س. قوجامقۇلوۆ اتىنداعى ۇلىتاۋ وبلىسىنىڭ قۋىرشاق ترۋپپاسىنا بيىل 40 جىل تولدى. وسى مەرەيتويعا قازاقستاننىڭ ەڭبەك سىڭىرگەن قايراتكەرى, استاناداعى م.گوركي اتىنداعى مەملەكەتتىك اكادەميالىق ورىس دراما تەاترىنىڭ باس رەجيسسەرى بەكپۋلات پارمانوۆ دات جازۋشى-ەرتەگىشىسى گانس حريستيان اندەرسەننىڭ الەمدىك كلاسسيكاعا اينالعان «ۇسقىنسىز ۇيرەك» قويىلىمىن بالالارعا تارتۋ ەتتى. قالا مەكتەپتەرىندە وقيتىن وقۋشىلار تەاترعا كەلىپ, قويىلىمدى تاماشالادى.
ەكسپەريمەنتالدىق باعىتتاعى سپەكتاكلدە بۇل جولى قۋىرشاقتار ەمەس, ءتۇرلى قۇس پىشىنىندەگى, جارتىلاي ماسكاداعى اكتەرلەر وزدەرى وينادى.
قويىلىمعا ۇيرەكتەردىڭ وتباسىندا دۇنيەگە كەلگەن بالاپاننىڭ باسىنان كەشكەن وقيعا ارقاۋ بولادى. بالاپان قاتارلاستارىنىڭ ەشقايسىسىنا ۇقسامايدى. سىرت كەلبەتى عانا ەمەس, وزگەشە ويلاۋى, ءوزىن باسقاشا سەزىنۋى ارقىلى باسقا بالاپانداردان ەرەكشەلەنىپ تۇراتىن ونى «ۇسقىنسىز» دەپ جابىرلەپ, قيانات جاسايدى. تەك اناسى عانا ونى وزگەلەردىڭ جابىرلەۋىنەن قورعايدى. كەلەكە مەن مازاققا شىداماعان بالاپان ءوزىن قابىلداماعان ورتادان كەتىپ قالۋعا ءماجبۇر بولادى. بىراق ول مويىماي, كەزدەسكەن قيىندىق پەن كەدەرگىگە قارسى تۇرادى. جالعىزدىق جانىنا باتسا دا وزىنە دەگەن سەنىمىن جوعالتپاي, زەڭگىر اسپاندا قالىقتاپ ۇشۋدى ۇيرەنەدى. قورعانسىز بالاپان ءوسىپ, كولدىڭ كوركى سۇلۋ اققۋعا اينالادى. ءوزىن جاقسى تۇسىنەتىن سىڭارىن تابادى.
قويۋشى رەجيسسەر بەكپۋلات پارمانوۆ «سپەكتاكلدىڭ جەلىسى بالالارعا تۇسىنىكتى ءارى قىزىقتى بولۋعا بارىمىزدى سالدىق. قۋىرشاق تەاترى جاس ۇرپاقتى مادەنيەتكە, ىزگىلىككە, ادامگەرشىلىككە تاربيەلەۋدىڭ قۇرالى. قۋىرشاققا جان ءبىتىرىپ, ويناتىپ, قۇلپىرتىپ جىبەرۋ وڭاي ەمەس. جاسىراتىنى جوق قۋىرشاق تەاترىنا كاسىبي ماماندار جەتىسپەيدى. تەاتر ۇنەمى ىزدەنىستە, جاڭارۋ جولىندا بولۋى كەرەك...» دەيدى.
قويىلىمدى كورگەن كورەرمەن ناعىز سۇلۋلىق كوزگە كورىنىپ تۇرعان سىرت بەينەدە ەمەس, ىشكى جان دۇنيەدە - جۇرەكتە, بويداعى مەيىرىم مەن ماحابباتتا, تاباندىلىقتا دەگەن وي تۇيەدى.
ۇلىتاۋ وبلىسى
