فوتو: ۇكىمەتتىڭ ءباسپاسوز قىزمەتى
«وزدەرىڭىز بىلەتىندەي, بيىل قابىلدانعان جاڭا بيۋدجەت كودەكسىنە ديۆيدەند تولەۋدەن الىناتىن ۇلەس ءاربىر ۇلتتىق كومپانيادان كەمىندە 50 جانە 70%-عا دەيىن بولۋى ءتيىس دەگەن نورما ەنگىزىلگەن. بۇرىن بۇل نورما جوق ەدى. بۇل شەكتىك مەجە ۇكىمەتتىڭ قاۋلىسىمەن بەلگىلەندى. ءبىز مۇنى اشىقتىققا, ەسەپ بەرۋگە, ۇلتتىق كومپانيالاردىڭ قاراجاتىن جۇمساۋعا پارلامەنت تاراپىنان قاداعالاۋدى ارتتىرۋعا جاسالعان ەلەۋلى قادام دەپ سانايمىز», دەدى ۇكىمەت باسشىسى.
ونىڭ ايتۋىنشا, ۇلتتىق كومپانيالاردىڭ قاراجاتىن پايدالانۋ بارىسى زاڭمەن قاتاڭ رەتتەلەدى. ساتىپ الۋ راسىمدەرى مەن شىعىندار تۋرالى مالىمەتتەر رەسپۋبليكالىق بيۋدجەتتىڭ اتقارىلۋى جونىندەگى ەسەپپەن بىرگە جاريالانادى. ءماجىلىس دەپۋتاتتارى مەن قوعام وكىلدەرى بۇل اقپاراتتى زەرتتەپ, باقىلاۋ جانە تۇزەتۋلەر ەنگىزۋ مۇمكىندىگىنە يە.
پرەمەر-مينيستر «سامۇرىق-قازىنا» قورىنىڭ ۇلەسىنە قاتىستى مىسال كەلتىرىپ, قوردىڭ 53 ترلن تەڭگە كولەمىندەگى ءىرى ينۆەستيتسيالىق باعدارلامانى جۇزەگە اسىرىپ جاتقانىن ايتتى.
ء«سىز ايتىپ وتىرعان ناقتى سومالارعا كەلسەك, شىن مانىندە, بۇل سوما – مەملەكەتتىك بيۋدجەتكە تۇسەتىن ديۆيدەندتەردەگى ايىرماشىلىق, ول «سامۇرىق-قازىنا» قورى ەسەبىنەن قالىپتاسىپ وتىر.مەن بۇل رەتتە بىرقاتار تسيفر كەلتىرگىم كەلىپ وتىر. قور, نەگىزگى مەملەكەتتىك دامۋ ينستيتۋتى رەتىندە, 53 ترلن تەڭگەگە باعالاناتىن وتە اۋقىمدى ينۆەستيتسيالىق باعدارلامانى جۇزەگە اسىرۋدا. بۇل ۇلكەن سوما. ارينە, قور وسى ينۆەستيتسيالىق باعدارلامانى جۇزەگە اسىرۋ ءۇشىن ءوز قاراجاتىن جۇمساپ قانا قويماي, نارىقتان دا قارىز الۋعا ءماجبۇر, بۇل قالىپتى جاعداي دەپ سانايمىز», دەدى ولجاس بەكتەنوۆ.
سونىمەن قاتار ولجاس بەكتەنوۆ «سامۇرىق-قازىنا» قورى ينۆەستيتسيالىق باعدارلامادان بولەك ەلىمىزدىڭ ءار وڭىردە بىرقاتار الەۋمەتتىك جوبانى جۇزەگە اسىرىپ جاتقانىن اتاپ ءوتتى.
«مىسالى, وڭىرلەردە تەك دەنساۋلىق ساقتاۋ نىساندارىن سالۋدىڭ وزىنە 550 ملرد تەڭگە باعىتتالىپ وتىر, ال ەلىمىزدىڭ بارلىق وڭىرىندە جالعا بەرىلەتىن تۇرعىن ءۇي قۇرىلىسىنا 272 ملرد تەڭگە بولىنگەن.بۇل دەگەنىمىز – وتە ماڭىزدى ينۆەستيتسيالار, سوندىقتان دا مەن ايتقان فاكتورلاردى ەسكەرە وتىرىپ, «سامۇرىق-قازىنا» قورىنىڭ ديۆيدەندتەرى بويىنشا قابىلدانعان شەشىمدەر ءبىر نەگىزگە سۇيەنگەن جانە جان-جاقتى قاراستىرىلعان شەشىمدەر دەپ ەسەپتەيمىز», دەدى پرەمەر-مينيستر ولجاس بەكتەنوۆ.
