سالتاناتتى جيىنعا قر پرەزيدەنتىنىڭ ىشكى ساياسات جانە كوممۋنيكاتسيالار ماسەلەلەرى جونىندەگى كومەكشىسى ارمان قىرىقباەۆ, قر مادەنيەت جانە اقپارات ءمينيسترى ايدا بالاەۆا, سونداي-اق پارلامەنت دەپۋتاتتارى, تەلەۆيزيا ارداگەرلەرى مەن مەدياحولدينگ قىزمەتكەرلەرى قاتىستى.
اقپارات كەڭىستىگىندە ايرىقشا ورنى بار اگەنتتىكتى مەملەكەت باسشىسى قاسىم-جومارت توقاەۆ مەرەيتويىمەن قۇتتىقتادى. پرەزيدەنتتىڭ قۇتتىقتاۋ حاتىن ارمان قىرىقباەۆ وقىپ بەردى.
«حاباردا» تەلەۆيزيا سالاسى قىزمەتكەرلەرىنىڭ تۇتاس شوعىرى قالىپتاستى. كوپتەگەن جۋرناليستەر وسىندا جەمىستى جۇمىس ىستەپ, شەبەرلىك مەكتەبىنەن ءوتتى. اگەنتتىك ءاردايىم ساباقتاستىق ءداستۇرىن ساقتاپ, مىقتى مامانداردىڭ ۇستاحاناسى رەتىندە تانىلدى.
اقپارات مايتالماندارى ۇجىمى ەلىمىزدەگى جانە الەمدەگى وقيعالار قۇرالى شىنايى حابار تاراتىپ, حالىققا مەملەكەتتىك ساياساتتىن ءمان-ماڭىزىن تۇسىندىرۋگە زور ۇلەس قوسىپ كەلەدى. سىزدەر بولاشاقتا دا قوعامداعى وزەكتى ماسەلەلەردى باتىل كوتەرىپ, ەل يگىلىگىن ەسەلەۋ جولىندا ايانباي ەڭبەك ەتەرسىزدەر دەپ بىلەمىن», – دەلىنگەن قۇتتىقتاۋ حاتتا.
سونىمەن قاتار, قر پارلامەنتى سەناتىنىڭ توراعاسى ماۋلەن اشىمباەۆ پەن پارلامەنت ءماجىلىسىنىڭ توراعاسى ەرلان قوشانوۆ «حابار» ۇجىمىنا بەينەقۇتتىقتاۋ جولدادى.
قر مادەنيەت جانە اقپارات ءمينيسترى ايدا بالاەۆا دا جىلى لەبىزىن ءبىلدىرىپ, «حابار» اگەنتتىگى تاۋەلسىز قازاقستاننىڭ تاريحىن تاسپالاعان ىرگەلى مەدياۇيىم ەكەنىن اتاپ ءوتتى.
«قازىرگى كەزدە «حابار» تەلەارناسى ەل پرەزيدەنتىنىڭ جولداۋلارىن, رەفورمالارى مەن باستامالارىن حالىققا كەڭىنەن ءتۇسىندىرىپ, ولاردىڭ ءمان-ماڭىزىن جەتكىزۋدە ەرەكشە ءرول اتقارىپ كەلەدى. «زاڭ جانە ءتارتىپ», «ادال ازامات», «ادىلەتتى قازاقستان», «تازا قازاقستان» سەكىلدى ەلدىڭ بولاشاعىنا باعىتتالعان تۇجىرىمدامالاردى اقپاراتتىق كەڭىستىكتە جۇيەلى تۇردە ناسيحاتتاپ, قوعامدا جاۋاپكەرشىلىك پەن ادىلدىك قاعيداتتارىن ورنىقتىرۋعا زور ۇلەس قوسۋدا», – دەدى مينيستر.
ءىس-شارا بارىسىندا سەرگەي پونوماريوۆ, بيبىگۇل جەكسەنباي, قىمبات دوسجان, ەرلان بەكحوجين, قىمبات حانگەلدينا, زەيىن الىپبەك, مارات مۇحامەدساليەۆ جانە سۆەتلانا كوكوۆينەتس سەكىلدى وتاندىق تەلەۆيزيا مايتالماندارى وزدەرى تۇلەپ ۇشقان «قارا شاڭىراققا» ريزاشىلىعىن ءبىلدىردى.
سونداي-اق «قازمەديا ورتالىعىنىڭ» فويەسىندە حاباردىڭ 30 جىلدىعىنا ارنالعان فوتو-كورمە ۇيىمداستىرىلدى. تاجىريبەلى جۋرناليستەر ەلىمىزدىڭ جەتەكشى جوعارى وقۋ ورىندارىنىڭ ستۋدەنتتەرىنە ءدارىس بەرىپ, شەبەرلىك ساباقتارىن وتكىزدى.
«حابار» اگەنتتىگى 1995 جىلعى 23 قازاندا قۇرىلدى. قازىرگى كەزدە اگەنتتىك قۇرامىندا قازاق جانە ورىس تىلدەرىندە حابار تاراتاتىن ەكى تەلەارنا بار. ءبىرى – اگەنتتىكتىڭ باستى ارناسى –«حابار» جانە تاۋلىك بويى حابار تاراتاتىن «24KZ» اقپاراتتىق ارناسى.
اتالعان تەلەارنالار ەلدەگى بارلىق ايماق كورەرمەندەرىنە قولجەتىمدى. ەفيردە وزەكتى جاڭالىقتار, كوركەم جانە دەرەكتى فيلمدەر, تەلەسەريالدار مەن ءتۇرلى باعدارلامالار كورسەتىلەدى. تاۋلىكتىك ەفير ۋاقىتىنىڭ كەمىندە 60 پايىزى مەملەكەتتىك تىلدە تاراتىلادى.
قازاقستاننىڭ بارلىق وڭىرلەرىندە جانە شەتەلدەردە «حابار» اگەنتتىگىنىڭ تىلشىلەر جەلىسى بار. اگەنتتىكتىڭ وكىلدىكتەرى اقش-تا, ءباا-دە, رەسەيدە, بەلگيادا, ۇلىبريتانيادا, وڭتۇستىك كورەيادا, قىتايدا, گەرمانيادا, وزبەكستاندا, قىرعىزستاندا, فرانتسيادا, تۇركيادا, گرۋزيادا, يسپانيادا جانە مالايزيادا جۇمىس ىستەيدى.
