فوتولار: اۋىل شارۋاشىلىعى مينيسترلىگى
«قازاق عىلىمي-زەرتتەۋ جىلقى شارۋاشىلىعى ينستيتۋتى وتكەن جىلى مەملەكەت باسشىسىنىڭ تاپسىرماسىمەن اشىلدى. ءبىر جىلدان از ۋاقىت ىشىندە بۇرىنعى تاجىريبە ستانساسى عىلىمي-زەرتتەۋ مەكەمەسىنە اينالدى. قازىرگى ۋاقىتتا زاماناۋي عيماراتتىڭ قۇرىلىسى جۇرگىزىلىپ جاتىر, ونىڭ قۇرامىندا اسىل تۇقىمدى جىلقىلاردى جان-جاقتى زەردەلەۋگە ارنالعان بەس زەرتحانا قاراستىرىلعان. ينستيتۋتتىڭ نەگىزگى مىندەتتەرى – جىلقى ەتى مەن قىمىز ەكسپورتىن دامىتۋ, ۇلتتىق سپورت تۇرلەرىن ناسيحاتتاۋ جانە سپورتتىق جىلقى شارۋاشىلىعىن وركەندەتۋ. سونداي-اق وتاندىق شاباندوزداردىڭ حالىقارالىق جارىستارعا قاتىسۋىنا جاعداي جاساۋ جوسپارلانىپ وتىر», دەدى «قازاق جىلقى شارۋاشىلىعى جانە جەمشوپ ءوندىرۋ عىلىمي-زەرتتەۋ ينستيتۋتى» اكتسيونەرلىك قوعامىنىڭ باسقارما توراعاسى الىبەك بازارعاليەۆ.
اۋىل شارۋاشىلىعى مينيسترلىگىنىڭ مالىمەتىنشە ينستيتۋت قۇرىلىمىندا مانەج, ات قورالار, ۆەتەريناريالىق پۋنكت, زەرتحانالار جانە يپپودروم قاراستىرىلعان. بۇل كەشەن عىلىمي زەرتتەۋلەر جۇرگىزۋگە, پراكتيكالىق جۇمىستار اتقارۋعا جانە جىلقى شارۋاشىلىعى سالاسىنداعى مامانداردى دايارلاۋعا مۇمكىندىك بەرەدى.
كەلەر جىلى قۇرىلىسى اياقتالاتىن جوبانى ىسكە اسىرۋ سالانىڭ عىلىمي نەگىزىن نىعايتىپ, اسىل تۇقىمدى جۇمىستاردىڭ ساپاسىن ارتتىرۋعا جانە ەلىمىزدىڭ جىلقى شارۋاشىلىعىن جاڭا دەڭگەيگە كوتەرۋگە مۇمكىندىك بەرەدى.
