كورمە ءتۇرلى بۋىن وكىلدەرى اراسىنداعى شىعارماشىلىق ۇندەستىكتىڭ, رۋحاني ساباقتاستىقتىڭ جەمىسى. جوبا اياسىندا جاس سۋرەتشىلەردىڭ شىنايى تالپىنىسى مەن ۇستازدارىنىڭ كوركەمدىك تەرەڭدىگى ءبىر ارناعا توعىسىپ, كورەرمەنگە ەرەكشە اسەر قالدىرادى. ەكسپوزيتسيادا ءتۇرلى تەحنيكادا ورىندالعان 100-دەن استام تۋىندى ۇسىنىلدى. ولاردىڭ اۆتورلارى — قالالىق, رەسپۋبليكالىق جانە حالىقارالىق بايقاۋلاردىڭ جۇلدەگەرلەرى اتانعان وقۋشىلار مەن ولاردىڭ كاسىبي تالىمگەرلەرى.
«تۇمار-ارت» قاۋىمداستىعى ۇزاق جىلدار بويى بالالار مەن جاسوسپىرىمدەردىڭ شىعارماشىلىعىن دامىتۋعا باعىتتالعان «ارت-فلورا», «عالام پاليتراسى», «الماتى — مىڭ ءتۇستىڭ قالاسى», «اتامەكەن» سىندى اۋقىمدى جوبالاردى تابىستى جۇزەگە اسىرىپ كەلەدى. قاۋىمداستىق قۇرامىنداعى پەداگوگ-سۋرەتشىلەر تەك كاسىبي دەڭگەيدەگى كورمەلەرگە قاتىسىپ قانا قويماي, جاس بۋىندى تاربيەلەۋ ىسىنە دە ەلەۋلى ءۇن قوسىپ ءجۇر. ولاردىڭ شاكىرتتەرى ءتۇرلى دەڭگەيدەگى ونەر بايقاۋلارىندا ۇزدىك ناتيجە كورسەتىپ, قازاق بەينەلەۋ ونەرىنىڭ بولاشاعىن جالعاستىرۋدا.
كورمە قوناقتارى مەن قاتىسۋشىلار كوركەم تۋىندىلار ارقىلى كۇز مەزگىلىنىڭ اسەمدىگىن, شابىت پەن سەزىمگە تولى بولمىسىن جاڭا قىرىنان تانۋعا مۇمكىندىك الدى. «كۇزگى سيمفونيا: بالالار مەن تالىمگەرلەر» كورمەسى — ونەر ارقىلى ۇرپاقتار اراسىنداعى رۋحاني بايلانىس پەن شىعارماشىلىق ساباقتاستىقتى دارىپتەگەن ماڭىزدى مادەني وقيعا رەتىندە ەستە قالدى.
«بۇگىنگى كورمە — بالالار شىعارماشىلىعى مەن ۇستازدار ەڭبەگىنىڭ جارقىن ناتيجەسى. ءبىز وسىنداي باستامالار ارقىلى وسكەلەڭ ۇرپاقتىڭ ونەرگە دەگەن قىزىعۋشىلىعىن وياتىپ, ولاردىڭ شىعارماشىلىق الەۋەتىن دامىتۋعا جول اشامىز. ونەردەن ورنەك ىزدەگەن ورەندەردىڭ بۇگىنگى بەتالىسى كوڭىلگە ءۇمىت ۇيالاتادى» - دەيدى مەملەكەتتىك ورتالىق مۋزەيدىڭ سىرتقى بايلانىستار ءبولىمىنىڭ جەتەكشىسى اننا كۋششەنكو.
شارا بارىسىندا قر مەملەكەتتىك ورتالىق مۋزەيى اتىنان "تۇمار-ارت" سۋرەتشى-پەداگوگتار قاۋىمداستىعىنىڭ ديرەكتورى لاريسا ساۆانكيناعا بالالار مەن جاسوسپىرىمدەردىڭ كوركەم شىعارماشىلىعىن دامىتۋعا قوسقان زور ۇلەسى ءۇشىن العىس حات تابىستالدى.
ايرىقشا كورمە قازان ايىنىڭ سوڭىنا دەيىن جالعاسادى.
