– كىتاپحانانىڭ ءبىلىم بەرۋدان باسقا, الەۋمەتتىك ماڭىزدى قىزمەتى جەتەرلىك. بۇل تۋرالى نە ايتاسىز؟
– كىتاپحانا – الەۋمەتتىك تەڭدىك ءپرينتسيپىن جۇزەگە اسىراتىن مادەني ينستيتۋت. الەمنىڭ قاي ەلىن الساڭىز دا, كىتاپحانا – اقىسىز قىزمەت كورسەتەتىن ساناۋلى مەكەمەلەردىڭ ءبىرى. مۇندا قوعامنىڭ بارلىق مۇشەسىنە بىردەي مۇمكىندىك بەرىلەدى: بىلىمىنە, جاسى مەن الەۋمەتتىك جاعدايىنا قاراماستان, ءار ادام اقپارات پەن بىلىمگە ەركىن قول جەتكىزە الادى. كىتاپحانا قىزمەتى كوزگە كورىنبەگەنىمەن, مازمۇنى كۇردەلى جانە جاۋاپكەرشىلىگى جوعارى سالا. كىتاپحاناشىلار تەك وقىرمانعا كىتاپ ۇسىنۋمەن شەكتەلمەيدى, ولار دەرەك قورىن جۇيەلەيدى, اقپاراتتى سارالايدى, قاجەت مالىمەتتى ءدال تابا بىلەتىن كاسىبي تالداۋشىعا اينالعان. بۇل ۇزدىكسىز ءبىلىم مەن جوعارى بىلىكتىلىكتى تالاپ ەتەدى. سونىمەن بىرگە, كىتاپحاناشىنىڭ ەڭبەگى فيزيكالىق تۇرعىدان دا اۋىر. كىتاپ تاسۋ, شاڭ باسقان قوردا جۇمىس ىستەۋ, ۇزاق ۋاقىت جاساندى جارىق استىندا وتىرۋ – دەنساۋلىققا زياندى فاكتورلار. كوپ ەلدەردە مۇنداي جاعدايدا ەڭبەك ەتەتىن قىزمەتكەرلەرگە ارنايى الەۋمەتتىك ۇستەماقى قاراستىرىلعان. سوندىقتان كىتاپحاناشىنىڭ ەڭبەگىن تەك مادەني قىزمەت ەمەس, قوعامنىڭ ينتەللەكتۋالدىق جۇيەسىن ۇستاپ تۇرعان الەۋمەتتىك ميسسيا دەپ قاراعان ءجون.
– كىتاپحانا ءىسى الەم تاجىريبەسىندە قالاي دامىپ جاتىر؟
–ەۋروپانىڭالدىڭعى قاتارلى ەلدەرى مەن اقشتا كىتاپحانالار جۇيەسى وتە دامىعان. ءبىزدىڭ كىتاپحانالاردىڭ كوبى كەڭەس وداعى كەزىندەگى كىتاپحانالار, جاڭا سالىنعاندارى دا سول ەسكى ۇلگىدە. ال دامىعان ەلدەردىڭ كىتاپحانالارى وتە كەمەل... مۇنى مويىنداۋىمىز كەرەك. بۇل جاعىنان قاراعاندا شەتەلدەردەن ۇيرەنەتىنىمىز كوپ. كىتاپحانا سالعاندا كاسىپقوي ماماننىڭ كەڭەسىن الۋ كەرەك. ويتكەنى كىتاپحانانىڭ ىشكى تالابى, قاجەتتىلىگى ەسكەرىلۋگە ءتيىس. سوندىقتان داميمىز دەسەك, كىتاپحانادان قارجى اياماۋىمىز كەرەك.
