پرەزيدەنتتىڭ تاپسىرماسىن ورىنداۋ ماقساتىندا بۇگىن رەسپۋبليكالىق ماڭىزى بار, ۇزىندىعى 415 شاقىرىم بولاتىن «قالباتاۋ – مايقاپشاعاي» اۆتوموبيل جولىن قايتا جاڭارتۋ بويىنشا نەگىزگى قۇرىلىس جۇمىستارى اياقتالىپ, كولىك قوزعالىسى باستالدى.
وسىلايشا, كوپشىلىك كوپتەن كۇتكەن رەسپۋبليكالىق ماڭىزى بار ومبى – مايقاپشاعاي باعىتىنداعى تاسجولدىڭ سالتاناتتى اشىلۋى ءوتتى. بۇگىن 8 جىل جۇرگىزىلگەن قۇرىلىس جۇمىسى اياقتالىپ, ەكى بىردەي وبلىستىڭ حالقى اسىعا كۇتكەن جول ەل يگىلىگىنە بەرىلدى.
كۇرە جولدىڭ اشىلۋ راسىمىنە اباي وبلىسىنىڭ اكىمى بەرىك ءۋالي, شىعىس قازاقستان وبلىسىنىڭ اكىمى نۇرىمبەت ساقتاعانوۆ, ءماجىلىس دەپۋتاتتارى نۇرتاي سابيليانوۆ, ەرلان سايروۆ, ۇلىقبەك تۇماشينوۆ, رينات زايىت, ماقسات تولىقباي, «قازاۆتوجول» ۇك» اق توراعاسى دارحان يماناشەۆ قاتىستى.
رەسپۋبليكالىق تاسجول شقو-نىڭ قيىر شىعىسىنداعى تارباعاتاي, زايسان اۋداندارىن قامتيدى. وسى رەتتە شقو اكىمى نۇرىمبەت ساقتاعانوۆ اشىلۋ سالتاناتىندا اقجارما تىلەگىن جەتكىزدى.
– بۇگىن – شىعىس قازاقستان مەن اباي وبلىستارى ءۇشىن ءسان-سالتاناتى جاراسقان ەرەكشە كۇن. 8 جىل بويى جۇرگىزىلگەن, ەكى وبلىستىڭ اۋماعىمەن وتەتىن قالباتاۋ – مايقاپشاعاي جولىنىڭ اشىلۋىنا كۋا بولىپ وتىرمىز. بۇل جول – ومبى – مايقاپشاعاي حالىقارالىق تاسجولىنىڭ عانا ەمەس, باتىس ەۋروپا – باتىس قىتاي ءدالىزىنىڭ دە ءبىر بولىگى. وسىنداي جۇمىستى اتقارعان مەردىگەر كومپانياعا, سونداي-اق ۇكىمەتكە, كولىك مينيسترلىگىنە جانە «قازاۆتوجول» كومپانياسىنا ۇلكەن العىسىمىزدى بىلدىرەمىز, – دەدى ن.ساقتاعانوۆ.
حالىقارالىق تاسجولدىڭ شقو جانە اباي وبلىستارى اۋماعىنداعى جالپى ۇزىندىعى 415 شاقىرىم بولسا, ونىڭ 231 شاقىرىمى شىعىس قازاقستان وبلىسىنىڭ اۋماعىمەن وتەدى. بەلگىلى بولعانداي, جوبا اياسىندا 7 كوپىر مەن 223 سۋ وتكىزۋ ارناسى سالىنعان. وسى رەتتە قۇرىلىس جۇمىستارىن قىتايدىڭ «سينسين قۇرىلىس جانە دامۋ كومپانياسى» جشس جۇرگىزگەنىن ايتقان ءجون. قىتاي مەن رەسەيدى جالعايتىن جول شىعىس قازاقستانداعى شەكارالىق شالعاي اۋدانداردىڭ الەۋمەتتىك-ەكونوميكالىق دامۋىنا, سونداي-اق وبلىس پەن ەلىمىزدىڭ كولىك-لوگيستيكا سالاسىنىڭ وركەندەۋىنە زور ىقپال ەتەتىنى ءسوزسىز.
جولدىڭ سالتاناتتى اشىلۋ راسىمىندە اباي وبلىسىنىڭ اكىمى تاسجولدىڭ شىعىس وڭىرىنە عانا ەمەس, رەسپۋبليكاعا ماڭىزى ەرەكشە ەكەنىن ايتتى.
