سولتۇستىك قازاقستان وبلىستىق تابيعاتتى قورعاۋ پروكۋراتۋراسى كەيىنگى ەكى جىلدىڭ كولەمىندە ەسەپكە الىنباعان, قورعاۋسىز قالعان مىڭداعان گەكتار ورمان القاپتارىن انىقتاعان. پرەزيدەنتتىڭ جولداۋىندا ايتىلعان القاپتار وسى تەكسەرىستەردىڭ ناتيجەسىندە انىقتالعان.
«ورمان كودەكسىنىڭ 51-1 بابىنا سايكەس, وزگە ساناتتاعى جەرلەردە تابيعي وسكەن ەكپەلەر مەملەكەتتىك ورمان قورى قۇرامىنا ەنەدى. اتالعان نورماعا قاراماستان, سولتۇستىك قازاقستان وبلىسى اكىمدىگىنىڭ تابيعي رەسۋرستار باسقارماسىنىڭ لاۋازىمدى تۇلعالارى جەردى اۋدارۋ, ەسەپكە الىنباعان ورمان القاپتارىنا تۇگەندەۋ جۇرگىزۋ ماسەلەسىن اۋدان اكىمدەرىمەن ۇيلەستىرۋدى جۇزەگە اسىرماعان», دەپ جازىلعان پروكۋراتۋرانىڭ ەسەبىندە.
پروكۋروردىڭ تالابىمەن جۇرگىزىلگەن تۇگەندەۋ ناتيجەسىندە ايىرتاۋ, ەسىل, جامبىل, قىزىلجار, مامليۋت, تيميريازەۆ اۋداندارىندا مەملەكەتتىك ورمان قورىنان تىس قورعاۋسىز قالعان وسى 9 مىڭ گەكتاردان استام ورماندى جەرلەر انىقتالعان. سولتۇستىك قازاقستان وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنان الىنعان مالىمەتكە قاراعاندا, ءوڭىر اۋماعىنداعى ورمان قورىنىڭ جالپى اۋدانى 688 مىڭ گەكتاردى قۇرايدى. ونىڭ ىشىندە «كوكشەتاۋ» مەملەكەتتىك ۇلتتىق تابيعي پاركىنە قارايتىنى 134,5 مىڭ گا, قالعان 553,5 گەكتارى جەرگىلىكتى اتقارۋشى ورگاندار اۋماقتارىندا. وبلىستىق تابيعي رەسۋرستاردى باقىلاۋ باسقارماسىنا 12 ورمان شارۋاشىلىعى, «جانۋارلار دۇنيەسىن قورعاۋ جونىندەگى جەدەل قىزمەت» كمك مەن «قىزىلجار سۋ قويمالارى» كمك مەكەمەلەرى قارايدى. باسقارمانىڭ وزىندە بىرنەشە ءبولىم بار. وسىنشا باعىنىستى شارۋاشىلىقتارى, ۋچاسكەلەرى, مىڭداعان قىزمەتكەرى بار باسقارمانىڭ كۇنى بۇگىنگە دەيىن 9 مىڭ گەكتار ورماندى القاپتى نەگە يەسىز قالدىرعانى بەلگىسىز.
قازىر تابيعات قورعاۋ پروكۋراتۋراسىنىڭ قاداعالاۋ اكتىسىنىڭ نەگىزىندە اكىمدىكتەر بارلىق مۇددەلى ورگانداردىڭ قاتىسۋىمەن كوميسسيا قۇرىپ, انىقتالعان يەسىز ۋچاسكەلەردى مەملەكەتتىك ورمان قورى قۇرامىنا ەنگىزۋ جونىندە ناقتى مەرزىمدەر بەلگىلەپ, جاۋاپتى ورىنداۋشىلاردى تاعايىنداپ, جول كارتاسىن ازىرلەدى. ءوز مىندەتىن تيىسىنشە ورىنداماعان ءتورت لاۋازىمدى تۇلعا تارتىپتىك جاۋاپقا تارتىلدى.
ەكولوگيالىق جاعدايدى جاقسارتۋ مەملەكەت باسشىسى ايقىنداعان مەملەكەتتىك ساياساتتىڭ باسىم باعىتىنىڭ ءبىرى ەكەنىن ەسكەرە وتىرىپ, مەملەكەتتىك ورمان قورىن كەڭەيتۋ ارقىلى, جەرگىلىكتى, ۋاكىلەتتى ورگانداردىڭ قىزمەتىن ۇيلەستىرۋ ماقساتىندا ءىس-شارالار وتكىزىلدى. ماسەلەنى قاداعالاۋ پروكۋراتۋرانىڭ تۇراقتى باقىلاۋىنا الىندى. سونىمەن قاتار پروكۋراتۋرا مەملەكەتتىڭ ماتەريالدىق مۇددەلەرىن قورعاۋ جونىندە جۇيەلى جۇمىستار جۇرگىزىپ, جىل باسىنان بەرى پروكۋرورلىق قاداعالاۋ شارالارى ارقىلى جالپى سوماسى 30 ملرد تەڭگەنى قۇرايتىن م ۇلىكتەردى مەملەكەت مەنشىگىنە قايتاردى. مىسالى, ەسىل اۋدانىندا 14 نىسان (سۋ مۇناراسى, اۋىلدىق كلۋب عيماراتى, ترانسفورماتورلىق قوسالقى ستانسا, ۇڭعىما, سۋ قۇبىرىنىڭ تاراتۋ جەلىلەرى, ت.ب.) يەسىز بولىپ كەلگەن.
بىلتىر دا ورمان شارۋاشىلىعىنىڭ جاۋاپتى ادامدارى پروكۋراتۋرانىڭ قاداعالاۋ شارالارىنان كەيىن اكىمشىلىك جاۋاپقا تارتىلىپ, ولاردان 11 ملن تەڭگە كولەمىندە ورمانداردى مولىقتىرۋ تولەمى وندىرىلگەن. بيىلعى پروكۋراتۋرا انىقتاعان يەسىز قالعان 9 مىڭ گا ورمان القابىن تابيعات رەسۋرستارى باسقارماسى ناقتىلاي كەلە 10 مىڭ گەكتاردان اسىرىپ جىبەردى. ەندى سونىڭ 9 822 گەكتارى ۇزاق مەرزىمگە 237 جەر پايدالانۋشىلارعا بەرىلەدى, 596 گەكتارى مەملەكەتتىك ورمان قورىنا الىنادى.
سولتۇستىك قازاقستان وبلىسى
