وتكەن عاسىردىڭ 60-جىلدارى تورعايدا امانگەلدى اتىنداعى مەموريالدىق مۋزەي جۇمىس ىستەپ تۇرعان. ونى حالىق اقىنى نۇرحان احمەتبەكوۆتەن كەيىن بەلگىلى ەتنوگراف-عالىم سەيىت كەنجەاحمەت ۇلى باسقارادى. بىردە مۋزەيدى تەكسەرۋگە قوستانايدان ارنايى كەلگەن جاتجۇرتتىق شەنەۋنىك مۇراجاي جادىگەرلەرىنىڭ ءبىرازىن جويۋ كەرەك دەگەن شەشىم شىعارادى. ءابىلحان قاستەەۆ سالعان امانگەلدى پورترەتى دە «جارامسىز» جادىگەرلەردىڭ تىزىمىنە ىلىگەدى.
سول كەزدە مۋزەيدى باسقارىپ تۇرعان سەيىت اعامىز وبلىستان كەلگەن ۋاكىلدى ۇيىنە ءتۇسىرىپ, جاقسىلاپ قوناق قىپ كۇتىپ, جىلى توسەگىنە جاتقىزادى. كەسىر مەيمان ابدەن قورىلعا باسقاندا, ءتۇن جامىلىپ وتىرىپ ءوزى باسقارىپ وتىرعان مۇراجايعا ءوزى «ۇرلىققا» تۇسەدى. مۇنىڭ الدىندا عانا مۋزەي عيماراتى بيىك قورشاۋمەن قورشالعان ەكەن, سودان سەكىرىپ ءتۇسىپ, باتىردىڭ پورترەتىن الىپ شىعادى دا, ۇيىنە اكەلىپ تىعىپ قويادى. كەلەسى كۇنى 1916 جىلعى ۇلت-ازاتتىق كوتەرىلىسىنە قاتىستى كوپتەگەن قۇندى قۇجات, كوتەرىلىسشىلەردىڭ سۋرەتى تۇگەلدەي وتقا ورانىپ ورتەنىپ, كۇلگە اينالادى.
كەيىن ارقالىقتا «دالا ولكەسى تاريحى» مۋزەيى اشىلعاندا سەيىت اعامىز پورترەتتى وزبەكالى جانىبەكوۆتىڭ قولىنا تاپسىرىپ, قۇندى جادىگەردىڭ جاي-جاپسارىن ايتىپ بەرگەن.
مۇراجاي قورىندا بۇدان وزگە ءابىلحان قاستەەۆ سالعان امانگەلدىنىڭ اياقتالماي قالعان تاعى ءبىر پورترەتى, باتىر العاش كوتەرىلىس باسشىلارىنىڭ باسىن قوسىپ, كەڭەس وتكىزگەن ساردار شتابىنىڭ سۋرەتى ساقتاۋلى تۇر.
قوستاناي وبلىسى
