فورۋمعا بىرىككەن ۇلتتار ۇيىمى, حالىقارالىق ەڭبەك ۇيىمى, حالىقارالىق كوشى-قون ۇيىمى, يۋنيسەف, دۇنيەجۇزىلىك بانك جانە باسقا دا حالىقارالىق ۇيىمداردىڭ وكىلدەرى قاتىستى. مەملەكەت باسشىسى قوعام دامۋىنىڭ ماڭىزدى بۋىنى رەتىندە الەۋمەتتىك قىزمەتكەرلەر مارتەبەسىن كوتەرۋگە جانە الەۋمەتتىك قورعاۋ جۇيەسىن رەفورمالاۋعا ۇلكەن كوڭىل ءبولىپ جاتىر. پرەمەر-مينيستر ولجاس بەكتەنوۆ ءوز سوزىندە قازاقستاندا الەۋمەتتىك قورعاۋدىڭ ءتيىمدى جۇيەسىن قۇرۋ بويىنشا جۇرگىزىلىپ جاتقان جۇمىستارعا توقتالىپ, الەۋمەتتىك قورعاۋ سالاسى قىزمەتكەرلەرىنىڭ ارداگەرلەر مەن قوعامدىق ۇيىمدار وكىلدەرىنىڭ, ازاماتتاردىڭ وسال توپتارىن قولداۋدى قامتاماسىز ەتۋگە قوسقان ۇلەسىن اتاپ ءوتتى.
«قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ بيىلعى حالىققا جولداۋىندا مەملەكەت ءار ازاماتتىڭ لايىقتى تابىس تاۋىپ, ساپالى الەۋمەتتىك قىزمەت الىپ, ەرتەڭگى كۇنىنە سەنىمدى بولۋى ءۇشىن بارىنشا جاعداي جاسايتىنىن اتاپ ءوتتى. بۇل ورايدا الەۋمەتتىك تەڭسىزدىكتى جويۋ, ارناۋلى الەۋمەتتىك قىزمەتتەر جۇيەسىن دامىتۋ جانە وسى باعىتتا ەڭ ۇزدىك حالىقارالىق ستاندارتتاردى ەنگىزۋ مەملەكەتتىڭ باسىم مىندەتتەرىنىڭ ءبىرى بولىپ قالىپ وتىر. بۇگىندە تسيفرلاندىرۋ الەۋمەتتىك-ەڭبەك قاتىناستارىنىڭ بارلىق سالاسىنا بەلسەندى تۇردە ەنگىزىلىپ, ۇلكەن دەرەكتەردى وڭدەۋگە مۇمكىندىك بەرىپ وتىر», دەدى ولجاس بەكتەنوۆ.2021-2025 جىلدار ارالىعىندا ارناۋلى الەۋمەتتىك قىزمەت كورسەتۋ ورتالىقتارىندا جۇمىس ىستەيتىن الەۋمەتتىك سالا قىزمەتكەرلەرىنىڭ جالاقىسى 2 ەسە كوبەيگەن. سونداي-اق اكىمشىلىك جانە كومەكشى قىزمەتكەرلەردىڭ, مەملەكەتتىك مەديتسينالىق-الەۋمەتتىك مەكەمەلەر, ۇيدە كۇتىم جاساۋ جانە ۋاقىتشا بولۋ ۇيىمدارى قىزمەتكەرلەرىنىڭ جالاقىسى ولاردىڭ قولدانىستاعى قوسىمشا اقىلارىنىڭ مولشەرىن بازالىق لاۋازىمدىق جالاقىنىڭ 30%-ىنان لاۋازىمدىق جالاقىنىڭ 40%-ىنا دەيىن ۇلعايتۋ جولىمەن كوبەيتىلدى. ەلىمىزدە حالىقتى الەۋمەتتىك قورعاۋ سالاسىندا بارلىعى 40 مىڭ مامان (مەديتسينا قىزمەتكەرلەرى, ارنايى پەداگوگتەر جانە الەۋمەتتىك قىزمەتكەرلەر) جۇمىس ىستەيدى. قر الەۋمەتتىك كودەكسىندە ورىندالاتىن جۇمىستاردىڭ كاسىبي دەڭگەيى مەن كۇردەلىلىگىن ەسكەرە وتىرىپ, وقىتۋ, سەرتيفيكاتتاۋ جانە ساناتتار بەرۋ مەن ەڭبەككە اقى تولەۋدىڭ جاڭا جۇيەسىن ەنگىزۋ ارقىلى الەۋمەتتىك قىزمەتكەرلەردىڭ مارتەبەسىن ارتتىرۋ كوزدەلگەن.
