويىن ورنەگىن كورسەتىپ, التىن مەدال يەگەرى اتاندى. كۇمىس جۇلدەنى شىمكەنتتىك زاڭعار ءابدىماجيت ەنشىلەسە, قولا مەدالدار باقداۋلەت نۇرجان (شىمكەنت) مەن راسۋل بەكبولاتقا (اقتوبە) بۇيىردى.
قىزدار (U-11) ساناتىندا شوحينا ميركوديروۆا (شىمكەنت) توپ جارىپ, تۋرنير جەڭىمپازى اتاندى. ەكىنشى ورىن — قاراعاندىلىق جانسايا تىلەگەنوۆا, ال ءۇشىنشى ورىندى توميريس تيمۋرقىزى (اقتوبە) مەن نازەركە بولاتبەك (تۇركىستان) ءبولىستى.
جاسوسپىرىمدەر (U-16) اراسىنداعى فينالدا ءالىبي شومانوۆ (شقو) شەبەرلىگىمەن كوزگە ءتۇسىپ, چەمپيون اتاندى. كۇمىس جۇلدە — اسىلحان ماعزۇمبەكوۆكە (قاراعاندى), قولا — سانجار يباحان (تۇركىستان) مەن مانسۇر سۇيىندىككە (پاۆلودار) بۇيىردى.
قىزدار (U-16) اراسىندا قاراعاندى وكىلى ماريا لۋكيانوۆا قارسىلاستارىنا دەس بەرمەي, التىن جۇلدەگە يە بولدى. ەكىنشى ورىن — اقنيەت امانگەلدىگە, ال قولا مەدال — راۋانا شىمكەنتباي (شىمكەنت) مەن نويلا حانيازوۆاعا (تۇركىستان) بۇيىردى.
ايتا كەتەيىك, ءتۋرنيردىڭ سوڭعى كۇنى كورەرمەندەردى الەمدىك جۇلدىزدار سيۋي سين, فان بو, ۆەرنەر شلاگەر جانە دجۋ سە حيوك قاتىساتىن اسەرلى شوۋ-ماتچتار كۇتەدى. ال 29 قازاندا وتەتىن سالتاناتتى جابىلۋ راسىمىندە بارلىق چەمپيوندار مەن جۇلدەگەرلەر وزدەرىنىڭ لايىقتى ماراپاتتارىن الادى.
