شالعاي اۋىلداعى مادەنيەت ءۇيىنىڭ قۇرىلىسى 2023 جىلدىڭ قازان ايىندا باستالعان ەدى. مىنە, اۋىل تۇرعىندارى اسىعا كۇتكەن وتاۋدىڭ قۇرىلىسى بيىل تولىق اياقتالىپ, پايدالانۋعا بەرىلدى. جالپى اۋماعى 560 شارشى مەتر بولاتىن عيماراتتا 100 ورىندىق كورەرمەن زالى, كەڭ فويە, قىزمەتكەرلەرگە ارنالعان بولمەلەر, بي زالى, گاردەروب جانە گريمدەۋ بولمەلەرى ورنالاسقان.
مادەنيەت وشاعىنىڭ اشىلۋىنا وبلىس اكىمى ناريمان تورەعاليەۆ قاتىسىپ, اۋىل تۇرعىندارىن ايتۋلى كۇنمەن قۇتتىقتادى.
«مەملەكەت باسشىسى قاسىم-جومارت كەمەل ۇلى توقاەۆ مادەنيەت سالاسىنا ەرەكشە نازار اۋدارىپ, اۋىلدىق جەرلەردەگى الەۋمەتتىك نىسانداردىڭ جاڭارۋىنا ايرىقشا كوڭىل ءبولىپ كەلەدى. بۇل عيمارات – سول باستامالاردىڭ ناقتى جەمىسى, مەملەكەت قولداۋىمەن جەرگىلىكتى حالىقتىڭ بىرلىگىنىڭ كورىنىسى. جاڭا مادەنيەت ءۇيى – اۋىلدىڭ مادەني جانە قوعامدىق ءومىرىنىڭ ورتالىعىنا اينالادى دەپ سەنەمىن», دەدى ءوڭىر باسشىسى.
وبلىستا مادەنيەت سالاسىنا جۇيەلى قولداۋ كورسەتىلىپ كەلەدى. كەيىنگى ەكى جىلدا وسىنداي التى مادەنيەت ءۇيى مەن مادەني-سپورت كەشەنى پايدالانۋعا بەرىلگەن.
سونداي-اق رەسپۋبليكا بويىنشا العاش رەت مادەنيەت سالاسىندا «قازاقستان حالقىنا» قورىنىڭ قولداۋىمەن 25 اۋىلدىق كىتاپحانا جاڭعىرتىلىپ, زاماناۋي تالاپتارعا ساي جاڭاردى.
«سامۇرىق-قازىنا» قورىنىڭ قولداۋىمەن ورال قالاسىنداعى جاستار مادەنيەت سارايىندا «كرەاتيۆتى حاب» اشىلىپ, شىعارماشىل جاستارعا ارنالعان جاڭا ورتا قالىپتاستى.
ايتا كەتەيىك, باتىس قازاقستان وبلىسىندا بيىل تاعى 12 مادەني نىسان سالىنىپ جاتىر. جاقىن كۇندەرى جانىبەك اۋدانىنىڭ جاقسىباي اۋىلىندا مادەني-سپورت كەشەنى اشىلماق.
باتىس قازاقستان وبلىسى
