كەيىنگى ەكى جىلدا ءۇش پيتچينگ (كينوجوبانى قارجىلاندىرۋعا نيەتتى ينۆەستورلاردى تارتۋ ماقساتىندا وتكىزىلەتىن ۆيزۋالدى تانىستىرىلىم) وتكىزىلىپ, ناتيجەسىندە 57 جوبانىڭ 40-ى جاس كينەماتوگرافيستەردىڭ ەنشىسىنە بۇيىرعان.
بىلتىر كونكۋرسقا ىرىكتەۋ اشىق وتكەن. قۇجاتتار ەلەكتروندى قابىلدانىپ, ساراپشىلار كەڭەسىنىڭ داۋىس بەرۋى جەتىلدىرىلدى. قازاق تىلىندەگى ستسەناريلەر ۇلەسى 75%-عا جەتكەن.
«Qaitadan» ءفيلمى وتاندىق پروكاتتا 1 ميلليارد تەڭگەدەن استام كاسسا جيناپ, جوعارى ناتيجە كورسەتتى. تۋىندى مەملەكەتتىك ينۆەستيتسيالاردى بەس ەسە اقتاپ, مەملەكەتتىك قولداۋ تەتىگىنىڭ تيىمدىلىگىن دالەلدەدى.
قازاق كينو ونەرى حالىقارالىق دەڭگەيدە تۇراقتى ورىن الا باستادى. كەيىنگى 30 جىل ىشىندە العاش رەت ەلىمىز كانن كينوفەستيۆالى اياسىنداعى ءىرى «Marché du Film» كينونارىعىنا قاتىسىپ, «KazakhCinema» ۇلتتىق ستەندى ارقىلى وتاندىق جوبالاردى دامىتۋعا ماڭىزدى مۇمكىندىك تۋعىزدى. كانن قالاسىندا فرانتسيا مەن گرۋزيانىڭ ۇلتتىق كينوورتالىقتارىمەن مەموراندۋمدارعا قول قويىلدى. ال اقتاۋدا ازەربايجان, قىرعىزستان, تۇركيا, تۇرىكمەنستان جانە وزبەكستاننىڭ كينو ۇيىمدارىمەن ىنتىماقتاستىق تۋرالى كەلىسىمدەر جاسالدى.
حالىقارالىق جوبالار قاتارىندا لوكارنو مەن پۋسان فەستيۆالدەرىندە ۇسىنىلعان «سكازكا و مورسكيح پساح» اتتى دەرەكتى فيلم جانە «پوبەديتەلەي ۆيدنو نا ستارتە» اتتى بىرلەسكەن فيلم بار. وسىلايشا, وتاندىق كينو ونەرى جاڭا بەلەستەردى باعىندىرىپ, ەلدەگى جانە شەتەلدىك كورەرمەن نازارىن اۋدارۋعا جول اشىپ كەلەدى.