– مەملەكەت باسشىسى بيىلعى جولداۋىندا «وڭىرلەردىڭ كولىك بايلانىسىنا قاتىستى ماسەلەسىمەن مىقتاپ اينالىسۋ كەرەك. بۇل جونىندە قازىر كوپ ايتىلىپ ءجۇر, سونىڭ ىشىندە حالىقارالىق فورۋمداردا دا تالقىلانىپ جاتىر. ءىرى ترانزيتتىك ايماق سانالاتىن ەلىمىزگە بۇل باعىت ايرىقشا ماڭىزدى», دەگەن ەدى. ءبىز بۇگىن ءوڭىرىمىزدىڭ ينفراقۇرىلىمدىق دامۋىنداعى ماڭىزدى بەلەسكە كۋا بولىپ وتىرمىز. جولدىڭ باستى مەرەكەمىز – رەسپۋبليكا كۇنى قارساڭىندا پايدالانۋعا بەرىلىپ وتىرعانى وبلىس جۇرتشىلىعى ءۇشىن قۋانىشتى جاڭالىق بولعانىن ايتۋىمىز كەرەك. ءوڭىر تۇرعىندارى بۇل كۇندى كوپ كۇتتى. بۇل حالىقارالىق لوگيستيكالىق ءدالىز بويىندا اباي وبلىسىنىڭ جارما, كوكپەكتى, اقسۋات اۋداندارى بار. اتالعان باعىت ايماقتىڭ ەكونوميكالىق تۇرعىدان دامۋىنا, تۋريستىك الەۋەتىن ارتتىرۋعا, وڭىرارالىق بايلانىستى جاقسارتۋعا سەپتىگىن تيگىزەرى انىق. كولىك مينيسترلىگىنە, «قازاۆتوجول» باسشىلىعىنا, مەردىگەر كومپانياعا وبلىس تۇرعىندارى اتىنان العىس بىلدىرەمىن, – دەدى ب.ءۋالي.
جيىندا «قازاۆتوجول» ۇلتتىق كومپانياسىنىڭ باسقارما توراعاسى د.يماناشەۆ جوبانىڭ ستراتەگيالىق ماڭىزىنا توقتالدى.
– قالباتاۋ – مايقاپشاعاي تاسجولى – ەلىمىزدىڭ كولىك سالاسىنىڭ ماڭىزدى بولىگى. جول ەلىمىزدىڭ ورتالىق جانە شىعىس وڭىرلەرىن قىتاي ەلىنىڭ شەكاراسىمەن بايلانىستىرادى. جوبانىڭ جۇزەگە اسىرىلۋى ترانزيتتىك الەۋەتتى ارتتىرۋعا, وڭىرارالىق جانە حالىقارالىق بايلانىستى نىعايتۋعا, جول قوزعالىسى قاۋىپسىزدىگىن قامتاماسىز ەتۋگە جانە ازاماتتار ءۇشىن قولايلى جاعداي جاساۋعا مۇمكىندىك بەرەدى. بۇل – ەلىمىزدىڭ ەكونوميكالىق تۇراقتى دامۋىنا باعىتتالعان جول ينفراقۇرىلىمىن جاڭعىرتۋدىڭ كەڭ اۋقىمدى جۇمىسىنىڭ ناتيجەسى, – دەدى ول.
جول قۇرىلىسى قىتايدىڭ «ەكسپورتتىق-يمپورتتىق» بانكىنىڭ قاراجاتى ەسەبىنەن جانە رەسپۋبليكالىق بيۋدجەتتەن قوسىمشا قارجىلاندىرۋ ارقىلى جۇزەگە اسىرىلدى. جوبا جالپى ۇزىندىعى 415 شاقىرىم بولاتىن 10 ۋچاسكەنى جانە 2 جول پايدالانۋ ۋچاسكەسىن قامتيدى. ونىڭ ىشىندە 184 شاقىرىمى – اباي وبلىسىنىڭ, 231 شاقىرىمى شىعىس قازاقستان وبلىسىنىڭ اۋماعىندا ورنالاسقان. جوبانى ىسكە اسىرۋ بارىسىندا 8 اسفالتبەتون زاۋىتى, 1 100 بىرلىك جول-قۇرىلىس تەحنيكاسى, 1 800-دەن استام مامان جۇمىلدىرىلدى. 5 دەمالىس الاڭى, 37 كوپىر, 2 جول وتپەسى, 349 سۋ وتكىزۋ قۇبىرى جانە دەمالىس ايماقتارىندا 2 سانيتارلىق-گيگيەنالىق توراپ سالىنعان.
ءسويتىپ, ءبىراز جىلعا سوزىلعان «قالباتاۋ – مايقاپشاعاي» جوباسىنىڭ اياقتالۋى – ەلىمىزدىڭ ترانزيتتىك الەۋەتىن ارتتىرىپ, ەۋروپا مەن ازيانى جالعايتىن ستراتەگيالىق كولىك ءدالىزى بولماق. جاڭا تاسجول وڭىرارالىق قاتىناستى كۇشەيتىپ, شەكارالىق اۋدانداردىڭ ەكونوميكالىق تىنىسىن كەڭەيتەرى ءسوزسىز.
مەرەي قاينار ۇلى,
باقىتبەك قادىر,
«Egemen Qazaqstan»
