قازاقى تازى تۇقىمىنىڭ ساقتالۋى مەن دامۋىنا ۇلەس قوسۋ, تۇقىم ءوسىرۋ مادەنيەتىن نىعايتۋ, كينولوگيالىق ءبىلىم دەڭگەيىن ارتتىرۋ جانە قازاقستاندا جاۋاپتى يت اسىراۋ ءداستۇرىن قالىپتاستىرۋدى ماقسات ەتكەن كورمەگە كورمەگە ەلىمىزدىڭ ءار وڭىرىنەن كەلگەن 66 تازى, پيتومنيكتەر, تازى يەلەرى مەن يت وسىرۋشىلەرى قاتىستى.
قازاقستان كينولوگتار وداعىنىڭ توراعاسى باۋىرجان سەرىكققاليدىڭ ايتۋىنشا, مۇنداي شارالاردىڭ ەلىمىز وڭىرلەرىندە ءتۇرلى ۇيىمدار تاراپىنان جىلىنا بىرنەشە رەت ءوتىپ تۇرادى.
«بۇل جولعى شارانىڭ ماقساتى قازاقى تازىلاردى ناسيحاتتاۋ, ساقتاۋ مەن دامىتۋعا باعىتتالىپ وتىر. قازاقى تازى – ەلىمىزدىڭ مادەني مۇراسى رەتىندە تانىلعان ەرەكشە تۇقىم. كورمە قازاقى تازىنىڭ ءسان-سالتاناتىن كورۋ ماقساتىندا عانا ەمەس, ەجەلگى ۇلتتىق اڭشىلىق تۇقىم قازاقى تازىنىڭ اسىل تۇقىمدى جۇمىسىن دامىتۋ مەن ونى كەڭىنەن ناسيحاتتاۋداعى ماڭىزدى قادام. تازىنىڭ ستاندارتىنا قاتىستى دەرەكتەردى ءبىزدىڭ ەلىمىزدەگى ساراپشىلار عانا ايتا الادى. ويتكەنى ەلىمىز تازىنىڭ تابيعي مەكەنى سانالادى» دەيدى ب.سەرىكقالي.
وداققا شامامەن 35 وڭىرلىك كلۋب كىرەدى. باۋىرجان سەرىكققالي اتاپ وتكەندەي, تازى تۇقىمى ەلىمىزدىڭ بارلىق وڭىرىندە وسىرىلەدى. وداقتىڭ ماقساتى وسى تازىلاردى ستاندارتقا ساي ىرىكتەپ, ارى قاراي تۇقىمدىق سيپاتىن انىقتاپ, كوبەيتۋ. بۇگىنگى كۇنى وداقتىڭ كىتابىنا 3500 تازى تىركەلگەن.
كورمە بارىسىندا تازىنىڭ تۇقىمدىق ساپاسىن جان-جاقتى باعالاۋعا باعىتتالعان سالىستىرمالى رينگتەر ءوتتى. رينگتەردە كۇشىك توبىنان باستاپ ەرەسەك يتتەرگە دەيىنگى بارلىق ساناتتاعى يتتەر ساراپشىلاردىڭ سۇرىپتاۋىنان ءوتتى.
ساراپتامانى اڭشىلىق جانە ابوريگەن تۇقىمدارىن باعالاۋدا مول تاجىريبەگە يە ماماندار – ۇلتتىق جانە حالىقارالىق ساناتتاعى تورەشىلەر جۇرگىزدى. ىرىكتەلگەن يتتتەر ارنايى كۋبوكتار مەن سىيلىقتارعا يە بولدى. ال تازىلار تۋرالى دەرەكتەر قازىلار مۇشەلەرى-ساراپشىلاردىڭ كىتابىنا تىركەلىپ, ولاردىڭ بويى, دەنە ءبىتىمى, قيمىلىنا قاتىستى مالىمەتتەر جازىلىپ الىندى.
ۇلتتىق تورەشى ايبول الپىسباەۆتىڭ ايتۋىنشا, بۇل كورمە تازا تازى تۇقىمىن ىرىكتەۋگە مۇمكىندىك بەرەدى. اتاپ وتكەندەي, حالىقارالىق كينولوگيالىق فەدەراتسيانىڭ تالابى بويىنشا ون جىل ىشىندە تازا قاندى تازى تۇقىمىن دامىتىپ, سانىن ساپالى دەڭگەيگە كوتەرۋ مىندەتتەلگەن. ەندىگى كەزەكتە ىرىكتەلگەن تازىلار قۇجاتتاندىرىلىپ, ولاردى دامىتۋ باعىتىنداعى جۇمىستار جالعاساتىن بولادى. بۇگىنگى كۇنى ءوتىپ وتىرعان قكو كۋبوگىنا قاتىسۋ ناتيجەسى ارقىلى قازاقى تازى يەلەرى ۇلتتىق تيتۋلدارعا قول جەتكىزىپ, تۇقىم ساپاسىن ىشكى جانە ارالاس تۇقىمدىق باسەكەلەردە سالىستىرۋعا مۇمكىندىك الىپ وتىر.
كۋبوك اياسىندا كينولوگيالىق ساراپشىلار مەن يت سۇيەر قاۋىم تاجىريبە الماسىپ, يت كۇتىمى, تۇقىمىن دامىتۋ باعىتىنداعى جوسپارلارمەن ءبولىستى.
الماتى
