ەلىمىزدە كىتاپحانا ءىسى بويىنشا گرانت سانى ەكى ەسە ءوستى

مادەنيەت جانە اقپارات مينيسترلىگىنىڭ مالىمەتىنشە, بۇگىنگى تاڭدا ەل اۋماعىندا پرەزيدەنت ءارحيۆىن جانە بىرنەشە ءىرى وڭىرلىك ورتالىقتاردى قامتيتىن 236 ارحيۆ مەكەمەسى جۇمىس ىستەيدى. ۇلتتىق ارحيۆ قورىندا 74,5 مىڭ قوردى قامتيتىن 27,8 ميلليوننان استام ساقتاۋ بىرلىگى بار.

كىتاپحانا جانە ارحيۆ سالاسىنا ماماندار دايارلاۋ ءىسى دە كەڭەيىپ وتىر. «كىتاپحانا ءىسى, اقپاراتتى وڭدەۋ جانە ارحيۆ ءىسى» باعىتى بويىنشا جوعارى ءبىلىم گرانتتارىنىڭ سانى سوڭعى جىلى ەكى ەسەگە ارتىپ, باكالاۆريات بويىنشا 20-دان 100-گە دەيىن ءوستى. بۇعان قوسا, بەس ءوڭىردىڭ وقۋ ورىندارىنا قوسىمشا 89 گرانت ءبولىنىپ, جاس مامانداردى قولداۋدىڭ جاڭا مۇمكىندىكتەرى اشىلدى.

جامبىل وبلىسىنداعى قورداي جانە جامبىل اۋداندىق ارحيۆتەرىنىڭ, اقتوبە وبلىسىنداعى تەمىر اۋداندىق ءارحيۆىنىڭ, سونداي-اق استاناداعى قازاقستان رەسپۋبليكاسى پرەزيدەنتى ءارحيۆىنىڭ جاڭا عيماراتتارى پايدالانۋعا بەرىلدى.

«مەملەكەتتىك قولداۋ قۇرالدارىن جەتىلدىرۋ ماقساتىندا 2023 جىلى قازاقستان رەسپۋبليكاسىنىڭ پرەزيدەنتى باستاماسىمەن جاس جازۋشىلار مەن اقىندارعا ارنالعان پرەزيدەنتتىك ارناۋلى ادەبي سىيلىق تاعايىندالدى. سىيلىق «پروزا», «پوەزيا», «بالالار ادەبيەتى» جانە «دراماتۋرگيا» نوميناتسيالارى بويىنشا بەرىلەدى. ءار نوميناتسيا بويىنشا جۇلدە قورى – 4,1 ميلليون تەڭگە. مەملەكەت باسشىسىنىڭ 2023 جىلى تۇركىستاندا وتكەن ۇلتتىق قۇرىلتايدا بەرگەن تاپسىرماسىنا سايكەس, «قازاقستاننىڭ حالىق جازۋشىسى» قۇرمەتتى اتاعىن قايتا ەنگىزۋ ماقساتىندا 2023 جىلعى 16 قازاندا «قازاقستان رەسپۋبليكاسىنىڭ مەملەكەتتىك ناگرادالارى تۋرالى» زاڭعا وزگەرىستەر مەن تولىقتىرۋلار ەنگىزىلدى. بۇل ۇلتتىق ادەبيەتتىڭ دامۋىنا ەلەۋلى ۇلەس قوسقان قالامگەرلەر ەڭبەگىنىڭ رەسمي باعالانۋى», دەلىنگەن حابارلامادا.

2025 جىلى مەملەكەت باسشىسىنىڭ باستاماسىمەن بەلگىلەنگەن ۇلتتىق كىتاپ كۇنى العاش رەت اتالىپ ءوتىپ, وتاندىق اۆتورلاردى قولداۋ مەن وقىرمان مادەنيەتىن دامىتۋعا باعىتتالعان «ۇلتتىق كىتاپ» بايقاۋى ۇيىمداستىرىلدى.

تاريحي جادىنى ساقتاۋ ىسىندە دە جاڭا باستامالار قولعا الىندى. «باتىرلارعا تاعزىم» اتتى ۆەب-پورتال ىسكە قوسىلىپ, وندا ۇلى وتان سوعىسىنا قاتىسقان 690 مىڭنان استام جاۋىنگەر تۋرالى مالىمەتتەر توپتاستىرىلعان. ولاردىڭ قاتارىندا 365 كەڭەس وداعىنىڭ باتىرى, ەكى مارتە باتىر اتانعان ءتورت جاۋىنگەر جانە داڭق وردەنىنىڭ 19 يەگەرى بار. قورعانىس مينيسترلىگىمەن بىرلەسىپ 6 615 قازاقستاندىق اسكەري تۇتقىن جونىندەگى دەرەكتەر ەنگىزىلدى. سونداي-اق, KAZNEB پلاتفورماسىندا مايدانگەر جازۋشىلاردىڭ ەڭبەكتەرىنىڭ اۋديو نۇسقالارى جاريالاندى.

«ارحيۆ – 2025» جوباسى اياسىندا 14 ەلدەن مىڭنان استام بىرەگەي تاريحي قۇجات جينالدى. ارحيۆ ماتەريالدارىن ساقتاۋ مەن بىرىڭعاي ەلەكتروندىق ءارحيۆتىڭ قۇقىقتىق نەگىزىن قالىپتاستىرۋعا باعىتتالعان جاڭا زاڭ جوباسى ازىرلەنىپ جاتىر. وسى جىلى قر ۇلتتىق ءارحيۆى حالىقارالىق ىنتىماقتاستىقتى بەلسەندى تۇردە دامىتتى. ساۋد ارابياسى, رەسەي, ليتۆا جانە تۇركيا ەلدەرىنىڭ ارحيۆ قىزمەتتەرىمەن مەموراندۋمدارعا قول قويىلىپ, قۇجاتتىق مۇرانى تسيفرلاندىرۋ جانە ساقتاۋ باعىتىنداعى بىرلەسكەن جوبالار جۇزەگە اسىرىلدى. تامىز ايىندا وزبەكستاننىڭ بۇحارا قالاسىندا قازاقستان ارحيۆتەرى كۇنى ءوتىپ, وندا «وزبەكستان مەن قازاقستاننىڭ ارحيۆتىك قۇجاتتارىنداعى مادەني ىنتىماقتاستىق» بىرلەسكەن باسىلىمى تانىستىرىلدى. ماۋسىم ايىندا ماسكەۋ قالاسىندا « ۇلى وتان سوعىسىنداعى قازاقستاندىقتاردىڭ ەرلىگىنە ارنالعان قۇجاتتىق كۋالىك» فوتوالبومى ۇسىنىلدى», دەلىنگەن حابارلامادا.

سونىمەن قاتار, قازاقستان جازۋشىلار وداعى «جاڭا قازاقستاننىڭ ادەبي-تانىمدىق پانوراماسى», «جازۋشىلاردىڭ ادەبي شەبەرلىك مەكتەبى» جانە قازاق ادەبيەتىن تمد ارحيۆتەرىندە زەرتتەۋ باعدارلاماسى سەكىلدى ءىرى جوبالاردى جۇزەگە اسىرىپ جاتىر.