– قازىرگى كىتاپحانا قانداي بولۋى كەرەك؟ وقىرمان سۇرانىسىنا ساي كەلۋى ءۇشىن وعان قانداي جاڭا فۋنكتسيالار قاجەت دەپ ەسەپتەيسىز؟
– زاماناۋيلىقتى تەك عيماراتتىڭ ساۋلەتىمەن ولشەۋگە بولمايدى. كىتاپحانانىڭ باستى كورسەتكىشى – ونىڭ قوعامعا قىزمەت ەتۋ الەۋەتى. ياعني ول تەك كىتاپ ساقتايتىن نەمەسە وقۋ وتەتىن ورىن ەمەس, وي مەن ءبىلىم اينالىمىن جانداندىراتىن ورتالىققا اينالۋى ءتيىس. زاماناۋي كىتاپحانا وقىرمانعا قولايلى جاعداي جاساۋىمەن ەرەكشەلەنۋى كەرەك. مۇندا وقۋ زالدارىمەن قاتار كەڭەس بەرۋ بۇرىشتارى, اقپاراتتىق تالداۋ ورتالىقتارى, ءتىل مەن سويلەۋ مادەنيەتىن دامىتاتىن شاعىن ستۋديالار, بالالار مەن جاستارعا ارنالعان شىعارماشىلىق الاڭدار بولعانى ءجون. كىتاپحانا تەك اقپارات ۇسىنۋمەن شەكتەلمەي, ادامداردى ويلانۋعا, ءوزارا پىكىر الماسۋعا, مادەنيەتتى سويلەسۋگە باۋلۋى قاجەت. قوعامدا ءتىل تابيعاتىنىڭ بۇزىلۋى, ءسوزدىڭ مانەرىنىڭ جويىلۋى سياقتى ماسەلەلەر بايقالىپ وتىر. مۇنى تەك مەكتەپ پەن ۋنيۆەرسيتەت شەشىپ بەرە المايدى. سەبەبى ول جەرلەردە وقىتۋ بەلگىلى ءبىر ۋاقىتپەن شەكتەلەدى. ال كىتاپحانا – ءومىر بويى ءبىلىم الۋ مەن ءتىل مادەنيەتىن جەتىلدىرۋدىڭ ۇزدىكسىز ورتاسى. مۇندا ادامدى ساۋاتتى جازۋعا, مانەرلەپ وقۋعا, ورىندى سويلەۋگە ۇيرەتەتىن باعدارلاما مەن ورتا بولۋى كەرەك. وسىنداي جۇيە قالىپتاسقاندا عانا كىتاپحانا قوعامنىڭ رۋحاني سەرىگىنە اينالادى.
– مەملەكەت باسشىسى تاۋلىك بويى ىستەيتىن كىتاپحانانى جاساۋ كەرەكتىگىن تاپسىردى. بۇل تۇرعىدا ىلگىرىلەۋ بار ما؟
– تاۋلىك بويى جۇمىس ىستەۋ – كىتاپحانا قىزمەتىن كەڭەيتۋدىڭ ءبىر نۇسقاسى عانا. بىراق باستى ماسەلە كىتاپحانانىڭ قاشان اشىلىپ, قاشان جابىلۋىندا ەمەس, وعان وقىرماننىڭ كەز كەلگەن ۋاقىتتا ەركىن كەلىپ جۇمىس ىستەي الۋ مۇمكىندىگىندە. سوندىقتان ەڭ الدىمەن كىتاپحانا ورنالاساتىن جەر مەن ينفراقۇرىلىم دۇرىس تاڭدالۋى قاجەت. ول قوعامدىق كولىكپەن قاتىناۋعا ىڭعايلى, ادامدار ءجيى جۇرەتىن ايماقتا بولعانى ءجون. جاڭا كىتاپحانا سالۋ كەزىندە وسى فاكتورلار ەسكەرىلۋى ءتيىس. عيماراتتىڭ ارحيتەكتۋراسى مەن ىشكى قۇرىلىمى زامان تالابىنا ساي, كوپفۋنكتسيالى بولۋى ماڭىزدى. وندا وقۋ زالدارى مەن زەرتتەۋ ايماقتارىنان بولەك, جەكە جۇمىس بولمەلەرى, دەمالىس جانە كوممۋنيكاتسيا كەڭىستىگى دە بولۋى كەرەك. بۇگىندە مۇنداي باعىتتا وڭ تاجىريبە قالىپتاسىپ كەلەدى. ماسەلەن, ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ عىلىمي كىتاپحاناسى تۇنگى ساعات 23:00-گە دەيىن جۇمىس ىستەيدى. بۇل ستۋدەنتتەر مەن زەرتتەۋشىلەردىڭ وقۋ پروتسەسىن ىڭعايلى ۇيىمداستىرۋىنا مۇمكىندىك بەرىپ وتىر. دەمەك, كىتاپحانانىڭ زاماناۋيلىعى تاۋلىك بويى اشىق بولۋىمەن ەمەس, وقىرمانعا ناقتى قولايلى ورتا قالىپتاستىرۋىمەن ولشەنەدى.
– اڭگىمەڭىزگە راحمەت!
