ءىس-شارانى قالا اكىمى اسحات بەردىحانوۆ اشىپ, قاتىسۋشىلاردى مەرەكەمەن قۇتتىقتادى. ول مەملەكەت تاراپىنان مۇگەدەكتىگى بار ازاماتتاردىڭ ءومىر ساپاسىن جاقسارتۋعا جانە الەۋمەتتىك قولداۋ شارالارىن كۇشەيتۋگە ايرىقشا كوڭىل ءبولىنىپ وتىرعانىن اتاپ ءوتتى.
«بۇگىندە قوناەۆ قالاسىندا 1416 مۇگەدەكتىگى بار ازامات, ونىڭ ىشىندە 325 ەرەكشە بالا بار. «جەكە وڭالتۋ باعدارلاماسى» اياسىندا 240 ادام ساناتوريلىك جولدامامەن, 46 ازامات اربا جانە تيفلو-سۋردو قۇرالدارىمەن قامتاماسىز ەتىلدى», – دەدى ول.
بۇدان بولەك, شاھار باسشىسى ۇيدە ءبىلىم الاتىن بالالاردىڭ وتباسىلارىنا 31 456 تەڭگە كولەمىندە جاردەماقى تولەنىپ جاتقانىن ايتتى.
«بيىل ءۇش ەرەكشە بالاسى بار وتباسى ءوز كاسىبىن باستاۋعا گرانت الدى. بۇل – مەملەكەتىمىزدىڭ الەۋمەتتىك ادىلدىك پەن تەڭ مۇمكىندىكتەر قاعيداتىنا دەگەن بەرىك ۇستانىمىنىڭ ايعاعى», – دەدى قالا اكىمى.
سونداي-اق اسحات بەردىحانوۆ ەرەكشە جانداردى قوعام ومىرىنە بەيىمدەۋگە ۇلەس قوسىپ جۇرگەن ازاماتتارعا العىسىن ءبىلدىردى.
ماراپات يەلەرى قاتارىندا «قاپشاعاي سامعا» قوعامدىق بىرلەستىگىنىڭ جەتەكشىسى مارات بەكەن ۇلى, «قامقور جۇرەك» بىرلەستىگىنىڭ باسشىسى ءلاززات يمانعاليقىزى, سونداي-اق «مەيىرىم قوناەۆ-2025», «التىن بالا», «ەرەكشە بالالار اتا-انالارىنىڭ وداعى», «كۇندىزگى بولۋ ورتالىعى» ۇيىمدارىنىڭ جەتەكشىلەرى بار. ونەرپاز بالالار دا نازاردان تىس قالماي, ولارعا العىس حات تابىستالدى.
مەرەكەلىك كەش كونتسەرتتىك باعدارلاماعا ۇلاسىپ, ەرەكشە بالالار مەن ولاردىڭ ۇستازدارى ءان شىرقاپ, بي بيلەدى. بالالارعا قۋانىش سىيلاۋ ماقساتىندا انيماتورلار مەن ءتۇرلى ويىندار ۇيىمداستىرىلدى, ال «KazSMU» قۇرىلىس كومپانياسى بۇلدىرشىندەرگە سىيلىقتار تارتۋ ەتتى.
الماتى وبلىسى.
