قازاقستاندا مادەنيەت قىزمەتكەرلەرىنىڭ ەڭبەكاقىسى ءۇش جىلدا ەكى ەسە ءوستى

مادەنيەت جانە اقپارات مينيسترلىگىنىڭ مالىمەتىنشە, 2020 جىلى بەس رەسپۋبليكالىق مەكەمەگە «ۇلتتىق» مارتەبەسى بەرىلسە, 2023 جىلى اقتوبە جانە تۇركىستان وبلىستارىنىڭ 34 ونەرلىك ۇجىمدارى «حالىقتىق» جانە «ۇلگىلى» اتاقتارىنا يە بولدى. 2024 جىلى ءابىلحان قاستەەۆ اتىنداعى قر مەملەكەتتىك ونەر مۋزەيى مەن قر ورتالىق مەملەكەتتىك مۋزەيىنە «ۇلتتىق» مارتەبەسى بەرىلدى. سونداي-اق جامبىل اتىنداعى قازاق مەملەكەتتىك فيلارمونياسى مەن روزا باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمىنا «اكادەميالىق» اتاق بەرىلگەن.

2023 جىلى كەيىنگى 30 جىلدا العاش رەت رەسپۋبليكالىق بيۋدجەتتەن مەملەكەتتىك كونتسەرتتىك جانە وقۋ ورىندارىنا مۋزىكالىق اسپاپتار ساتىپ الۋعا 1 ملرد تەڭگەگە جۋىق قاراجات ءبولىندى. بۇل شارا جاس مۋزىكانتتاردىڭ كاسىبي دامۋىنا جانە دارىندى ورىنداۋشىلاردى قولداۋعا مۇمكىندىك بەردى.

تاريحي-مادەني مۇرانى ساقتاۋ جانە ناسيحاتتاۋعا ەرەكشە ءمان بەرىلىپ جاتىر. 2024 جىلى مۋزەيلەردىڭ شەتەلدىك كورمەلەرىن مەملەكەتتىك سۋبسيديالاۋ مەن مادەني قۇندىلىقتاردى شەتەلگە شىعارۋ ءتارتىبىن رەتتەيتىن «مادەنيەت تۋرالى» زاڭعا وزگەرىستەر ەنگىزىلدى. مەملەكەت باسشىسىنىڭ تاپسىرماسىنا سايكەس يۋنەسكو-عا ۇسىنۋ ءۇشىن «جىبەك جولى: فەرعانا–سىرداريا ءدالىزى» جانە «ماڭعىستاۋدىڭ جەراستى مەشىتتەرى» نوميناتسيالىق دوسەلەرى دايىندالدى.

قر ۇلتتىق مۋزەيىندە اشىلعان پالەونتولوگيا زالى مەن قولونەرشىلەر ورتالىعى كوپشىلىكتىڭ قىزىعۋشىلىعىن تۋدىردى. 2023 جىلى «سارايشىق» مەملەكەتتىك تاريحي-مادەني مۋزەيى جانىنان جاڭا ۆيزيت-ورتالىق اشىلدى. 2024 جىلى تۇركىستان وبلىسىندا قوجا احمەت ياساۋي مۇراسىن زەرتتەۋ ورتالىعى قۇرىلىپ, «ورداباسى» مەن «گاۋحار-انا» ۆيزيت-ورتالىقتارىنىڭ قۇرىلىسى اياقتالدى.

مادەني ينفراقۇرىلىمدى جاڭعىرتۋ باعىتىندا اۋقىمدى جۇمىستار جۇرگىزىلۋدە. 2020 جىلدان بەرى ءۇش جاڭا نىسان سالىنىپ, پايدالانۋعا بەرىلدى. اتاپ ايتساق, قاليبەك قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى, تۇركىستان مۋزىكالىق دراما تەاترى جانە سولتۇستىك قازاقستان وبلىسىنداعى س. مۇقانوۆ اتىنداعى قازاق سازدى-دراما تەاترى.

2020 جىلى قۇددۇس قوجامياروۆ اتىنداعى رەسپۋبليكالىق مەملەكەتتىك ۇيعىر مۋزىكالىق كومەديا تەاترىنىڭ عيماراتىنا كۇردەلى جوندەۋ جۇمىستارى جۇرگىزىلدى. 2024 جىلى دەمەۋشىلىك قاراجات ەسەبىنەن اباي اتىنداعى قازاق ۇلتتىق وپەرا جانە بالەت تەاترى عيماراتىنا جوندەۋ جۇمىستارى جاسالدى. بىلتىر مۇحتار اۋەزوۆ اتىنداعى قازاق ۇلتتىق دراما تەاترى عيماراتىن, بيىل ناتاليا ساتس اتىنداعى مەملەكەتتىك اكادەميالىق ورىس بالالار مەن جاسوسپىرىمدەر تەاترىنىڭ عيماراتىن رەكونسترۋكتسيالاۋ جۇمىستارى جۇرگىزىلىپ جاتىر.

تاريحي مۇرانى زەرتتەۋدىڭ ماڭىزدى ورتالىعىنا اينالاتىن دالالىق «بوزوق» ارحەولوگيالىق پاركى سالىنىپ جاتىر.

جالپى 2025 جىلى قازاقستان بويىنشا مادەنيەت نىساندارىندا 51 قۇرىلىس جانە 250 جوندەۋ جۇمىسى جوسپارلانعان.

مادەني ساياساتتىڭ ماڭىزدى باعىتى – سالا ماماندارىن قولداۋ جانە ىنتالاندىرۋ. 2023 جىلى سوڭعى وتىز جىلدا العاش رەت «حالىق ءارتىسى» قۇرمەتتى اتاعى قايتا تاعايىندالىپ, 8 مادەنيەت قايراتكەرىنە بەرىلدى. جاس قازاقستاندىق تالانتتار حالىقارالىق دەڭگەيدە دە تابىستى ونەر كورسەتىپ ءجۇر. اتاپ ايتساق, ۆوكال, سكريپكا, ديريجەرلىك جانە ءداستۇرلى مۋزىكالىق اسپاپتار بويىنشا 65 ونەرپاز بەدەلدى بايقاۋلاردىڭ جەڭىمپازى اتاندى.

مادەنيەت مەكەمەلەرى قىزمەتكەرلەرىنىڭ جالاقىسىن كەزەڭ-كەزەڭىمەن ارتتىرۋ (ورتا ەسەپپەن 20%) جالعاسۋدا. 2022–2025 جىلدار ارالىعىندا ولاردىڭ ەڭبەكاقىسى ەكى ەسە كوبەيدى. بيىل 75 ادەبيەت پەن ونەر قايراتكەرىنە مەملەكەتتىك ستيپەنديا تابىستالدى. مەملەكەت باسشىسى مادەنيەت جانە ونەر قىزمەتكەرلەرى كۇنى قارساڭىندا سالانىڭ ۇزدىكتەرىنە مەملەكەتتىك ناگرادالار تابىستادى.