فەستيۆال اياسىندا ءتۇرلى سالادا جەمىستى ەڭبەك ەتىپ جۇرگەن ازاماتتارعا وبلىس, اۋدان اكىمدىگىنىڭ, سالالىق باسقارمالار مەن كاسىپوداق ۇيىمدارىنىڭ العىسحاتتارى مەن توسبەلگىلەرى تابىس ەتىلدى. ولاردىڭ قاتارىندا «نۇراسىل» شارۋا قوجالىعىنىڭ مەحانيزاتورى ءجۇسىپ ماۋلەش ۇلى, مەكتەپ سانتەحنيگى رىسباي قوجاحمەت ۇلى, «قايىر» شارۋا قوجالىعىنىڭ شوپانى نۇربەرگەن حايروللا ۇلى, «دوسجان» شارۋا قوجالىعىنىڭ مالشىسى ماناربەك بەكەن ۇلى, «نۇرقوجا» شارۋا قوجالىعىنىڭ مەحانيزاتورى ەربولات قۋانىش ۇلى, «احات» شارۋا قوجالىعىنىڭ مەحانيزاتورى ماكسيم ءاندىر ۇلى, تاعى باسقالارى بار.
ۆەتەريناريا سالاسىنىڭ ارداگەرلەرى مارات ۋاحيت ۇلى, ەرلان قالدىباي ۇلى, سەرىك وپا ۇلى, مەرگەنعالي كاكىم ۇلى, ءسابيت ءماجيت ۇلى اۋىل شارۋاشىلىعى ارداگەرلەر كەڭەسىنىڭ «قۇرمەتتى ارداگەرى» توسبەلگىسىمەن ماراپاتتالدى.
مەرەكە اياسىندا اۋىل شارۋاشىلىعى جارمەڭكەسى ۇيىمداستىرىلدى, «جىراۋلار شەرۋى», «قادىر وقۋلارى», رەترو اندەر فەستيۆالى ءوتتى. اۋەسقوي جىرشى ساكەن جانعازيەۆ «قىز جىبەكتى», بەلگىلى ونەرپاز, جىرشى فارحات ورازوۆ «سىرىم باتىردى» جىرلادى. اقجايىق وڭىرىنە تانىمال ءورىمشى ۇلان جانبوتا ۇلى قامشى ورۋدەن شەبەرلىك ساباعىن وتكىزدى. بەلگىلى تازى باپتاۋشى راۋان ساتىبالديەۆ سايات ونەرى تۋرالى اڭگىمەلەپ بەردى. جيىن سوڭى جۇلدەسىنە اۆتوكولىك تىگىلگەن ات بايگەسىمەن, ارقان تارتۋ, اۋدارىسپاق, قازاقشا كۇرەس سەكىلدى ۇلتتىق ويىندارعا ۇلاستى.
باتىس قازاقستان وبلىسى