حالىقارالىق فورۋم بارىسىندا قاتىسۋشىلارعا قازاقستاندا ازاماتتاردىڭ وسال ساناتتارىن قولداۋ ءۇشىن كەڭىنەن قولدانىلاتىن تسيفرلىق شەشىمدەر ۇسىنىلدى. ونىڭ ىشىندە بىرىڭعاي تسيفرلىق پلاتفورما, الەۋمەتتىك قىزمەتتەر پورتالى جانە 2024 جىلدىڭ ۇزدىك جوباسى دەپ تانىلعان وتباسىنىڭ تسيفرلىق كارتاسى سياقتى يننوۆاتسيالىق جوبالار بار. كارتادا 6 ملن قازاقستاندىق وتباسى تۋرالى دەرەكتەر بار, ازاماتتارعا مەملەكەتتىك قىزمەتتەردىڭ 11 ءتۇرى پرواكتيۆتى فورماتتا ۇسىنىلادى. الەۋمەتتىك قورعاۋ جۇيەسىن دامىتۋ شەڭبەرىندە قازاقستان حالىقارالىق ۇيىمدارمەن بەلسەندى ءوزارا ءىس-قيمىل جۇرگىزىپ جاتىر. مۇگەدەكتىگى بار جانداردىڭ, حالىقتىڭ الەۋمەتتىك وسال توپتارىنىڭ قۇقىقتارىن قورعاۋعا, ارناۋلى الەۋمەتتىك قىزمەتتەر جۇيەسىن دامىتۋعا باعىتتالعان بىرقاتار بىرلەسكەن جوبا جۇزەگە اسىرىلۋدا. الداعى بەس جىلعا ارنالعان ينكليۋزيۆتى ساياسات تۇجىرىمداماسى قابىلداندى, بۇۇ-نىڭ مۇگەدەكتەردىڭ قۇقىقتارى تۋرالى كونۆەنتسياسى راتيفيكاتسيالاندى. حالىقارالىق ەڭبەك ۇيىمىمەن سەرىكتەستىكتە ۇلتتىق زاڭنامانى جەتىلدىرۋ بويىنشا كەلىسىلگەن جۇمىستار جۇرگىزىلۋدە.
فورۋمدا حالىقارالىق الەۋمەتتىك قامسىزداندىرۋ قاۋىمداستىعىنىڭ (حاقق) پرەزيدەنتى دوكتور موحاممەد ازمان قازاقستاننىڭ الەۋمەتتىك قىزمەتكەرلەرىن كاسىبي مەرەكەلەرىمەن قۇتتىقتادى. فورۋم الاڭىندا پرەمەر-مينيستر بىرقاتار تەحنولوگيالىق شەشىمدەرمەن تانىستى. اتاپ ايتقاندا, جامبىل وبلىسىنان كەلگەن وتاندىق ستارتاپشىلار جاساندى ينتەللەكتىگە ينتەگراتسيالانعان تسيفرلىق تەحنولوگيالار كومەگىمەن ءتىل جانە باس قيمىلدارى ارقىلى مۇگەدەكتەر ارباسىن باسقارۋ ءادىسىن تانىستىردى.
