سۋرەت: kz.kursiv.media
وتىرىستى اشقان دەپۋتات ەلنۇر بەيسەنباەۆ ماجىلىستە ءداستۇرلى ەمەس جىنىستىق باعدار مەن پەدوفيليانى ناسيحاتتايتىن توپتاردىڭ جۇمىسىنا قاتىستى بىرنەشە دەپۋتاتتىق ساۋال بولعانىن اتاپ ءوتتى. سونداي-اق ول حالىق تاراپىنان دا ارنايى پەتيتسيا جاريالانىپ, وعان 2 مىڭنان اسا ازامات قول قويعانىن ەسكە سالدى.
«بىرقاتار دەپۋتات ارنايى نورمالاردى دايىنداپ, ۇكىمەتكە جولدادى. قورىتىندىسى كەلدى. كەيبىر تۇستارى پىسىقتاۋدى قاجەت ەتسە دە, نەگىزىنەن بۇل نورمالاردى ۇكىمەت قولدادى. تولىقتىرۋ بالالاردىڭ قۇقىعىن قورعاۋدى جانە قوعامدا ۇلتتىق, مورالدىق قۇندىلىقتاردى ساقتاۋدى كوزدەيدى», دەدى دەپۋتات.
جيىندا دەپۋتات ەدىل جاڭبىرشين ءداستۇرلى ەمەس جىنىستىق باعدار سىندى ۇلتتىق قۇندىلىقتارعا قايشى كەلەتىن ارەكەتتەردى كوپشىلىك الدىندا دارىپتەۋگە قارسى ەكەنىن جەتكىزدى. اسىرەسە پسيحيكاسى قالىپتاسپاعان جاسوسپىرىمدەردىڭ اراسىندا مۇنداي ناسيحات جۇرگىزۋگە جول بەرۋگە بولمايتىنىن ايتتى.
«ەگەر بولاشاق ۇرپاقتىڭ اماندىعىن ويلاساق, ولاردىڭ ساناسىنا تەرىس اسەر ەتەتىن, ۇلتىمىزدىڭ تابيعي بولمىسىنا جات نارسەلەردىڭ تارالۋىنا قارسى تۇرۋىمىز قاجەت. قولدانىستاعى زاڭنامادا الەمدىك جانە ۇلتتىق مادەنيەتتى دارىپتەۋ تۋرالى 34-باپ بار. سول باپتا مادەني, ادەبي, باسقا دا كوپشىلىك ءىس-شارالاردا زورلىق-زومبىلىقتى, پورنوگرافيانى جانە قوعامعا جات وزگە دە قۇبىلىستاردى ناسيحاتتاۋعا تىيىم سالىناتىنى كورسەتىلگەن. ءبىز وسى نورماعا قوسىمشا رەتىندە ءداستۇرلى ەمەس جىنىستىق باعداردى جانە پەدوفيليانى ناسيحاتتاۋ دا زاڭمەن قۋدالاناتىنىن ناقتىلاپ ەنگىزىپ وتىرمىز. بۇل تۇزەتۋ جۇمىس توبىنىڭ كوپتەگەن مۇشەسى تاراپىنان قولداۋ تاۋىپ, ءبىراۋىزدان قابىلداندى. ەندى الداعى ۋاقىتتا الەمدىك مادەنيەت نەمەسە ۇلتتىق مادەنيەت اياسىندا وتەتىن كەز كەلگەن ءىس-شارالاردا لگبت قوزعالىسىن, پەدوفيليانى نەمەسە قوعامىمىزعا, ۇلتتىق مەنتاليتەتىمىزگە جات يدەيالار دارىپتەلسە, بۇل ارەكەتتەر زاڭ جۇزىندە قۋدالانادى», دەدى دەپۋتات.
نەگىزى بۇرىن زاڭ اياسىندا مۇنداي ناقتى تىيىمدار بولمادى. سالدارىنان كەيبىر قوعامدىق بىرلەستىكتەر مەن ۇيىمدار ءارتۇرلى اكتسيا, ميتينگ, پاراد وتكىزىپ, الەۋمەتتىك جەلىلەر ارقىلى ءوز ۇستانىمدارىن اشىق ناسيحاتتاپ كەلدى. ەندى دەپۋتاتتار زاڭ جۇزىندە شەكتەۋدەن بولەك, كينو, ادەبيەت, سپەكتاكل سىندى مادەني ونىمدەر ارقىلى مۇنداي يدەيالاردىڭ تارالۋىنا جول بەرمەۋ كەرەك دەپ وتىر.
«مىسالى, كانادا مەن امەريكادا جۇرگىزىلگەن 2022–2023 جىلدارداعى تاۋەلسىز زەرتتەۋلەر كورسەتكەندەي, لگبت وكىلدەرى اراسىنداعى 13 پەن 24 جاس ارالىعىنداعى ازاماتتاردىڭ سۋيتسيدكە بارۋ كورسەتكىشى اقش-تا – 41%, كانادادا 25%-دى قۇراعان. ال گەتەروسەكسۋالدى جاستار اراسىندا بۇل كورسەتكىش ءۇش ەسە تومەن. ياعني مۇنداي يدەولوگيا جاستاردىڭ پسيحيكاسىنا وتە اۋىر اسەر ەتەتىنىن دالەلدەيدى», دەدى ە.جاڭبىرشين.
باسقوسۋعا قاتىسقان وزگە دە ۇكىمەت وكىلدەرى, ءماجىلىس دەپۋتاتتارى نۇرلان اۋەسباەۆ, اينا ءمىسىرالىموۆا, ناتاليا دەمەنتەۆا, اناس باققوجاەۆ, جاناربەك ءاشىمجان, بولات كەرىمبەك, امانجول ءالتاي پىكىرلەرىن ورتاعا سالىپ, ءتيىستى نورمانى قولدايتىنىن ءبىلدىردى. ZOOM ارقىلى قوسىلعان رينات زايىت تا تالقىلانىپ وتىرعان ماسەلەنىڭ وزەكتى ەكەنىن تىلگە تيەك ەتتى.
