فوتو: ۇكىمەتتىڭ ءباسپاسوز قىزمەتى
وتىرىس بارىسىندا دەپۋتاتتار ۇكىمەت وكىلدەرىنە سۇراقتار قويىپ, ءوز ۇسىنىستارىن ءبىلدىردى. دەپۋتات بەرىك بەيسانعاليەۆ الداعى ءۇش جىلدا ەكونوميكانى نىعايتۋعا باعىتتالعان ناقتى شارالار تۋرالى ساۋال قويدى.
وعان جاۋاپ بەرگەن پرەمەر-مينيستر ولجاس بەكتەنوۆ سوڭعى جىلدارى ەل ەكونوميكاسىنىڭ تۇراقتى ءوسىپ كەلە جاتقانىن اتاپ ءوتتى.
«راسىندا دا بيۋدجەتتىك جوسپارلاۋ كەزىندە ءبىز كونسەرۆاتيۆتىك ءتاسىلدى قولدانامىز. سوڭعى 3 جىلدا ەكونوميكامىز تۇراقتى ءوسىپ كەلە جاتىر. 2023 جىلى 5,1% بولدى. بىلتىر 5% وستىك. بيىل ءوسۋ قارقىنى جوعارى بولىپ تۇر. جالپى الەمدەگى احۋالدى قاراساق, الەمدىك ەكونوميكانىڭ ورتاشا ءوسىمى – 3%. ءبىزدىڭ ءىرى كورشىلەرىمىزدى جانە بىزگە ماڭىزدى ەلدەردى قارايتىن بولساق, ولاردىڭ ەكونوميكالارى دا باياۋلاپ جاتىر. سوندىقتان ۇكىمەت تاراپىنان تۇراقتى, قارقىندى ەكونوميكالىق ءوسىمدى قامتامىسىز ەتۋ ءۇشىن ءبىز بار كۇش-جىگەرىمىزدى سالىپ جاتىرمىز», دەدى ولجاس بەكتەنوۆ.
پرەمەر-ءمينيستردىڭ ايتۋىنشا, «بايتەرەك» حولدينگى ارقىلى جالپى كولەمى 8 ترلن تەڭگەنى قۇرايتىن ءىرى باعدارلاما ىسكە قوسىلعان. بۇل قاراجات ماڭىزدى ينفراقۇرىلىمدىق جانە يندۋستريالىق جوبالاردى دامىتۋعا باعىتتالادى.
ء«بىزدىڭ قورجىنىمىزدا باسقا دا كەشەندى ءىس-شارالار بار. ونىڭ ءبارىن قابىلداپ, ءتيىستى دامۋ قارقىنىن قامتاماسىز ەتەمىز دەپ ويلايمىز. بيىل جالپى 190 يندۋستريالىق جوبا ىسكە قوسىلادى. ولاردىڭ جالپى قۇنى 1,5 ترلن تەڭگەدەن اسادى. ال بارلىق سالانى ايتاتىن بولساق, قازىرگى تاڭدا 1681 ءىرى جوبا جۇزەگە اسىرىلىپ جاتىر. وسى جوبالاردىڭ شەڭبەرىندە 40 مىڭعا جۋىق تۇراقتى جۇمىس ورىندارى قۇرىلادى. الايدا, وسىممەن قاتار بىزگە ماكروەكونوميكالىق تۇراقتىلىق وتە ماڭىزدى. ءبىرىنشى كەزەكتە ينفلياتسيانى تەجەۋ كەرەك», دەدى بەكتەنوۆ.
سونىمەن قاتار, پرەمەر-مينيستر قىركۇيەكتىڭ قورىتىندىسى بويىنشا ينفلياتسيانىڭ دەڭگەيى 12,9%-دى قۇراعانىن ايتتى.
«ول ءبىزدىڭ پىكىرىمىزشە تىم جوعارى كورسەتكىش. ونى تومەندەتۋ كەرەك جانە وسى باعىتتا ءبىز ۇلتتىق بانكپەن ىلەسىپ, ءتيىستى شارالار جوسپارىن دايىنداپ جاتىرمىز. ول دايىن بولعان كەزدە ونى جاقىن ارادا حالىققا جاريالايمىز. وسى بارلىق فاكتوردى ەسەپكە الا وتىرىپ, ءبىزدىڭ پىكىرىمىزشە, جوسپارلانعان دامۋ قارقىنىنىڭ كورسەتكىشتەرى دۇرىس تەڭگەرىمدە دەپ سانايمىز», دەپ جاۋاپ بەردى پرەمەر-مينيستر ولجاس بەكتەنوۆ.
