كوللاجدى جاساعان – قونىسباي شەجىمباي, «EQ»
ءباسپاسوز جيىنىندا عىلىم جانە جوعارى ءبىلىم ۆيتسە-ءمينيسترى دينارا ششەگلوۆا باعدارلاما بارلىق دەڭگەيدەگى ستۋدەنتتەردى, ماگيسترانتتاردى, جاس زەرتتەۋشىلەردى قامتيتىنىن ايتتى.
ء«بىرىنشى كەزەڭدە 650 مىڭ ستۋدەنتتى جاساندى ينتەللەكت نەگىزدەرىنە, جاساندى ينتەللەكتىنى باسقارۋ داعدىلارىنا وقىتۋ كوزدەلگەن. قازىرگى تاڭدا ستۋدەنتتەر كۋرستاردان ءوتىپ, سەرتيفيكات الدى. ولار «Huawei», «Coursera», «Astana Hub» جانە ۋنيۆەرسيتەتتەردىڭ جەكە باعدارلامالارى بويىنشا وقىدى. كەلەسى كەزەڭدەردە – جاساندى ينتەللەكتىنى تەرەڭدەتىپ وقىتۋ, تەحنولوگيالىق كاسىپكەرلىك, سالالىق جوبالار ازىرلەۋ جانە ستارتاپتاردى اكسەلەراتسيالاۋ جوسپارلانعان. وسىلايشا, «AI-Sana» باعدارلاماسى ەكسپو اۋماعىندا ورنالاسقان «اlem.ai» حالىقارالىق جاساندى ينتەللەكت ورتالىعى ءۇشىن ادام كاپيتالىنىڭ نەگىزگى كوزى بولادى», دەدى ءمينيستردىڭ ورىنباسارى.
د.ششەگلوۆانىڭ ايتۋىنشا, «AI-Sana» باعدارلاماسىنىڭ ءبىرىنشى كەزەڭى اياسىندا ستۋدەنتتەر وتەتىن نەگىزگى كۋرستار بار. وقىتۋ «Huawei», «Astana Hub» جانە «Coursera» سياقتى جەتەكشى حالىقارالىق سەرىكتەستەرمەن بىرلەسىپ جۇزەگە اسىرىلىپ جاتىر جانە بۇل جاساندى ينتەللەكتىنىڭ كەڭ باعىتىن قامتيدى. ستۋدەنتتەر اتالعان كۋرستاردى ءساتتى اياقتاعاننان كەيىن سەرتيفيكاتتار يەلەنەدى. بۇگىنگى تاڭدا ەلىمىزدىڭ 80 جوعارى وقۋ ورنىندا 137 جي-اگەنت ەنگىزىلگەن, ال تاعى 363 جي-اگەنت ازىرلەۋ ساتىسىندا تۇر. ستۋدەنتتەر ازىرلەپ جاتقان ەڭ تانىمال جي-اگەنتتەرگە – جي-قابىلداۋ كوميسسياسى, جي-چەك, جي-پروكتورينگ, جي-لەكتور, جي-كىتاپحانا, جي-پسيحولوگ جانە ءبىلىم ۇدەرىستەرىنىڭ تيىمدىلىگىن ارتتىرۋ مەن جوعارى وقۋ ورىندارىنىڭ قىزمەتىن اۆتوماتتاندىرۋعا باعىتتالعان وزگە دە مامانداندىرىلعان شەشىمدەر جاتادى.
«بۇعان دەيىن مينيسترلىك «AI-Sana» باعدارلاماسى اياسىندا پرەزيدەنتتىڭ تاپسىرمالارىن ىسكە اسىرۋ بويىنشا جۇيەلى جۇمىس جۇرگىزگەنىن اتاپ وتكىم كەلەدى. بۇعان دەيىن قويىلعان بارلىق مىندەت بەلگىلەنگەن تارتىپپەن ورىندالىپ, الداعى قادامعا قاجەتتى نەگىز دايىندالدى. سونىمەن قاتار وسى جىلى 1 قازاندا وتكەن كەڭەستە مەملەكەت باسشىسى جاڭا مىندەتتەردى ايقىندادى: «AI-Sana» باعدارلاماسىن ودان ءارى ىسكە اسىرىپ, كادرلىق الەۋەتتى دامىتۋ ارقىلى مامان دايارلاۋدىڭ جاڭا كەزەڭىنە كوشۋ; عىلىمي سەرپىلىستەرگە جول اشاتىن جانە قۇزىرەتتەر ورتالىعىنا اينالاتىن مامانداندىرىلعان زەرتتەۋ ۋنيۆەرسيتەتىن قۇرۋ; ساپالى تسيفرلىق رەسۋرستار مەن زاماناۋي وقىتۋ ستاندارتتارىنا قولجەتىمدىلىكتى قامتاماسىز ەتەتىن ۇلتتىق ءبىلىم پلاتفورماسىن ازىرلەۋ. وسىلايشا, مينيسترلىكتىڭ الداعى جۇمىسى وسى ستراتەگيالىق باعىتتارعا سايكەس قۇرىلىپ, ەلىمىزدە جاساندى ينتەللەكت سالاسىن جۇيەلى تۇردە دامىتۋعا مۇمكىندىك بەرەدى», دەدى ۆيتسە-مينيستر.
