كوگىلدىر وتىن ءوتىمدى بولىپ تۇر

كەشە ورتالىق كوممۋنيكاتسيالار قىزمەتىندە ەنەرگەتيكا ۆيتسە-ءمينيسترى ماعزۇم مىرزاعاليەۆ پەن «KAZENERGY» قاۋىم­داستىعىنىڭ باس ديرەكتورى اسەت ماعاۋوۆ ءباسپاسوز ءماس­ليحاتىن وتكىزدى. وندا ەلىمىزدى گازبەن قامتۋ شارالارى ءسوز بولدى. ۆيتسە-مينيستر اۋەلى مەملەكەت باسشىسىنىڭ بەرگەن تاپسىرمالارى مەن «نۇرلى جول» جولداۋىندا جانە يندۋستريالاندىرۋ باعدارلاماسى بويىنشا ورىندالىپ جاتقان جۇمىستار جونىندە اڭگىمەلەپ, ەلدى گازداندىرۋ ماسەلەسىنە توقتالدى. بۇيىرتسا, 2015-2030 جىلدارعا ارنالعان باس سىزبا بويىنشا 2030 جىلعا دەيىن 13 وبلىستىڭ حالقى كوگىلدىر وتىنمەن تولىق قامتىلادى ەكەن. «بىلتىر رەسپۋبليكادا تابيعي گازدى تۇتىنۋ كولەمى 12,4 ملرد. تەكشە مەترگە جەتتى. ەستەرىڭىزدە بولسا, وتكەن جىلدىڭ قاراشاسىندا ۇكىمەت ەلدى گازداندىرۋدىڭ 2015-2030 جىلدارعا ارنالعان باس سىزباسىن بەكىتكەن بولاتىن. وسى سىزبانى جۇزەگە اسىرۋ ارقىلى 2030 جىلعا دەيىن 13 وبلىس گازبەن قامتىلادى. قازىر ەلىمىزدىڭ 42 پايىزى گازبەن قامتىلىپ وتىر. ال, باس سىزبا اياسىندا تۇرعىنداردىڭ 56 پايىزى كوگىلدىر وتىنعا قول جەتكىزەدى. جالپى, جاڭا گاز قۇبىرلارىنىڭ ۇزىندىعى 29 مىڭ شاقىرىمعا جەتەدى», دەدى ول. بۇعان دەيىن مۇناي وندىرۋگە باسىمدىق بەرىپ, گاز ەكسپورتىنا اسا كوڭىل بولمەگەن ەلىمىز ەندىگىدە بۇل شارۋانى دا مىقتاپ قولعا الا باستاپتى. سەبەبى, الەم ەلدەرىنىڭ گازعا دەگەن سۇرانىسى جىلدام ارتىپ كەلەدى ەكەن. وسىعان وراي ەلىمىز وتكەن جىلدىڭ وزىندە گاز ەكسپورتىن 6 ملرد. تەكشە مەترگە جەتكىزىپتى. «كاسپي قايراڭىندا اشىلعان كەن ورىندارىن قوسا العاندا, ەلىمىزدىڭ گەولوگيالىق رەسۋرستارى گاز بويىنشا 6-7 ترلن. تەكشە مەتردەن اسادى. شىعارىلاتىن قور 3,9 ترلن. تەكشە مەتر. ال بىلتىر 43,2 ملرد. تەكشە مەتردى قۇرادى, سوڭعى ءتورت جىلمەن سالىستىرعاندا, بۇل ەكى ەسەگە ارتىق كورسەتكىش. وسىلايشا, ەلىمىزدە گاز ءوندىرۋ كولەمى ارتىپ كەلە جاتىر. بۇگىندە «قاراشىعاناق پەترولەۋم وپەرەيتينگ», «تەڭىزشەۆرويل», «سنپس-اقتوبەمۇنايگاز», «جايىق­مۇناي» سىندى كومپانيالار ەلىمىزدەگى نەگىزگى گاز وندىرۋشىلەر», دەپ اتاپ ءوتتى م.مىرزاعاليەۆ. ەلىمىزدە بۇدان بىلاي گاز قۇيۋ ستانسالارىنىڭ سانى ارتاتىن بولادى. «مينيسترلىك پەن «قازمۇنايگاز – وڭدەۋ جانە ماركەتينگ» كومپانياسى جانە «گەليوس» جانار-جاعارماي قۇيۋ ستانساسى جەلىسى اراسىندا گازدى اۆتوكولىكتەرگە وتىن رەتىندە پايدالانۋدى كوپشىلىككە تاراتۋ جونىندەگى ىنتىماقتاستىق تۋرالى مەموراندۋم بەكىتىلدى. وكىنىشتىسى, ازىرشە وسى وتىن ءتۇرى كولىكتەردە كەڭىنەن تۇتىنىلماي وتىر. مۇنىڭ نەگىزگى سەبەبى دامىماعان ينفراقۇرىلىمعا, ونىڭ ىشىندە, وتىن قۇيۋ ستانسالارىنىڭ جەتكىلىكسىزدىگىنە بايلانىستى. ناقتى سانعا جۇگىنسەك, بۇگىندە اۆتوگاز قۇيۋ بەكەتتەرىنىڭ سانى ەلىمىز بويىنشا 500-دەن استام عانا جانە ونىڭ كولەمى جەتكىلىكسىز. ەندى وسى كەمدىكتىڭ ورنىن تولتىرساق دەگەن جوسپار بار. بۇعان قوسا, الەمدىك باعانىڭ تومەندەۋى ناتيجەسىندە سۇيىتىلعان گازدىڭ شەكتى كوتەرمە باعاسىن بەكىتتىك. ەندى وتىننىڭ وسى ءتۇرى اۆتوكولىكپەن جۇرەتىندەر ءۇشىن قولجەتىمدى بولا ءتۇستى», دەدى سپيكەر. نۇرباي ەلمۇراتوۆ, «ەگەمەن قازاقستان».