فوتو: silkwaytv.kz
ساۋالناما بارىسىندا جەر جانە تەحنيكا پايدالانۋى, ەگىس كولەمى, تىڭايتقىش قولدانۋ, مال شارۋاشىلىعىنىڭ جاعدايى, جۇمىسپەن قامتۋ سىندى اۋىل شارۋاشىلىعىنا ءتان نەگىزگى كورسەتكىشتەر زەرتتەلدى. مالىمەتتەر ءىرى اگروكاسىپورىنداردان باستاپ شاعىن فەرمەرلەر مەن جەكە قوسالقى شارۋاشىلىقتارعا دەيىنگى بارلىق دەڭگەيدە جينالدى.
«ۇلتتىق اۋىل شارۋاشىلىعى ساناعىنا قاتىسقان, قولداۋ كورسەتكەن جانە كومەكتەسكەن بارلىق ازاماتتارعا شىنايى العىسىمىزدى بىلدىرەمىز. ايتا كەتۋ كەرەك, بۇل تەك دەرەكتەردى جيناۋ بويىنشا نەگىزگى كەزەڭنىڭ اياقتالۋى. الدا ءبىزدى وسى دەرەكتەردى وڭدەۋ, سالىستىرۋ جانە ءارتۇرلى دەڭگەيدە بىرىكتىرۋ بويىنشا اۋقىمدى جۇمىس كۇتىپ تۇر. جينالعان مالىمەتتەر اگرارلىق سالانىڭ جاي-كۇيى تۋرالى وبەكتيۆتى كورىنىس قالىپتاستىرۋعا مۇمكىندىك بەرەدى. اۋىل شارۋاشىلىعىنىڭ دامۋىنا ۇلەس قوسقان جانە وسى ماڭىزدى ءىستى قولداعان ءار ادامعا العىس ايتامىن», دەدى قر سجرا ۇلتتىق ستاتيستيكا بيۋروسىنىڭ باسشىسى ماقسات تۇرلىباەۆ.
ايتا كەتەيىك, دەرەكتەردى جيناۋ ەكى كەزەڭنەن تۇردى. ءبىرىنشى كەزەڭ 1–31 تامىز ارالىعىندا ونلاين فورماتتا ءوتتى. ازاماتتار sanaq.gov.kz سايتى جانە eGovMobile قوسىمشاسى ارقىلى ەتسق نەمەسە SMS-كود كومەگىمەن تىركەلىپ, ساۋالناما تولتىردى. بۇل مۇمكىندىكتى 600 مىڭنان استام ادام پايدالاندى.
ەكىنشى كەزەڭ 20 قىركۇيەكتەن 20 قازان ارالىعىندا وفلاين فورماتتا ۇيىمداستىرىلدى. ەل بويىنشا 3 200-دەن استام ينتەرۆيۋەر ارنايى پلانشەتتەرمەن ساۋالناما جۇرگىزىپ, دەرەكتەردىڭ ناقتىلىعىن قامتاماسىز ەتتى. ساناققا پوشتا جانە الەۋمەتتىك قىزمەت ماماندارى, سونداي-اق جۇمىسپەن قامتۋ ورتالىقتارى ارقىلى تارتىلعان ازاماتتار دا بەلسەنە قاتىستى.
«بۇل جۇمىستا ينتەرۆيۋەرلەردىڭ ەڭبەگى وراسان زور. ولار كۇن سايىن ازاماتتارمەن تىكەلەي بايلانىستا بولىپ, ساناقتىڭ ماقساتىن ءتۇسىندىرىپ, ماڭىزدى دەرەكتەردى جينادى. سونىمەن قاتار, نەگىزگى جۇمىستارىندا حالىقپەن جۇمىس ىستەيتىن پوشتاشىلار, الەۋمەتتىك قىزمەتكەرلەر, كوممۋنالدىق قىزمەت باقىلاۋشىلارى دا قوسىمشا تابىس تابۋ مۇمكىندىگىنە يە بولدى. بۇدان بولەك, ءبىز حالىقتى جۇمىسپەن قامتۋ ورتالىقتارى ارقىلى كەلگەن جۇمىسسىز ازاماتتاردى ساناققا تارتتىق», دەدى بيۋرو باسشىسى.
ناۋقان بارىسىندا اقپاراتتىق-ءتۇسىندىرۋ جۇمىستارى كەڭىنەن جۇرگىزىلدى. ازاماتتار الەۋمەتتىك جەلىلەر مەن وڭىرلىك باق ارقىلى حاباردار ەتىلىپ, SANAQ مىرزا اتتى چات-بوت ناقتى ۋاقىت رەجيمىندە سۇراقتارعا جاۋاپ بەرىپ وتىردى. سونىمەن قاتار, 2 600-دەن استام وزىنە-ءوزى قىزمەت كورسەتۋ ايماعى اشىلىپ, 1446 بايلانىس ورتالىعى 22 مىڭنان استام ءوتىنىش قابىلدادى.
جينالعان مالىمەتتەر اۋىلدىق جەرلەردىڭ دامۋ دەڭگەيىن باعالاپ, اگروونەركاسىپ كەشەنىن قولداۋدىڭ جاڭا تەتىكتەرىن ازىرلەۋگە مۇمكىندىك بەرەدى. الدىن الا وڭدەۋ جانە تالداۋ الداعى ايلاردا اياقتالادى. ناتيجەلەر كەلەر جىلى ۇلتتىق ستاتيستيكا بيۋروسىنىڭ رەسمي سايتىندا جاريالانباق.
