قوعامدىق بايقاۋدىڭ ءرولى تۋرالى ءسوز

كەشە ەلوردادا «قر پرەزيدەنتىنىڭ كەزەكتەن تىس سايلاۋىن قوعامدىق بايقاۋدىڭ ءرولى: دەموكراتيالىق كونتسەپت» دەگەن تاقىرىپتا سەمينار-ترەنينگ ءوتتى. شارانىڭ وتۋىنە سايلاۋدى بايقاۋ جونىندەگى رەسپۋبليكالىق قوعامدىق كوميسسيا (سبرقك) مۇرىندىق بولىپتى. سەمينار-ترەنينگ سايلاۋدى قوعامدىق بايقاۋ پروتسەسىنە ازىرلىكتى پىسىقتاپ الۋ ءۇشىن جانە سبرقك مۇشەلەرى, سونداي-اق وڭىرلىك وكىلدەرى جانە سايلاۋدى بايقاۋشىلار ءۇشىن وتكىزىلىپ وتىرعاندىعىن ايتا كەتكەن ءجون. ونىڭ جۇمىسىنا ورتالىق سايلاۋ كوميسسياسىنىڭ, سىرتقى ىستەر مينيسترلىگىنىڭ, باس پروكۋراتۋرانىڭ وكىلدەرى مەن قوعامدىق ۇيىمداردىڭ مۇشەلەرى جانە ساراپشىلار قاتىستى. ورتالىق سايلاۋ كوميسسياسىنىڭ مۇشەسى ءلاززات سۇلەيمەنوۆا جەرگىلىكتى جەرلەردەگى سايلاۋ كوميسسيالارىمەن جۇمىسقا قاتىستى ويلارىمەن ءبولىستى. «سايلاۋ ءيميدجىن قالىپتاستىرۋدا قوعامدىق بىرلەستىكتەردىڭ ورنى ەرەكشە. ەلىمىزدىڭ سايلاۋ زاڭنامالارىن ساقتاپ, سايلاۋ ناۋقانىنا بەلسەندى ارالاساتىن بولاسىزدار», دەدى ءلاززات جاڭىلىسقىزى. وسك مۇشەسىنىڭ مالىمەتىنە قاراعاندا, 9,5 ميلليون ادام سايلاۋشىلار تىزىمىنە ەنگىزىلەتىن بولادى. بۇل ورايدا 10 مىڭداي ورتالىق, اۋماقتىق جانە ۋچاسكەلىك سايلاۋ كوميسسيالارى تىركەلگەن. قوعامدىق بىرلەستىكتەردىڭ بايقاۋشىلارى بارلىق سايلاۋ كوميسسيالارىمەن جۇمىس ىستەيتىنى بەلگىلى بولىپ وتىر. بۇل رەتتە بايقاۋشىنىڭ وكىلەتتىلىگى جازباشا تۇردە اتى-جونىمەن تولىق جازىلىپ, مورلەنگەن بولۋى ءتيىس. سونىمەن قاتار, ونىڭ جەكە كۋالىگى بولۋى تيىستىگى دە العا تارتىلدى. شارا بارىسىندا بايقاۋشىلاردىڭ سايلاۋ پروتسەسىندەگى شەشۋشى ءرولى دە ەرەكشە اتالدى. بۇدان باسقا ورتالىق سايلاۋ كوميسسياسىنىڭ بايقاۋشىلارمەن ءوزارا ءىس-قيمىلى, بايقاۋ پروتسەسىندە اقپاراتتىق تەحنولوگيالاردى قولدانۋ ماسەلەلەرى دە نازاردان تىس قالعان جوق. سايلاۋدىڭ حالىقارالىق ستاندارتتارى مەن 2011 جانە 2012 جىلدارداعى سايلاۋ ناۋقانىندا سايلاۋدى بايقاۋ جونىندەگى رەسپۋبليكالىق قوعامدىق كوميسسياسىنىڭ قىزمەت تاجىريبەسىن تالداۋعا دا ەرەكشە كوڭىل ءبولىندى. اسقار تۇراپباي ۇلى, «ەگەمەن قازاقستان».