كەزدەسۋدە ازەربايجاننىڭ گابالا قالاسىندا وتكەن تۇركى مەملەكەتتەرى ۇيىمىنىڭ ءحىى ءسامميتىنىڭ قورىتىندىسى كەڭىنەن ءسوز بولدى. ناقتى ايتقاندا, ەكونوميكانىڭ نەگىزگى سەكتورلارى بويىنشا تمۇ-عا مۇشە مەملەكەتتەردىڭ ينتەگراتسياسىن نىعايتۋعا, حالىقارالىق ماسەلەلەردە ءوزارا قولداۋعا, وڭىرلىك قاۋىپسىزدىكتى قامتاماسىز ەتۋگە جانە مادەني-گۋمانيتارلىق ءىس-قيمىلدى دامىتۋعا ارنالعان گابالا دەكلاراتسياسىنىڭ نەگىزگى باعىتتارى تالقىلاندى.
ء«بىزدىڭ كەزدەسۋىمىز ەلدەرىمىزدىڭ ءوزارا ءىس-قيمىلىنىڭ جوعارى دەڭگەيىن راستاپ, تۇركى ينتەگراتسياسىنىڭ جاڭا باعدارىن بەلگىلەپ بەرگەن گابالاداعى تۇركى مەملەكەتتەرى ۇيىمىنىڭ سامميتىنەن كەيىن ءوتىپ وتىر. قازاقستان پرەزيدەنتى قاسىم-جومارت توقاەۆ سول جيىندا تۇركىتىلدەس حالىقتاردىڭ جاقىندىعىنا ەرەكشە توقتالعان بولاتىن. مەملەكەت باسشىسى ءتۇبى ءبىر تۇركى جۇرتىنىڭ تاريحى تامىرلاس ەكەنىن جانە ءبىزدى ورتاق قۇندىلىقتار بىرىكتىرەتىنىن تىلگە تيەك ەتتى. مۇنىڭ ءبارى بەرەكەلى باۋىرلاستىعىمىز بەن ىنتىماعىمىزدىڭ جارقىن كورىنىسى ەكەنى انىق. گابالا ءسامميتىنىڭ ناتيجەلەرى پارلامەنتتىك اسسامبلەيا اياسىندا ىنتىماقتاستىقتى ودان ءارى نىعايتۋعا, كەلىسىلگەن زاڭنامالىق تاسىلدەردى ازىرلەۋگە جانە بىرلەسكەن جوبالاردى ىسكە اسىرۋعا وڭ سەپتىگىن تيگىزەدى دەپ سەنەمىن», دەپ م.اشىمباەۆ قازاقستان تۇركپا-نىڭ قازىرگى توراعاسى رەتىندە ۇيىمنىڭ تۇركى مەملەكەتتەرى مەن حالىقتارىنىڭ يگىلىگىن كوزدەيتىن باستامالارىنا جان-جاقتى قولداۋ كورسەتۋگە دايىن ەكەنىن ايتتى.
سونىمەن قاتار تاراپتار قازىرگى تاڭدا تۇركپا تۇركى ينتەگراتسياسىندا پارلامەنتارالىق ديالوگتى نىعايتاتىن جانە ەلدەردىڭ زاڭنامالىق باستامالارىن ۇيلەستىرەتىن ماڭىزدى الاڭ رەتىندە ەرەكشە ورىن الاتىنىنا نازار اۋداردى. سەنات توراعاسى ءوز سوزىندە بۇل باعىتتاعى ىنتىماقتاستىقتىڭ پەرسپەكتيۆالارىنا دا توقتالىپ ءوتتى.
«قازاقستان پارلامەنتى تۇركپا اياسىندا بەلسەندى ىنتىماقتاستىقتى ارتتىرۋعا جانە جاڭا باستامالاردى جۇزەگە اسىرۋعا مۇددەلى. قازىرگى تاڭدا تۇركى ەلدەرىنىڭ پارلامەنتتىك ديپلوماتياسى بەلسەندى دامىپ كەلەدى. سوندىقتان ورتاق ۇيلەستىرۋشى ورگان – تۇركپا حاتشىلىعىنىڭ قىزمەتىن ودان ءارى جەتىلدىرۋدىڭ ماڭىزى زور», دەدى م.اشىمباەۆ.
ءوز كەزەگىندە راميل گاسانوۆ بيىل ماۋسىم ايىندا استانادا تۇركپا-نىڭ پلەنارلىق سەسسياسى ءساتتى وتكىزىلگەنىن ايتتى. اتالعان سەسسيادا بىرقاتار مودەلدىك زاڭ قابىلدانىپ, تۇركپا-نىڭ 14-پلەنارلىق سەسسياسىنىڭ استانا دەكلاراتسياسى ماقۇلدانعان ەدى. سونداي-اق تۇركى مەملەكەتتەرى پارلامەنتتىك اسسامبلەياسىنىڭ باس حاتشىسى تىعىز ىنتىماقتاستىق جانە پارلامەنتارالىق بايلانىستاردى نىعايتۋ جولىنداعى بەلسەندى جۇمىس ءۇشىن ريزاشىلىعىن ءبىلدىردى.
سۇحبات كەزىندە قازاق-ازەربايجان اراسىنداعى ەكىجاقتى ءىس-قيمىلدى ءارى قاراي دامىتۋ ماسەلەلەرى دە ءسوز بولدى. بۇعان قوسا ازەربايجان مەن ارمەنيا اراسىنداعى بەيبىت قاتىناستار تۋرالى دەكلاراتسيانىڭ ماڭىزىنا ءمان بەرىلدى.