بريفينگتە جوعارى جانە جوعارى وقۋ ورنىنان كەيىنگى ءبىلىم كوميتەتىنىڭ باسقارما باسشىسى رىسكۇل قۇدىرەتتۋلاەۆا بۇگىنگى تاڭدا جاساندى ينتەللەكت سالاسىندا كادر دايارلاۋ شەتەلدىڭ جەتەكشى ۋنيۆەرسيتەتتەرىمەن بىرلەسىپ جۇزەگە اسىپ جاتقانىن ايتتى.
«قازاقستانداعى «Cardiff» ۋنيۆەرسيتەتىندە جاساندى ينتەللەكت ورتالىعى اشىلدى, سونداي-اق قازىرگى تاڭدا 3 جوعارى وقۋ ورنى ناقتى سەرىكتەستىك جوبالاردى: قورقىت اتا اتىنداعى قىزىلوردا ۋنيۆەرسيتەتى SeoulTech-پەن, Satbayev University City University of Hong Kong-پەن, د.سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتى لۋ بان شەبەرحاناسىنىڭ بازاسىندا جۇرگىزىپ وتىر. وسىنداي تاجىريبە باسقا وقۋ ورىندارىندا دا دامىپ كەلەدى. ماسەلەن, «Astana IT University», حالىقارالىق اقپاراتتىق تەحنولوگيالار ۋنيۆەرسيتەتى, ت.ب», دەدى ر.قۇدىرەتۋللاەۆا.
ونىڭ بايانداۋىنشا, جاساندى ينتەللەكت سالاسىندا كادر دايارلاۋ جانە عىلىمي زەرتتەۋلەر جۇرگىزۋ ءۇشىن جوعارى وقۋ ورىندارىندا ينفراقۇرىلىمدى دامىتۋعا ەرەكشە نازار اۋدارىلىپ وتىر. جەتەكشى ۋنيۆەرسيتەتتەردىڭ بازاسىندا عىلىم مەن پراكتيكانى ۇشتاستىراتىن جاساندى ينتەللەكت بويىنشا ارنايى ورتالىقتار مەن زەرتحانالار قۇرىلدى. بۇگىندە جاساندى ينتەللەكت ورتالىقتارى ەلىمىزدىڭ بىرقاتار وقۋ ورنىندا تابىستى جۇمىس ىستەپ جاتىر. سونىمەن قاتار جاساندى ينتەللەكت بويىنشا ارنايى كافەدرالار دا 4 ۋنيۆەرسيتەتتە اشىلدى. ودان بولەك, عىلىمي زەرتحانالار دا جۇمىس ىستەيدى. نازارباەۆ ۋنيۆەرسيتەتىندە «اقىلدى جۇيەلەر جانە جاساندى ينتەللەكت» دەپ اتالاتىن ارنايى ينستيتۋت بىلتىر بولەك عىلىمي زەرتتەۋ ينستيتۋتى بولىپ زاڭدى تۇلعا رەتىندە قايتا قۇرىلدى.
ءباسپاسوز كونفەرەنتسياسىندا سويلەگەن ءۇشىنشى سپيكەر ل.ن. گۋميلەۆ اتىنداعى ەۇۋ تسيفرلاندىرۋ جونىندەگى پرورەكتورى گۇلميرا بەكمانوۆا ۋنيۆەرسيتەتتە «AI-Sana» باعدارلاماسى بەلسەندى تۇردە جۇزەگە اسىرىلىپ جاتقانىن جەتكىزدى. ونىڭ سوزىنە قاراعاندا, اتالعان باعدارلاما وقۋ, عىلىم جانە يننوۆاتسيانى بىرىكتىرەتىن ەكوجۇيەگە اينالدى. بۇل جاساندى ينتەللەكت قۇزىرەتتەرىن قالىپتاستىرىپ قانا قويماي, ۋنيۆەرسيتەتتىڭ پراكتيكالىق مىندەتىن شەشۋگە ارنالعان ناقتى AI-ونىمدەردى دە ازىرلەپ جاتىر.
